ހައިކޯޓުގެ 3 ފަނޑިޔާރުން ހިމެނޭ ގޮތަށް ފަނޑިޔާރުންތަކެއްގެ ސުލޫކީ މައްސަލަތަކެއް ބަލަމުން އަންނަ ކަމަށް ޖުޑީޝަލް ސަރވިސް ކޮމިޝަން (ޖޭއެސްސީ)ން ބުނެފިއެވެ.

ޖޭއެސްސީން ބުނީ އެ ކޮމިޝަނުން މައްސަލަ ބަލަމުން ގެންދާ ހައިކޯޓުގެ ތިން ފަނޑިޔާރުންނަކީ އަލްއުސްތާޛް އަބްދުއްރައޫފް އިބްރާހީމާއި، އަލްއުސްތާޛް އަބްދުﷲ ހަމީދް އަދި އަލްއުސްތާޛް އަލީ ސަމީރު ކަމަށެވެ. މި ތިން ފަނޑިޔާރުންގެ މައްޗަށް އެ ކޮމިޝަނުން ބަލަމުން ގެންދާ މައްސަލައަކީ ގާނޫނު އަސާސީގެ 152 ވަނަ މާއްދާ އާއި، ދިވެހިރާއްޖޭގެ ފަނޑިޔާރުންގެ ގާނޫނުގެ 41 ވަނަ މާއްދާއާ ހިލާފަށް އިނާޔަތެއް ލިބިގަނެ ބަލައިގަތްކަމަށް ބުނާ މައްސަލައެވެ.

މީގެ އިތުރުން ސ. ފޭދޫ މެޖިސްޓްރޭޓް ކޯޓަށް ހުށަހެޅުނު މައްސަލައަކާ ގުޅިގެން ބޭއްވި ޝަރީއަތުގެ މަޖިލީހެއް ނިމުނީކަމަށް އިއުލާން ކުރެއްވުމަށްފަހު، މައްސަލައިގައި ހިމެނޭ ޚަސްމަކާ ދިވެހިރާއްޖޭގެ ހައިކޯޓުގެ ފަނޑިޔާރު އަލްއުސްތާޛާ ފާތިމަތު ފަރްހީޒާ ވަކިން ބައްދަލު ކުރެއްވި ކަމަށް ބުނާ މައްސަލަވެސް ބަލަމުން އަންނަ ކަމަށް ޖޭއެސްސީއިން ވަނީ ބުނެއެވެ.

މީގެ އިތުރުން ދ. މީދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛް އަލީ ޝަފީގުގެ މައްސަލައެއް ވެސް ޖޭއެސްސީއިން ގެންދަނީ ބަލަމުންނެވެ. ޖޭއެސްސީއިން ބުނީ ދ. މީދޫ މެޖިސްޓްރޭޓް ކޯޓަށް ހުށަހެޅު ގަޟިއްޔާއަކާ ގުޅިގެން ބަންދުގައި ހުރި މީހެއްގެ ބަންދު މުރާޖަޢާކުރުމަށް ޕްރޮސެކިއުޓާ ޖެނެރެލްގެ އޮފީހުން ހުށަހެޅުއްވުމުން އެ ހުށަހެޅުމާއިމެދު ގޮތެއް ނުނިންމައި އަހަރު ދުވަސް ވެފައިވުމާއި، އަދި އެ ގަޟިއްޔާގައި އަޑުއެހުންތައް ފަށައި ނުގަނެ އެކަށީގެންވާ މިންވަރަށްވުރެ ދިގު މުއްދަތެއްވެފައިވާތީ، މިއީ މައްސަލަ ބަލާ އިސްމެޖިސްޓްރޭޓް އަލީ ޝަފީގު ފަނޑިޔާރުކަމުގެ މަސްއޫލިއްޔަތު އަދާކުރުމުގައި އިހުމާލުވުންކަމަށް ބުނާ މައްސަލަ ކަމަށެވެ.

ޖޭއެސްސީއަށް ހުށައެޅޭ މައްސަލަތައް ބަލައި، ނިންމާ ސްޕީޑު ކުރިއަށްވުރެ އަވަސްވެފައިވާއިރު، އެ ކޮމިޝަނުން މިހާރު ގެންދަނީ ވީހާވެސް ދެފުށް ފެންނަ ގޮތެއްގައި މައްސަލަތައް ބެލުމުގެ ކަންކަން ކުރިއަށް ގެންދަމުންނެވެ. އެގޮތުން ފަނޑިޔާރުންނާ ގުޅިގެން ސުލޫކީ މައްސަލައެއް ހުށައެޅިއްޖެނަމަ، އެ މައްސަލަތައް ކުރިއަށްދާ, ނުދާ ގޮތްވެސް ރައްޔިތުންނަށް ގެންދަނީ ހާމަ ކުރަމުންނެވެ. އެއާއެކު، ޖޭއެސްސީއަށް އާންމުން ކުރާ އިތުބާރުވެސް އެތައް ގުނައަކަށް އިތުރުވެފައިވާކަމަށް ގިނަ ބަޔަކު ބުނެއެވެ.

ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ބަންޑާރަނައިބު އިބްރާހިމް ރިއްފަތުވެސް ވަނީ، މީގެ ކުރިންވެސް ފަނޑިޔާރުންނާ ގުޅިގެން ޝަކުވާ ހުށައެޅޭ ކަމަށާއި، ނަމަވެސް އޭރު އެ ޝަކުވާތަކަށް ވާނުވާ ރައްޔިތުންނަށް ވެސް އޮޅުން ނުފިލާކަން ފާހަގަ ކުރައްވާފައެވެ. އެހެން ނަމަވެސް މިހާރު ޖޭއެސްސީން އެ މަސައްކަތް ކުރިއަށް ގެންދަނީ ވަރަށް ދެފުށް ފެންނަ ގޮތެއްގައިކަން ފާހަގަ ކުރައްވައި ބަންޑާރަނައިބު ވިދާޅުވީ، ފަނޑިޔާރުން މަޤާމަށް ހޮއްވަވާއިރުވެސް އެ ފަނޑިޔާރެއްގެ ނަޒާހަތްތެރިކަމާއި، ފަނޑިޔާރަކާއި ގުޅިގެން ހުށައެޅިފައިވާ ތުހުމަތުތަކަށް ރިއާޔަތް ކުރައްވައި ބައްލަވާ ކަމަށެވެ.

އައު މެމްބަރުންތަކާއެކު ޖޭއެސްސީން ކުރަމުންދާ މަސައްކަތްތަކަށް މިއަދު ގިނަ ބައެއްގެ ތައުރީފު ދަނީ ލިބެމުންނެވެ. އެގޮތުން ފަނޑިޔާރުންނާ ގުޅިގެން ހުށައެޅޭ ސުލޫކީ މައްސަލަތައް ބަލަމުންދާއިރު، ކުރެވޭ ތުހުމަތުތަކާ ގުޅިގެން ތަހުޤީޤު ކުރުމަށްފަހު ފަނޑިޔާރުންނާމެދު އަޅަންޖެހޭ ފިޔަވަޅު އަޅާ މަންޒަރުވެސް މިއަދު ފެންނަމުންދާ ކަމަށް ގިނަ ބަޔަކު ބުނެއެވެ.