ރިސޯޓްތަކުގައި މަސައްކަތް ކުރަމުންދާ ޒުވާނުންނަށް ވަޒީފާގައި ތިބެގެން ވެސް ކިޔެވުމުގެ ފުރުސަތު!
21 ޖެނުއަރީ 2021 | ބުރާސްފަތި 08:53އެ ދަރިވަރަކު ހުރި ރަށެއްގައި ހުރެގެން، ޓިވެޓް އޮތޯރިޓީގެ ނޭޝަނަލް ސެޓްފިކެޓް-3 އާ ހަމައަށް ކިޔެވޭނެ
ރިސޯޓެއްގެ މުއައްޒަފެއް، މިޕްރޮގްރާމްތަކުގައި ބައިވެރިވުމުން މިސިނާޢަތުން ކުރިއަށް ދިއުމަށް ގިނަ ފުރުސަތުތައް ލިބިގެންދާނެ
ރިސޯޓްތަކުގައި މަސައްކަތް ކުރަމުންދާ ޒުވާނުންނަށް ވަޒީފާގައި ތިބެގެން ވެސް ކިޔެވުމުގެ ފުރުސަތު މޯލްޑިވްސް އިންސްޓިއުޓް އޮފް ޓެކްނޮލޮޖީން (އެމްއައިޓީ) އިން ފަހިކޮށްދީފިއެވެ.
ފަތުރުވެރިކަމުގެ ދާއިރާއަށް ދިވެހި ޒުވާނުން އަހުލުވެރިކޮށް މި ދާއިރާގެ ފަންނީ ތަފާތު މަސައްކަތް ދަސްކޮށްދިނުމަށް އެމްއައިޓީއިން، 20 ޖެނުއަރީ 2021 ވަނަ ދުވަހު ވަނީ ވަރަށް ޚާއްސަ ޕްރޮގްރާމެއް ފަށައިފިއެވެ.
އެމްއައިޓީން ބުނީ މިޕްރޮގްރާމްގެ ތެރެއިން ފަތުރުވެރިކަމުގެ ސިނާޢަތުގެ 10 ދާއިރާއެއް ފާހަގަކޮށް އެ ދާއިރާތަކުން ކިޔެވުމުގެ ފުރުސަތު ހުޅުވާލާފައިވާ ކަމަށެވެ. މިއީ އެ ދަރިވަރަކު ހުރި ރަށެއްގައި ހުރެގެން، ޓިވެޓް އޮތޯރިޓީގެ ނޭޝަނަލް ސެޓްފިކެޓް-3 އާ ހަމައަށް ކިޔެވޭނެ މަގު ފަހިވެފައިވާ ޕުރޮގްރާމެއް ކަމަށް އެ އިންސްޓިއުޓުން ބުނެއެވެ.
މި ތަޢާރަފު ކުރި ކޯސްތަކުގައި ބައިވެރިވުމަށް އެމްއައިޓީގެ ވެބްސައިޓް މެދުވެރިކޮށް ދަރިވަރުންނަށް ރެޖިސްޓަރީ ވެވޭނެއެވެ. އަދި މި ޕްރޮގްރާމްގެ ކޯހަކަށް ދަރިވަރު ރަޖިސްޓްރީވުމާއެކު، ކިޔެވުމަށް ބޭނުންވާ ހުރިހާ ޚިދުމަތެއް އެމްއައިޓީ ލާރނިންގް މެނޭޖްމަންޓް ސިސްޓަމް މެދުވެރިކޮށް ދަރިވަރުންނަށް ލިބޭނެއެވެ.
މީގެތެރޭގައި ކޯހުގެ ތިޔަރީ ފިލާވަޅުތަކާއި ޕްރެކްޓިކަލް ދަސްކުރަން އެހީވެދޭނެ ވީޑިޔޯއާއި ފިލާވަޅު ތަކުގެ ޕަވަރ ޕޮއިންޓް ޕްރެސެންޓޭޝަން އާއި އޮންލައިން ޓެސްޓާއި އެނޫނަސް ކިޔެވުމަށް ބޭނުންވާ މަޢުލޫމާތާއި ވަސީލަތްތައް ހިމެނެއެވެ. އެމްއައިޓީން ބުނީ މިފަދަ ފަންނީ ކޯހެއް ފުރިހަމަކުރަން ފުރުސަތު ލިބިފައި ނެތް އެތައް ދަރިވަރަކަށް، މި ޕްރޮގްރާމްތަކުގެ ސަބަބުން ފަސޭހަކަމާއެކު ކިޔެވުމުގެ ފުރުސަތު ހޯދޭނެ ކަމަށެވެ.
އެމްއައިޓީން ބުނީ މި ޕްރޮގްރާމްގެ ސަބަބުން ރިސޯޓްތަކުގައި މަސައްކަތްކުރަމުން އަންނަ އުންމީދީ ޒުވާނުންނަށް މިހާރު އެ އަދާކުރަމުންދާ ވަޒީފާގައި ތިބެގެން ވެސް ކިޔެވޭނެ ކަމަށެވެ. އެހެން ރަށްރަށަށް ނުގޮސް އަމިއްލަ ރަށުގައި ތިބެގެން، ޓިވެޓް ކޯސްތައް ފުރިހަމަކުރުމުގެ ފުރުސަތު ވެސް މި ޕުރޮގްރާމްގެ ސަބަބުން އެ ރަށްރަށުގެ ރައްޔިތުންނަށް ހުޅުވިފައިވާ ކަމަށް ވެސް އެމްއައިޓީން ބުނެއެވެ.
އެމްއައިޓީން މި ތަޢާރަފްކުރި ޕުރޮގްރާމްގައި ހިމެނޭ ކޯސް ފުރިހަމަކުރާ ދަރިވަރުންނަށް ލިބޭ ސަނަދަކީ، ޓިވެޓް އޮތޯރިޓީއިން ވެސް އަދި މޯލްޑިވްސް ކޮލިފިކޭޝަން އޮތޯރިޓީއިން ވެސް ގަބޫލުކުރާ ގައުމީ ސަނަދުގެ އޮނިގަނޑުގައި ހިމެނޭ ސެޓުފިކެޓެކެވެ.
