އިންޑިއާގެ އެހީ ހެލްތު މިނިސްޓަރ ސިފަކުރެއްވީ އިޤުތިޞާދީ ރިކަވަރީގެ ފެށުމުގެ ގޮތުގައި

ރާއްޖޭގެ އާބާދީއަށް ވެކްސިން ފޯރުކޮށްދިނުމަށް އިންޑިއާއިން ވަމުންގެންދާ އެހީތެރިކަމަކީ ރާއްޖޭގެ އިޤުތިޞާދީ ރިކަވަރީގެ ފެށުމުގެ ގޮތުގައި ހެލްތު މިނިސްޓަރ އަޙްމަދު ނަސީމް ސިފަކުރައްވައިފިއެވެ.

އިންޑިއާއިން ރާއްޖެއަށް ފޯރުކޮށްދޭ ވެކްސިން ހަވާލު ކުރުމަށް ބުދަ ދުވަހު ވެލާނާ އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ނަސީމް ވަނީ އިންޑިއާއިން ރާއްޖެއާ މެދު ބަހައްޓާ ގާތްކަން ފާހަގަކުރައްވައި، އެކަމަށްޓަކައި އިންޑިއާ ސަރުކާރަށް ޝުކުރުއަދާކުރައްވާފައެވެ. މިނިސްޓަރ ވިދާޅުވީ ރާއްޖެވެސް ކޮވިޑުގެ ބިރުވެރިކަން ތަޙައްމަލު ކުރަމުންދާއިރު، އިންޑިއާއިން މިހާތަނަށް ހަމައެކަނި މާލީ އެހީގެ ގޮތުގައިވެސް 250 މިލިޔަން އެމެރިކާ ޑޮލަރުގެ އެހީ ދީފައިވާ ކަމަށެވެ. އަދި އޭގެ އިތުރުންވެސް ބޭހާއި، އިންސާނީ ވަސީލަތްތައް ފޯރުކޮށްދީފައިވާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ އިންޑިއާގެ ކޮވިޑް ވެކްސިނާއެކު، ރާއްޖެއަށް އުންމީދުތަކެއްވެސް ލިބިގެން ގޮސްފައިވާ ކަމަށެވެ. އަދި މިއީ ދިވެހި ރައްޔިތުން ކޮވިޑުގެ ވަބާއިން ސަލާމަތް ކުރުމަށް އެޅުނު މުހިންމު ފިޔަވަޅެއްގެ ގޮތުގައި މިނިސްޓަރ ވަނީ ސިފަކުރައްވާފައެވެ. އެގޮތުން މި ފިޔަވަޅާއެކު ރާއްޖެ ވެއްޓިފައިވާ އިޤުތިޞާދީ އަނދަވަޅުން އަރައިގަތުމުގެ ބުރަ މަސައްކަތްވެސް ފުޅާވެގެން ދާނެކަން މިނިސްޓަރ ފާހަގަކުރެއްވިއެވެ.

މިނިސްޓަރުގެ ވާހަކައިގައި ވަނީ އިންޑިއާ ސަރުކާރަށް ޝުކުރު ދަންނަވައި، ރާއްޖެއިން ކޮވިޑާ ގުޅިގެން އަޅާފައިވާ ފިޔަވަޅުތައްވެސް ފާހަގަކުރައްވާފައެވެ. އަދި އިންޑިއާއިން ގެންގުޅޭ "ނެއިބަރހުޑް ފަރސްޓް ޕޮލިސީ" ފާހަގަކުރައްވައި، މިނިސްޓަރ ވަނީ އެކަމަށްވެސް ތަޢުރީފު ކުރައްވާފައެވެ.

އިންޑިއާގެ ކޮވިޝީލްޑް ވެކްސިންގެ އެއް ލައްކަ ޑޯޒް ހިފައިގެން ރާއްޖެއައި އެއަރ އިންޑިއާގެ ފްލައިޓް ވެލާނާ އިންޓަރނޭޝަނަލް އެއަރޕޯޓުގައި ޖައްސާފައިވަނީ ބުދަ ދުވަހުގެ މެންދުރުފަހު 14:42 ހާއިރުއެވެ. އެއާއެކު ރާއްޖޭގައި މި ވެކްސިން ރަޖިސްޓަރކޮށް ބޭނުންކުރުމަށްޓަކައި ބަލަންޖެހޭ ކަންކަމާއި، ވާން ޖެހޭ ތައްޔާރީތައްވެސް ވަނީ ފަށާފައެވެ.