މާދަމާއިން ފެށިގެން ސިނަމާތަކާއި ފިލްމު ތިއޭޓަރުތައް ހުޅުވުމުގެ ހުއްދަ ދެނީ
ސިނަމާތަކާއި ފިލްމު ތިއޭޓަރުތައް ބަންދުކޮށްފައިވަނީ 16 މާރިޗު 2020ގައި
އޮލިމްޕަސް ސިނަމާ
މާދަމާއިން ފެށިގެން ސިނަމާތަކާއި ފިލްމް ތިއޭޓަރުތައް ހުޅުވުމުގެ ހުއްދަ ދޭން ނިންމާފައިވާކަން ހެލްތް ޕްރޮޓެކްޝަން އޭޖެންސީ، (އެޗްޕީއޭ) އިން ހާމަކޮށްފިއެވެ.
މިކަން ހާމަކޮށް އެޗް.ޕީ.އޭ.އިން ނެރުނު އިޢުލާންގައިވަނީ ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙީ ރައްކާތެރިކަމަށް ޓަކައި، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ 34 ވަނަމާއްދާގެ (ނ) ގެ ދަށުން ބަންދުކުރި ނަމަވެސް، "ކޮވިޑު-19 ގެ ހާލަތުގައި ރައްކާތެރިކަމާއެކު ސިނަމާ ހިންގުމާއި ސިނަމާ ހޯލްތައް ބޭނުން ކުރަންވީގޮތުގެ އުސޫލު" އާ އެއްގޮތަށް ސިނަމާތަކާއި ފިލްމު ތިއޭޓަރުތައް 2021 ޖަނަވަރީ 25 ވަނަ ދުވަހުން ފެށިގެން ހުޅުވައިލުން އެންމެރަނގަޅުކަމުގައި އެ އޭޖެންސީއިން ދެކޭކަމަށެވެ.
އާންމު ރައްޔިތުންގެ ޞިއްޙީ ރައްކާތެރިކަމަށް ޓަކައި، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ 34 ވަނަމާއްދާގެ (ނ) ގެ ދަށުން ސިނަމާތަކާއި ފިލްމު ތިއޭޓަރުތައް ބަންދުކޮށްފައިވަނީ 16 މާރިޗު 2020ގައެވެ.
ސިނަމާތަކާއި ފިލްމް ތިއޭޓަރުތައް ހުޅުވުމުގެ ހުއްދަ ދޭން ނިންމާފައިވާއިރު، "ކޮވިޑު-19 ގެ ހާލަތުގައި ރައްކާތެރިކަމާއެކު ސިނަމާ ހިންގުމާއި ސިނަމާ ހޯލްތައް ބޭނުން ކުރަންވީގޮތުގެ އުސޫލު" އަދި އެޗް.ޕީ.އޭ.އިން އާންމުކޮށްފައެއް ނުވެއެވެ.
ރާއްޖޭގައި ކޯވިޑްގެ ކޭސްތައް މަދުވާން ފެށުމާއެކު ކޯވިޑް ގައިޑްލައިންތަކަށް ދަނީ ލުއިތައް ދެމުންނެވެ. އެގޮތުން ރާއްޖޭގެ ބޯޑަރުތައް ޖުލައި މަހުގެ 15 ވަނަ ދުވަހު ހުޅުވާ ގެސްޓް ހައުސްތައް އޮޕަރޭޝަނަށް ގެނެސްފައިވާއިރު، ކަރަންޓީންވާ މުއްދަތު ވެސް ވަނީ 14 ދުވަހުން 10 ދުވަހަށް މަދުކޮށްފައެވެ. މީގެ އިތުރުން މާލޭގައި އިޢުލާންކޮށްފައިވާ ކާފިއު ވެސް މިހާރު ވަނީ އެއްކޮށް އުވައިލާފައެވެ.
