ހޯރަފުށީ ގިރާ ސަރަޙައްދު ހިމާޔަތްކުރުމަށް އެމްޓީސީސީއާ ހަވާލުކޮށްފި

ހއ ހޯރަފުށީގެ ގިރާ ސަރަޙައްދު ޙިމާޔަތްކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއި ހަވާލުކޮށްފިއެވެ.

ޕްލޭނިންގ މިނިސްޓްރީގެ ފަރާތުން އެމްޓީސީސީއާ ހަވާލުކުރި މި މަސައްކަތަކީ ޑިޒައިން އެންޑް ބިލްޑް އުސޫލުން ހެދުމަށް ހަވާލުކޮށްފައިވާ މަޝްރޫއެކެވެ. މި މަޝްރޫޢުގައި ހިމެނެނީ ހޯރަފުށީގެ ގިރާ ސަރަޙައްދު ޙިމާޔަތްކުރުމަށް (ގްރޯއިންސް) ނުވަތަ މޫދު ތެރެއަށް ހުރަހަށް ހަދާ ތޮށިލުމުގެ މަސައްކަތެކެވެ. މީގެ ތެރޭގައި ހިމެނެނީ 50 މީޓަރުގެ 5 ތޮށްޓާއި 30 މީޓަރުގެ އެއް ތޮށި ގާއިމުކުރުމުގެ މަސައްކަތެކެވެ.

ހޯރަފުށީ ގިރާ ސަރަޙައްދު ޙިމާޔަތްކުރުމުގެ މަސައްކަތަކީ ސަރުކާރުން 6.34 މިލިއަން ރުފިޔާ ޚަރަދުކޮށްގެން ކުރިއަށްގެންދަން ނިންމާފައިވާ މަޝްރޫޢުއެކެވެ. މި މަސައްކަތުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ އެމިނިސްޓްރީގެ ޑިރެކްޓަރ ޖެނެރަލް ޝަނާ ފާރޫޤެވެ. އަދި އެމްޓީސީސީގެ ފަރާތުން ސޮއިކުރެއްވީ އެކުންފުނީގެ ސީއީއޯ އާދަމް އާޒިމެވެ. މި މަސައްކަތް އެމްޓީސީއާ ޙަވާލުކޮށްފައިވަނީ 75 ދުވަހުން ނިންމާ ގޮތަށެވެ.

ހޯރަފުއްޓަކީ އަބަދުވެސް ރަށްގިރުމުގެ މައްސަލަ ކުރިމަތިވާ ރަށަކަށްވާއިރު، މި މައްސަލައަށް ހައްލު ގެނައުމަށް 2016 ވަނަ އަހަރުވެސް ވަނީ ގޮނޑުދޮށް ހިމާޔަތްކުރުމުގެ މަޝްރޫއުއެއް ކުރިއަށް ގެންގޮސްފައެވެ. މި މަޝްރޫއުގައި އެރަށުގެ ދެ ސަރަހައްދެއްގައި ބޮޑުހިލަ ޖަހައިގެން 800 މީޓަރުގެ ސަރަޙައްދު ހިމާޔަތްކުރިއެވެ. އަދި ރަށުގެ އުތުރުފަރާތުގައި 570 މީޓަރުގެ ސަރަޙައްދެއް އަދި އިރުދެކުނު ފަރާތުގައި 230 މީޓަރުގެ ބޮޑުހިލައިގެ ރިވެޓްމަންޓެއް ޖަހާފައިވެއެވެ. ނަމަވެސް މިހާތަނަށް އެކަމުގައި އެންމެ އެކަށީގެންވާ ހައްލެއް ލިބިފައިނުވާކަން ފާހަގަކޮށްލެވެއެވެ.