ދާންދޫގައި ޕޮޒިޓިވްވި މީހުން އާންމުންނާއެކު އެއް ގެއެއްގައި ދިރިއުޅޭތީ ކައުންސިލްގެ ކަންބޮޑުވުން!
24 ޖެނުއަރީ 2021 | އާދީއްތަ 08:24އެ ގެތަކުގައި ދިރިއުޅޭ އެހެން މީހުން ވެސް ވަނީ ނުރައްކަލަށް ހުށަހެޅިފައި
ގއ.ދާންދޫ، ކޮވިޑް-19ގެ ކޭސްތަކާއި ގުޅިގެން އެރަށް އޮތީ މޮނިޓަރިންގައި
ގއ. ދާންދޫގައި ކޮވިޑް-19ށް ޕޮޒިޓިވްވެފައިވާ މީހުން ވަކި ފެސިލިޓީތަކަށް ނުވަތަ އެކަހެރި ނުކުރާތީ ކައުންސިލުން ކަންބޮޑުވުން ފާޅުކޮށްފިއެވެ.
ދާންދޫގެ އާއްމު ހާލަތާބެހޭ ގޮތުން ރާއްޖެއެމްވީއަށް މަޢުލޫމާތު ދެއްވަމުން އެރަށުގެ ކައުންސިލްގެ ރައީސް އިސްމާއީލް މުހައްމަދު ވިދާޅުވީ ގއ. ދެއްވަދޫ ކްލަސްޓަރއާ ގުޅިގެން ދާންދޫއިން 14 މީހަކު ޕޮޒިޓިވްވި ކަމަށެވެ.
އިސްމާއީލް ވިދާޅުވީ ޕޮޒިޓިވްވި މީހުން ދިރިއުޅެމުންދަނީ އެމީހުންގެ އަމިއްލަ ގެތަކުގައި ކަމަށްވާތީ އެގެތަކުގައި ދިރިއުޅޭ އެހެން މީހުން ނުރައްކަލަށް ހުށަހެޅިގެންދާ ކަމަށެވެ. ބައެއް އާއިލާތައް ދިރިއުޅެމުންދަނީ ވަރަށް ހާލުގައި ކަމަށް އޭނާ ވިދާޅުވިއެވެ. އަދި މިހާރުގެ ހާލަތުން ކައުންސިލުން ޕޮޒިޓިވްވާ މީހުންނަށް ވަކިން ދިރިއުޅެވޭނެ ގޮތް ހަމަޖައްސައިދިނުމަށް ބަޖެޓް ނެތްކަން ފާހަގަކުރެއްވިއެވެ.
ކޭސްތަކަށް އަލިއަޅުއްވާލައްވައި އިސްމާއީލް ވިދާޅުވީ ގިނައިން ޕޮޒިޓިވްވެފައިވަނީ ކުޑަ ކުދިން ކަމަށެވެ. އަދި ހައި ރިސްކް މީހުން ވިލިނގިލީ ކޮވިޑް ފެސިލިޓީއަށް ގެންދެވި ފަރުވާ ދެމުންދާ ކަމަށް އޭނާ ވިދާޅުވިއެވެ.
އިސްމާއީލް ވިދާޅުވީ މިހާރު ވެސް ރެމްޑަމް ސާމްޕަލްތައް ނެގުމުގެ މަސައްކަތްތައް ކުރަމުންދާ ކަމަށެވެ. އެގޮތުން މިހާތަނަށް 113 ސާމްޕަލްތައް ނަގާފައިވާކަން ފާހަގަކުރެއްވިއެވެ. އެރަށުގައި 66 ގެ ކަރަންޓީންއަށް ލާފައިވާއިރު، 275 ކަރަންޓީންގައި އެބަތިއްބެވެ.
މީގެ އިތުރުން އިސްމާއީލް ވިދާޅުވީ ކާޑުގެ ބާވަތްތައް ހުސްނުވާ ކަމަށާއި، ކެއުންބުއިމާއި، ބޭނުންވާ ބޭސް އަދިވެސް ދިިރިއުޅުމަށް ބޭނުންވާ އެހެނިހެން އާލަތްތައް ލިބޭ ކަމަށާއި، އެކަމުގައި އެއްވެސް ކަހަލަ ދަތިކަމެއް ނެތް ކަމަށެވެ.
ދާންދޫގެ އާބާދީއަކީ 2084 މީހުންނެވެ. އެއީ 1039 އަންހެނުންނާއި 1045 ފިރިހެނުންނެވެ. މީގެ ތެރެއިން 1103 މީހުން ދިރިއުޅެނީ ރަށުން ބޭރުގައި ކަމަށް އެރަށުގެ ކައުންސިލުން ބުނެއެވެ.
