އދ. މާމިގިލީގައި ޒަމާނީ މަގުތައް ހެދުމުގެ އަމަލީ މަސައްކަތް ފަށައިފި
24 ޖެނުއަރީ 2021 | އާދީއްތަ 07:54އަމަލީ މަސައްކަތް ފަށާފައިވަނީ ޖަނަވަރީ 21ގައި
މާމިގިލި މަގުހެދުމުގެ މަސައްކަތް ވަނީ ފަށާފައި
އދ. މާމިގިލީގައި ޒަމާނީ މަގުތައް ހެދުމުގެ އަމަލީ މަސައްކަތް ފަށައިފިއެވެ.
މި މަސައްކަތް ހަވާލުކޮށްފައިވާ ރޯޑް ޑިވެލޮޕްމެންޓް ކޯޕަރޭޝަނުންވަނީ މިމަހުގެ 21 ވަނަ ދުވަހު މަގުހެދުމުގެ އަމަލީ މަސައްކަތް ފަށާފައިވާކަން ހާމަކޮށްފައެވެ. މަގުތައް ހެދުމުގެ އަމަލީ މަސައްކަތް ފަށާފައިވާއިރު، މިވަގުތު ކުރިއަށްދަނީ ސައިޑްވޯކް ކޮނެ ކޭބަލް ޖަންކްޝަން ވަޅުލައި، ހޮޅި އެޅުމުގެ މަސައްކަތްކަމަށް ރޯޑް ޑިވެލޮޕްމެންޓް ކޯޕަރޭޝަނުން މަޢުލޫމާތުދެއެވެ.
މަގުތައް ހަދަނީ ބޭނުންކުރަން ފަސޭހަ އަދި ފެންބޮޑުވުން ކުޑަވާނެގޮތަކަށް ފަރުމާކޮށްގެންނެވެ. މަގު ފަރުމާކޮށްފައިވަނީ ވާރޭވެހުމުން ބިންގަނޑަށް ފެން ހިންދޭނެގޮތަށެވެ. އަދި ބޮޑަށް ވާރޭވެހި ފެންބޮޑުވެއްޖެނަމަ ފެން ހިންދުމަށް ސްޓޯމް ވޯޓަރ ސިސްޓަމާއި، ޕަމްޕް ސްޓޭޝަން އެރަށުގައި ބަހައްޓާނެކަމަށް އާރް.ޑީ.ސީ.އިން މަޢުލޫމާތުދެއެވެ.
މިނިސްޓްރީ އޮފް ނެޝަނަލް ޕްލޭނިން، ހައުސިންގް އެންޑް އިންފްރަސްޓްރަކްޗާއިން އދ. މާމިގިލީ މަގު ހެދުމުގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަންއާ ހަވާލުކޮށްފައިވަނީ 12 މާރޗް 2020ގައެެވެ. އދ. މާމިގިލީ މަގު ހެދުމުގެ ޕްރޮޖެޓުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގްއެވެ. އަދި ރޯޑް ޑިވެލޮޕްމެންޓް ކޯޕަރޭޝަން ލިމިޓެޑްގެ ފަރާތުން ސޮއިކުރެއްވީ މެނޭޖިން ޑިރެކްޓަރ މޫސާ އަލި މަނިކުއެވެ.
މާމިގިގިލީ މައި މަގުތައް ހެދުމަށް، މި އެއްބަސްވުމުގެ ދަށުން ވަނީ ސޮއިކޮށްފައެވެ. އެގޮތުން އެރަށު ހަ މަގުގައި ތާރު އަޅައި ޒަމާނީ ފެންވަރަށް ތަރައްގީކުރަން ރޯޑް ކޯޕަރޭޝަންއަށް ދިފައިވަނީ 400 ދުވަހެއެވެ. އަދި އެ ޕްރޮޖެކްޓަށް 95 މިލިއަން ރުފިޔާ ޚަރަދުވާއިރު 4.89 ކިލޯ މީޓަރުގެ މަގު ހެދުމަށް ވަނީ ހަމަޖެހިފައެވެ. މާމިގިލީ މަގު ހެދުމުގެ މަސައްކަތް ފެށުމަށް ބޭނުންވާ ވެހިކަލްތައް އެރަށަށް ގެންގޮސްފައިވަނީ މިދިޔަ އަހަރުގެ ނޮވެމްބަރު މަހުގެ 23 ވަނަ ދުވަހުއެވެ.
ސަރުކާރުގެ މަގު ހަދާ ކުންފުނި، ރޯޑް ޑިވެލޮޕްމެންޓް ކޯޕަރޭޝަންއާ ހަވާލުކޮށްގެން ސަރުކާރުން ކުރިއަށްގެންދާ މާމިގިލި ރިންގް ރޯޑް ހެދުމުގެ މަސައްކަތަށް 2021 ވަނަ އަހަރު ބަޖެޓްގައި ވަނީ 10 މިލިއަން ރުފިޔާ ކަނޑައަޅާފައެވެ.
