2019 ވަނަ އަހަރުގެ ކޮރަޕްޝަން ޕަރސެޕްޝަން އިންޑެކްސް (ސީ.ޕީ.އައި) އާއި އަޅާ ބަލާއިރު، ރާއްޖެއިން 14 ޕޮއިންޓް ކުރި ހޯދައި، 2020 ވަނަ އަހަރު ގައުމުތަކުގެ ތަރުތީބުން 55 ދަރަޖަ ކުރި ލިބުމަކީ ގައުމެއްގެ ގޮތުގައި އެންމެންނަށް ލިބުނު ވަރަށް ބޮޑު ހިތްވަރެއް ކަމަށް ޓްރާންސްޕޭރެންސީ މޯލްޑިވްސްގެ ގަވަރނެންސް މެނޭޖަރ އާހިދް ރަޝީދް ވިދާޅުވެއްޖެއެވެ.
ރާއްޖެޓީވީގެ 'ފަލަސުރުޚީ' ޕްރޮގްރާމްގައި ވާހަކަދައްކަވަމުން އާހިދް ވިދާޅުވީ މިދާ ރޭޓުގައި ރަނގަޅު ބަދަލުތަކެއް ގެންނަމުންދާ ކަަމަށްވާނަމަ ކުރިއަށް އޮތް އަހަރުތަކުގައި ރާއްޖެއަށް ކޮރަޕްޝަން ޕަރސެޕްޝަން އިންޑެކްސްގައި މިއަށްވުރެ މައްޗަށް ގޮސް ބޫޓާން ފަހަނައަޅައި ދެވިދާނެކަމަށެވެ.
ވުމާއިއެކު ކޮރަޕްޝަން ހުއްޓުމަށް އެޅެންހުރި ހުރިހާ ފިޔަވަޅެއް އަޅަން ޖެހޭ ކަމަށް ވިދާޅުވެ އާހިދް ވިދާޅުވީ ސިޔާސީ ފަރާތެއް، ނުވަތަ އާއްމު ރައްޔިތެއް ނަމަވެސް ކޮރަޕްޝަނާއި ދެކޮޅަށް ފިޔަވަޅު އަޅަން ޖެހޭކަމަށެވެ.
މީގެ އިތުރުން އާހިދް ވިދާޅުވީ ކޮރަޕްޝަން ޕަރސެޕްޝަން އިންޑެކްސްއަކީ މުޅި ދުނިޔޭގައިވެސް ގައުމެއްގެ ކޮރަޕްޝަން އޮންނަވަރު ބަލައިގަންނަ އެންމެ ބޮޑު އިންޑެކްސް ކަމަށެވެ. އަދި ހުރިހާ ފަރާތްތަކުން ވެސް ބަލައިގަންނަ އެއްޗެއް ކަމަށް އާހިދް ވިދާޅުވިއެވެ.
އެގޮތުން ކޮރަޕްޝަން ޕަރސެޕްޝަން އިންޑެކްސް ޕޮއިންޓު މަތިވުމުން އޭގެ ސަބަބުން ފައިދާ ލިބޭ ކަމަށާއި ފައިދާއަކީ ބޮޑެތި ޖަމިއްޔާތަކުން އަދި ބޮޑެތި ވިޔަފާރިތަކުން ޕޮއިންޓު މަތި ގައުމުތަކުގައި ވިޔަފާރި ކުރުމަށް ވިސްނުންކަން އާހިދް ފާހަގަ ކުރެއްވިއެވެ.
މީގެ އިތުރުން ގައުމެއްގައި އިންވެސްޓްކުރުމުގެ ކުރިން ފާއިތުވި އަހަރުތަކުގައި އެގައުމެއް އޮތީ ކޮރަޕްޝަން ޕަރސެޕްޝަން އިންޑެކްސް ޕޮއިންޓުގެ ގޮތުން ކިތައް ވަނައިގައިތޯ ބަލާކަމަށް ވެސް އާހިދް ވަނީ ވިދާޅުވެފައެވެ.
އާހިދް ވިދާޅުވީ މި އިންޑެކްސްގައި ޕޮއިންޓު މަތި ކުރުމަކީ މި ސަބަބުތަކަށްޓަކައި ވަރަށް މުހިއްމު ކަމެއް ކަމަށެވެ. އަދި މި ޕޮއިންޓް މަތި ވަމުންދާ ވަރަކަށް ގިނަ އިންވެސްޓަރުން ލިބޭނެ ކަމަށް އާހިދް ވިދާޅުވިއެވެ. މީގެ އިތުރުން މިއީ ގައުމުގެ އިގްތިސާދު ކުރިއެރުމާއި ސީދާ ގުޅިފައިވާ ކަމެއްކަމަށް ވެސް އާހިދް ވިދާޅުވިއެވެ.
ގައުމުތަކުގައި ކޮރަޕްޝަން އަށަގަނެފައިވާ މިންވަރު ދެނެގަތުމުގެ މަގުސަދުގައި ޓްރާންސްޕޭރެންސީ އިންޓަރނޭޝަނަލް (ޓީ.އައި) ގެ ފަރާތުން ނެރުނު2020 ވަނަ އަހަރުގެ ކޮރަޕްޝަން ޕަރސެޕްޝަން އިންޑެކްސް(ސީ.ޕީ.އައި) އިން 2020 ވަނަ އަހަރުގެ ސީ.ޕީ.އައިގައި ރާއްޖެ 14 ޕޮއިންޓު މައްޗަށް ޖެހިލުމާއިއެކު އެ ދާއިރާގައި މަސައްކަތް ކުރައްވާ އެންމެހާ ފަރާތްތަކަށް އާހިދް މަރުހަބާ ވިދާޅުވިއެވެ.
