ސްޕަލް ބަލިކޮށް ޔުވެންޓަސް ސެމީއަށް
28 ޖެނުއަރީ 2021 | ބުރާސްފަތި 08:02ސްޕަލް އަތުން ޔުވެންޓަސް މޮޅުވީ 4-0 ގެ ނަތީޖާއަކުން
ޔުވެންޓަސް އާއި ސްޕަލް ބައްދަލުކުރި މެޗުގެ ތެރެއިން: މި މެޗުން ޔުވެންޓަސް މޮޅުވީ 4-0 ން
އިޓާލިއަން ކަޕުގެ ކުއާޓާފައިނަލުގައި ބުދަ ދުވަހުގެރޭ ސްޕަލް ބަލިކޮށް ސެމީފައިނަލަށް ޔުވެންޓަސް ދަތުރުކޮށްފިއެވެ.
އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ.
މި މެޗުގައި ޔުވެންޓަސްއިން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 16 ވަނަ މިނެޓުގައި ލިބުނު ޕެނަލްޓީއަކުން ޔުވެންޓަސްއަށް ލީޑު ނަގައިދިނީ އަލްވާރޯ މޮރާޓާއެވެ. އަދި މެޗުގެ 33 ވަނަ މިނެޓުގައި ޖިއަންލޫކާ ފްރަބޮއްޓާ ވަނީ ޔުވެންޓަސްއަށް ލީޑު ފުޅާކޮށްދީފައެވެ.
މި މެޗުގައި ޔުވެންޓަސްއިން ސްޕަލްގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލާފައިވާއިރު، އެ ޓީމުގެ ތިންވަނަ ލަނޑު މެޗުގެ 78 ވަނަ މިނެޓުގައި ކާމިޔާބުކޮށްދިނީ ޑެޔާން ކުލުސެވްސްކީއެވެ. އަދި މެޗުގެ އިތުރު ވަގުތުގައި ފެޑެރިކޯ ކިއެސާ ވަނީ ޔުވެންޓަސްގެ ހަތަރުވަނަ ލަނޑު ޖަހާފައެވެ.
މި މޮޅާއެކު އިޓާލިއަން ކަޕުގެ ސެމީއަށް ޔުވެންޓަސް ދަތުރުކުރިއިރު، ސެމީގައި ޔުވެންޓަސް ބައްދަލުކުރަން ޖެހޭނީ އިންޓަ މިލާނާއެވެ. އިންޓަ ސެމީއަށް ދަތުރުކޮށްފައިވަނީ ކުއާޓާގައި ވާދަވެރި އޭސީ މިލާން 2-1 ން ބަލިކުރުމަށްފަހުއެވެ.
