އިޓާލިއަން ލީގުގެ އެންމެ ފަހުގެ ޗެމްޕިއަން ޔުވެންޓަސް ބަލިކޮށް، އިންޓަ މިލާނުން ތާވަލުގެ އެއްވަނައިގައި އޮތް އޭސީ މިލާނާ ޕޮއިންޓުގެ ގޮތުން އެއްވަރުކޮށްފިއެވެ.

ލީގުގައި އާދީއްތަ ދުވަހުގެރޭ ކުޅުނު މެޗުން އިންޓަ މޮޅުވީ 2-0 ގެ ނަތީޖާއަކުންނެވެ.

އަމިއްލަ ދަނޑުގައި ކުޅުނު މި މެޗުގައި އިންޓައިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. އެގޮތުން މެޗުގެ 12 ވަނަ މިނެޓުގައި ނިކޯލޯ ބަރޭލާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު އާޓޫރޯ ވިޑާލެވެ. މިއީ މި ސީޒަނުގައި ބާސެލޯނާ ދޫކޮށް އިންޓައާ ގުޅުނު ވިޑާލް އިޓާލިއަން ލީގުގައި ކާމިޔާބުކުރި ފުރަތަމަ ލަނޑެވެ.

މި މެޗުގައި އިންޓައިން ގިނަ ހަމަލާތަކެއް ފޮނުވާލިއިރު، އެ ޓީމުން ލީޑު ފުޅާކޮށްފައިވަނީ ދެވަނަ ހާފު ފަށައިގެން ހަތްވަނަ މިނެޓުގައެވެ. އަލެސަންދްރޯ ބަސްޓޯނީ ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ޖަހައިދިނީ މިޑްފީލްޑަރު ބަރެއްލާއެވެ.

މި މޮޅާއެކު ތާވަލުގެ އެއްވަނައިގައި އޮތް މިލާނާ ޕޮއިންޓުގެ ގޮތުން އިންޓަ އެއްވަރުކުރީ 18 މެޗުން 40 ޕޮއިންޓް ހަމަކޮށްގެންނެވެ. މިލާނަށް 40 ޕޮއިންޓް ލިބިފައިވަނީ 17 މެޗުންނެވެ. އެހެންކަމުން ލީގުގައި ހޯމަ ދުވަހުގެރޭ ކަލިއަރީގެ މައްޗަށް ކުރިހޯދައިގެން މިލާނަށް އަލުން އެއްވަނައިގައި ތިން ޕޮއިންޓަށް ލީޑުފުޅާކުރެވޭނެއެވެ. މީގެ އިތުރުން އާދީއްތަ ދުވަހުގެރޭ އިންޓަ އަތުން ބަލިވި މިލާން އޮތީ ތާވަލުގެ ފަސްވަނައިގައި 17 މެޗުން 33 ޕޮއިންޓާއެކުއެވެ.