ހޯމަ ދުވަހު ކޮވިޑަށް ޕޮޒިޓިވްވި 109 މީހުންނާއެކު ރާއްޖޭގެ ކޮވިޑްގެ ކޭސްތައް 15،000 ފަހަނައަޅައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ތަފާސް ހިސާބުތައް ދައްކާ ގޮތުން، އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00 އާއި ހަމައަށް 109 މީހަކު ޕޮޒިޓިވްވެފައިވާއިރު މިއީ މި ފަހުން ރާއްޖޭގެ ޕޮޒިޓިވް ކޭސްތައް ޖެހިޖެހިގެން 100ން މަތީގައި ރިޕޯޓް ކުރެވުނު ދެވަނަ ދުވަހެވެ.

ހޯމަ ދުވަހު ޕޮޒިޓިވްވި 109 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 78 މީހުންނާއި، އަތޮޅުތެރޭގެ ރަށްތަކުން ޕޮޒިޓިވްވި 11 މީހުންނާއި، ރިސޯޓްތަކުން ޕޮޒިޓިވްވި 20 މީހުންނެވެ. އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00 އާއި ހަމައަށް 4،742 ސާމްޕަލް ނަގާ ޓެސްޓް ކޮށްފައިވެއެވެ.

މި މުއްދަތުގައި 35 މީހަކު ބަލިން ރަނގަޅުވެފައިވާއިރު، އެކްޓިވް ކޭސްގެ ގޮތުގައި 1160 ކޭސް ފާހަގަ ކުރެވެއެވެ. އަދި މީގެ ތެރެއިން 87 މީހަކަށް ފަރުވާ ދެމުންދަނީ ހޮސްޕިޓަލުގައެވެ. އާދީއްތަ ދުވަހު މި އަދަދު ހުރީ 80ގައެވެ. އެހެންކަމުން އިތުރު 7 މީހަކަށް ވޭތުވެދިޔަ 24 ގަޑިއިރު ތެރޭގައި އިތުރަށް ފަރުވާދޭން ފަށާފައިވެއެވެ.

އާދީއްތަ ދުވަހު ރިޕޯޓް ކުރެވުނު 109 ކޭސްއާއެކު ރާއްޖޭގެ ޕޮޒިޓިވް ކޭސްތަކުގެ އަދަދު ވަނީ 15،102ށް އަރާފައެވެ. މިހާތަނަށް ބަލިން ރަނގަޅުވެފައިވަނީ 13،884 މީހުންނެވެ. ރާއްޖޭގައި މިހާތަނަށް 390،396 ސާމްޕަލް ނަގާ ޓެސްޓް ކޮށްފައިވެއެވެ.

އެޗްޕީއޭގެ ތަފާސް ހިސާބުތައް ދައްކާ ގޮތުން 36 ވަނަ ހަފްތާގައި ފުލޫ ކްލިނިކް ޕޮޒިޓިވިޓީ ރޭޓް 1 އިންސައްތަ ދަށަށް ދިޔަ ނަމަވެސް 37 ވަނަ ހަފްތާގައި މި ނިސްބަތްވަނީ 4 އިންސައްތައަށް މައްޗަށް ޖެހިލާފައެވެ. މީގެ އިތުރުން ރިކަވަރީ ރޭޓް 95 އިންސައްތައިގައި ހުރުމަށްފަހު ކޭސްތައް އިތުރުވުމާއެކު މި އަދަދު ވެސް ވަނީ 92 އިންސައްތައަށް ދަށްވެފައެވެ.

ރާއްޖެއިން އެންމެ ފުރަތަމަ ޕޮޒިޓިވް ކޭސްއެއް ފެނުނުތާ އާދީއްތަ ދުވަހަށް 324 ދުވަސް ވެފައިވާއިރު، މި ބަލީގައި 51 މީހަކު ވަނީ ނިޔާވެފައެވެ.