އޮޕަރޭޓުކުރާ ގެސްޓްހައުސްތަކުގެ އަދަދު 300ށް އަރައިފި
ގެސްޓްހައުސްތަކުގައި ފެތުރުވެރިންނަށް ޚިދުމަތް ދިނުމަށް 5,698 އެނދު ދަނީ އޮޕަރޭޓުކުރަމުން
ކ. މާފުށީގައި ހިންގަމުން އަންނަ ގެސްޓްހައުސެއް
ރާއްޖޭގައި އޮޕަރޭޓުކުރާ ގެސްޓްހައުސްތަކުގެ އަދަދު 300ށް އަރާފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން ރާއްޖޭގެ 15 އަތޮޅެއްގެ 47 ރަށެއްގައި ގެސްޓްހައުސްތައް މިހާރު ވަނީ އޮޕަރޭޓުކުރަން ފަށާފައިއެވެ.
މިހާރު ހުޅުވާފައިވާ ގެސްޓްހައުސްތަކުގައި ފެތުރުވެރިންނަށް ހިދުމަތް ދިނުމަށް 5,698 އެނދު ދަނީ އޮޕަރޭޓުކުރަމުންނެވެ.
އަދި ފަތުރުވެރިންނަށް ޚިދުމަތްދިނުމަށް މުޅި ޖުމްލަ 586 ޓޫރިސްޓު ފެސިލިޓީގައި 42,662 އެނދު ދަނީ މިހާރު އޮޕަރޭޓުކުރަމުންނެވެ. އެއީ 300 ގެސްޓްހައުސްގައި އޮޕަރޭޓްކުރާ 5,698 އެނދުގެ އިތުރުން، 142 ރިސޯޓެއްގައި 32,930 އެނދު، 133 ސަފާރީއެއްގައި 2,576 އެނދު އަދި 11 ހޮޓެލްގައި 1,458 އެނދެވެ.
ޖެނުއަރީ މަހުގެ 18 ވަނަ ދުވަހާ ހަމައަށް 52,941 ފަތުރުވެރިން ރާއްޖެއަށް އައިސްފައިވާއިރު، އެންމެ ގިނަ އަދަދެއްގެ ފަތުރުވެރިން އައިސްފައި ވަނީ ރަޝިއާއިންނެވެ. މީގެ އިތުރުން ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ތެރޭގައި އިންޑިއާ، ޔޫކްރެއިން، ކަޒަކަސްތާން އަދި ރޯމާނިއާ އާއި ފްރާންސްގެ އިތުރުން ޖަރމަނީ އަދި ޔޫކޭ ހިމެނެއެވެ. އަދި މި ލިސްޓުުގައި އެމެރިކާ އަދި ސްވިޒަލޭންޑުވެސް ހިމެނެއެވެ.
