ފިނޮޅުގެ މައްސަލައިގައި އެންމެ ހަރުކަށި ފިޔަވަޅު އަޅައިދީ: ހިންމަފުށި ކައުންސިލް
ރިޕޯޓް ލިބުމާއެކު ފުލުހުން ވަނީ އެ ސަރަޙައްދަށް ގޮސް އެކަން ހުއްޓުވާފައި
ހިންމަފުށި ކައިރީގައި އޮންނަ ފިނޮޅުގެ ވެލިގަނޑަށް ގެއްލުންތަކެއްދީފައި
ކ. ހިންމަފުށި ކައިރީގައި އޮންނަ ފިނޮޅަކަށް ގިލިލަންކަންފުށީގެ ޖެނެރަލް މެނޭޖަރު ޑޭވިޑް ސްޓެޕޮޓިކްއާއި އެހެން މުވައްޒަފުންތަކެއް އަރައި އެ ފިނޮޅުގައި ކޯރު ކެނޑި މައްސަލައިގައި އެކަން ކުރި ފަރާތްތަކާ ދެކޮޅަށް އެޅޭނެ އެންމެ ހަރުކަށި ފިޔަވަޅު އަޅައިދެއްވުމަށް އެ ރަށު ކައުންސިލުން ސަރުކާރަށް ގޮވާލައިފިއެވެ.
ހިންމަފުށި ކައިރީގައި އޮންނަ ފިނޮޅަށް އަރާ އެ ފިނޮޅުގައި ކޯރު ކެނޑި މައްސަލަ ފެންމަތިވެފައި ވަނީ މިދިޔަ ބުރާސްފަތި ދުވަހުގެ ރޭގަނޑުގެ ވަގުތެއްގައެވެ. އެކަމާ ގުޅިގެން ތިމާވެށި ހިމާޔަތްކުރުމަށް މަސައްކަތްކުރާ އެތައް ޖަމްޢިއްޔާއަކުންނާއި އާންމު ރައްޔިތުން ވަނީ އެކަން ކުށްވެރިކޮށް، އެކަން ކުރި ފަރާތްތަކާ ދެކޮޅަށް ފިޔަވަޅު އެޅުމަށް ސަރުކާރަށް ގޮވައިލާފައެވެ.
މިކަން ކުށްވެރިކޮށް ހިންމަފުށި ކައުންސިލުން ހޮނިހިރު ދުވަހުގެރޭ ނެރުނު ނޫސް ބަޔާނެއްގައި ބުނެފައި ވަނީ ގިލިލަންކަންފުށިން އެ ފިނޮޅުގައި ކޯރު ކަނޑާފައި ވަނީ ކައުންސިލުގެ އެއްވެސް ބަހެއް ނެތި އެއްވެސް ދައުރެއް ނެތި ކަމަށެވެ. އަދި އެ ރިސޯޓުގެ ނިޔަތަކީ އެ ފިނޮޅު ނައްތާލުން ކަމަށާއި އެހެންކަމުން، އެ ފިނޮޅު ނައްތާލަން އުޅުމުގައި ޝާމިލުވާ އެންމެހާ ފަރާތްތަކަށް ގާނޫނުގައިވާ ހަރުކަށި ފިޔަވަޅު އަޅައި، ރައްޔިތުންނަށް އިންސާފުވެރި ބަދަލެއް ހޯދައިދިނުމަށް ހިންމަފުށީ ކައުންސިލުން ވަނީ ދައުލަތުގެ ކަމާބެހޭ ފަރާތްތަކުގެ ކިބައިން އެދިލައްވާފައެވެ.
މި ނޫސް ބަޔާނުގައި އިތުރަށް ބުނެފައި ވަނީ، އެ ރަށާ އިންވެގެން އޮންނަ ފިނޮޅަކީ ރައްޔިތުންގެ ހިތްހަމަޖެހުމާއި ބޭނުންތަކަށް އޮންނަ ތަނެއް ކަމަށް ދެކި އެކަން އެގޮތުގައި ދަމަހައްޓާނެ ކަމުގެ ޔަގީންކަން ހުރިހާ ރައްޔިތުންނަށް ދޭ ކަމަށެވެ. އަދި ރައްޔިތުން ކެތްތެރިވެ ތިބުމަށާއި މަސްލަހަތު ގެއްލޭ ކަމެއް ނުކުރުމަށް ކައުންސިލުން ވަނީ އެދިފައެވެ.
ގިލިލަންކަންފުށިން ފިނޮޅުގައި ކޯރު ކެނޑި ސަބަބެއް އަދި މިހާތަނަށް ވަނީ ސާފުވާގޮތް ނުވެފައެވެ. ފިނޮޅު ނައްތާލަން އުޅުނު މައްސަލަ އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އާއި ފުލުހުން ވެސް މިހާރު ދަނީ ތަހުގީގު ކުރަމުންނެވެ.
