ތިން މީހަކަށް އައިސީޔޫގައި ފަރުވާ ދެމުންދާއިރު އެކަކު ވެންޓިލޭޓަރުގައި!
21 ޖެނުއަރީ 2021 | ބުރާސްފަތި 04:25ހުޅުމާލެ މެޑިކަލް ފެސިލިޓީގައި 64 މީހަކު އެޑްމިޓްކޮށްފައިވޭ
ދަރުމަވަންތަ ހޮސްޕިޓަލް، ކޭސްތައް ދަނީ އިތުރުވަމުން
ކޮވިޑް-19ށް ޕޮޒިޓިވްވެ ފަރުވާ ހޯދަމުންދާ މީހުންގެ ތެރެއިން ތިން މީހަކަށް އައިސީޔޫގައި ފަރުވާ ދެމުންދާ ކަމަށާއި، އެކަކަށް ފަރުވާ ދެމުންދަނީ ވެންޓިލޭޓަރުގައި ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ދަރުމަވަންތަ ހޮސްޕިޓަލުގައި 11 ވަނަ ފަންގިފިލާގެ އައިސީޔޫގައި ތިން މީހަކަށް ފަރުވާ ދެމުންދާ ކަމަށާއި، އެކަކަށް ފަރުވާ ދެމުންދަނީ ވެންޓިލޭޓަރުގައި ކަމަށެވެ.
ޑރ.ނަޒްލާ ވިދާޅުވީ ދަރުމަންވަންތަ ހޮސްޕިޓަލްގެ 16 ވަނަ ފަންގިފިލާގެ ވޯޑުގައި ދެމީހަކަށް ފަރުވާ ދެމުންދާއިރު، ހުޅުމާލެ މެޑިކަލް ފެސިލިޓީގެ ވޯޑުގައި 64 މީހަކު އެޑްމިޓްކޮށް ފަރުވާ ދެމުންދާ ކަމަށެވެ. އަދި އަތޮޅުތެރޭގެ ކޮވިޑް ފެސިލިޓީތަކުގެ ތެރެއިން ގއ. ވިލިނގިލި ކޮވިޑް ފެސިލިޓީގައި ހަތް މީހުން އަދި ލ. ގަން ކޮވިޑް ފެސިލިޓީގައި ތިން މީހުންނަށް ފަރުވާ ދެމުންދާ ކަމަށް ޑރ. ނަޒްލާ ވިދާޅުވިއެވެ.
އެހެންކަމުން މިވަގުތު ރާއްޖޭގައި އެޑްމިޓްކޮށްގެން ފަރުވާ ދެމުންދާ މީހުންގެ ޖުމްލަ އަދަދަކީ 79 މީހުން ކަމަށް ޑރ. ނަޒްލާ ވިދާޅުވިއެވެ.
ވޭތުވެދިޔަ 24 ގަޑިއިރުގެ ތެރޭގައި ފްލޫ ސާމްޕަލްތަކަށް ބަލާއިރު 162 ސާމްޕަލެއް ރާއްޖޭގެ އެކި ހިސާބުތަކުން ނެގިފައިފައިވާކަން ވެސް ޑރ. ނަޒްލާ ފާހަގަކުރެއްވިއެވެ.
އެޗް.ޕީ.އޭއި.ން އާންމުކުރި ތަފާސްހިސާބުތަކުގައިވާގޮތުން 79 މީހުން ޕޮޒިޓިވްވެފައި ވަނީ ނެގި 3،428 ސާމްޕަލްގެ ތެރެއިންނެވެ. އޭގެ ތެރެއިން 36 މީހުންނަކީ މާލެ ސަރަހައްދުން ފެނިފައިވާ ކޭސްތަކެވެ. އަދި 35 ކޭސް ފެނިފައި ވަނީ ރިސޯޓުތަކުންނެވެ. މީގެ އިތުރަށް އަތޮޅުތެރެއިން ފެނުނު ހަ ކޭސްއެއްވެސް ހިމެނެ އެވެ. މިއާއެކު ޕޮޒިޓިވް ކޭސްތަކުގެ ޖުމްލަ އަދަދު 14،712ށް އަރާފައެވެ.
މިހާތަނަށް 13،639 މީހުން މި ބަލިން ފަސޭހަވެފައިވާއިރު ރާއްޖެއިން މި ބަލީގައި މިހާތަނަށް 49 މީހަކު ވަނީ މަރުވެފަ އެވެ.
ރާއްޖެއިން ކޮވިޑް-19 ގެ ކޭސްތައް ރިޕޯޓުކުރާ ވަރު މަދުވެފައިވާތާ ގާތްގަނޑަކަށް ދޮޅުމަހެއްހާ ދުވަސް ފަހުން އަނެއްކާވެސް ކޭސްތަކުގެ އަދަދު ވަނީ އިތުރުވާން ފަށާފައެވެ. އެގޮތުން ދުވާލެއްގެ މައްޗަށް ރިޕޯޓުކުރާ ކޭސްތަކުގެ އަދަދު 50 އިން މަތީގައި އުޅޭތާ ވެސް މިހާރު ވަނީ ހަފްތާއެއް ވެފައެވެ. މި ކޭސްތަކުގެ ތެރޭގައި އާންމުކޮށް ގިނައިން ފެންނަނީ ރިސޯޓުތަކާއި މާލެ ސަރަހައްދުން ރިޕޯޓުކުރާ ކޭސްތަކެވެ.
