އޯގްސްބާގް ބަލިކޮށް ބަޔާނުން ލީޑު ދަމަހައްޓައިފި

ޖަރުމަން ލީގުގައި ބުދަ ދުވަހުގެރޭ ކުޅުނު މެޗުން އޯގްސްބާގް ބަލިކޮށް އެންމެ ފަހުގެ ޗެމްޕިއަން ބަޔާން މިއުނިކުން އެއްވަނައިގައި ހަތަރު ޕޮއިންޓުގެ ލީޑު ދަމަހައްޓައިފިއެވެ.

ރަށުން ބޭރުގައި ކުޅުނު މެޗުން ބަޔާން މޮޅުވީ 1-0 ގެ ނަތީޖާއަކުންނެވެ.

މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 13 ވަނަ މިނެޓުގައި ލިބުނު ޕެނަލްޓީއަކުން ބަޔާނަށް ކާމިޔާބުކޮށްދިނީ އިތުބާރު ފޯވާޑް ރޮބަޓް ލެވަންޑޯސްކީއެވެ. މިއީ އެންމެ ފަހުން ކުޅުނު 11 މެޗުގައި އުމުރުން 32 އަހަރުގެ ފޯވާޑް ކާމިޔާބުކުރި 12 ވަނަ ލަނޑެވެ. އަދި މިއީ މި ސީޒަނުގެ ޖަރުމަން ލީގުގައި ލެވަންޑޯސްކީ ކާމިޔާބުކުރި 22 ވަނަ ލަނޑެވެ.

މި މެޗުގެ ކުރީކޮޅު ބަޔާނުން ލީޑު ނެގި ނަމަވެސް، ދެވަނަ ހާފުގައި އެ ޓީމުގެ ފަރާތުން ފެނިގެންދިޔައީ އާދައިގެ ކުޅުމެކެވެ. އެއާއެކު އޯގްސްބާގުން މި ހާފުގައި ރަނގަޅު ކުޅުމެއް ދެއްކިއިރު، މެޗުގެ 76 ވަނަ މިނެޓުގައި އެ ޓީމަށް ވަނީ ޕެނަލްޓީއެއްވެސް ލިބިފައެވެ. އެކަމަކު އެ ޓީމުގެ އަލްފްރެޑް ފިންބޮގަސަން ފޮނުވާލި ޕެނަލްޓީ އަމާޒުވީ ގޯލުގެ ދަނޑިއަށެވެ.

މި މޮޅާއެކު ބަޔާން އެއްވަނައިގައި އޮތީ ކުޅުނު 17 މެޗުން ލިބުނު 39 ޕޮއިންޓާއެކުއެވެ. ދެވަނައިގައި އޮތް އާރްބީ ލެއިޕްޒީގަށް 17 މެޗުން ލިބިފައިވަނީ 35 ޕޮއިންޓެވެ. އަދި ބުދަ ދުވަހުގެރޭ ބަޔާން އަތުން ބަލިވި އޯގްސްބާގް އޮތީ ތާވަލުގެ 12 ވަނައިގައި 17 މެޗުން 19 ޕޮއިންޓާއެކުއެވެ.