އިލެކްޝަންސް ކޮމިޝަނުން ގެނެސްފައިވާ ބަދަލުތަކާއެކު ބިލު ފާސްކުރުމަކީ މުހިއްމުކަމެއް
މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒު؛ އޭނާ ވަނީ އިންތިހާބު އަވަހަށް ބޭއްވުމަށް ގޮވާލާފައި
ލޯކަލް ކައުންސިލްތަކުގެ އިންތިޚާބުގެ 2020ގެ ޚާއްޞަ ޤާނޫނަށް ހުށަހަޅާފައިވާ އިޞްލާޙާއެކު އިންތިޚާބު ބާއްވަން ހުރި ގާނޫނީ ހުރަސްތައް ނައްތާލެވިފައިވީ ނަމަވެސް، އިންތިޚާބު ބޭއްވޭނީ އެންމެންގެ އެއްބާރުލުން މިކަމުގައި ލިބިގެން ކަމަށް ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވި ހުޅުމާލެ ދާއިރާގެ މެންބަރު އަލީ ނިޔާޒު ވިދާޅުވެއްޖެއެވެ.
މަޖިލީހުގެ ދައުރުން ބޭރުން ބޭއްވި 3 ވަނަ ޖަލްސާގައި ވާހަކަ ދައްކަވަމުން ނިޔާޒު ވިދާޅުވީ އިލެކްޝަންސް ކޮމިޝަނުން ގެނެސްފައިވާ ބަދަލުތަކާއެކު ބިލު ފާސްކުރުމަކީ މުހިއްމުކަމެއް ކަމަށެވެ. އަދި އެގޮތަށް ފާސްކުރުމުން ކައުންސިލް އިންތިޚާބު ބޭއްވުމަށްޓަކައި ޤާނޫނީ ގޮތުން ހުރި ހުރަސްތައް ނެތިގެންދާނެކަމަށް ޤަބޫލުކުރައްވާ ކަމަށެވެ. އެހެންނަމަވެސް ޤާނޫނީ ގޮތުން ހުރަސްތައް ނައްތާލުމަކުން އިންތިޚާބު ބޭއްވޭނެ ހުރިހާ ގޮތެއް ނުވާނެ ކަމަށާއި، މިކަމުގައި އެހެން ހުރިހާ ފަރާތްތަކެއްގެ ވެސް އެއްބާރުލުން ބޭނުންވާނެ ކަމަށެވެ.
ނިޔާޒު ވިދާޅުވީ ޕެންޑަމިކްގެ ހާލަތަކީ އިންތިޚާބު ނުބޭއްވޭނެ ހާލަތެއްގެ ގޮތުގައި މާނަކޮށް އިންތިޚާބު ނުބޭއްވޭނެކަމަށް ދެކުމަކީ ރަނގަޅުކަމެއް ނޫން ކަމަށެވެ. އަދި އެންމެންގެ އެއްބާރުލުމާއެކު މިކަން ކުރެވޭނެ ކަމަށެވެ.
ނިޔާޒު ވިދާޅުވީ މިކަންކަން އެންމެން ވެސް ޤަބޫލުކޮށްގެން އިންތިޚާބުގައި ވޯޓުލާން ނުކުމެ ގޮތް ނިންމޭނެ ކަމަށެވެ. އަދި އޭނާ ދެކެވަޑައިގަންނަވާ ގޮތުގައި މިހާރު މި އޮތް އިޞްލާޙުން ޤާނޫނީ ހުރިހާ ހުރަސްތަކެއް ނެތިގެން ދާނެ ކަމަށެވެ. އަދި ސަރުކާރާއި އެމްޑީޕީން ވެސް އެދެނީ މި އިންތިޚާބު ވީހާ ވެސް އަވަހަކަށް ބޭއްވުން ކަމަށް ނިޔާޒު ވިދާޅުވިއެވެ.
