ލިވަޕޫލާއި ޔުނައިޓެޑް އެއްވަރު، ސިޓީ ދެވަަނައަށް

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ކުޅުނު މެޗުން އެއްވަނައިގައި އޮތް މެންޗެސްޓާ ޔުނައިޓެޑާއި އެންމެ ފަހުގެ ޗެމްޕިއަން ލިވަޕޫލް އެއްވަރުވެއްޖެއެވެ.

ލިވަޕޫލުގެ ދަނޑުގައި ކުޅުނު މި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހި 0-0 ންނެވެ.

މި މެޗުގެ ފުރަތަމަ ހާފުގައި ލިވަޕޫލުން ރަނގަޅު ކުޅުމެއް ދެއްކި ނަމަވެސް، އެ ޓީމަށް ނުރައްކާތެރި ހަމަލާއެއް އުފެއްދިފައެއް ނުވެއެވެ. އެގޮތުން މި ހާފުގައި ލިވަޕޫލުގެ ފޯވާޑް ރޮބާޓޯ ފިރްމީނޯއަށް ރަނގަޅު ދެ ފުރުސަތެއް ލިބުނު ނަމަވެސް، ގޯލާ އަމާޒުކޮށް އެ ދެ ހަމަލާވެސް ފޮނުވާލެވިފައެއް ނުވެއެވެ.

މެޗުގެ ދެވަނަ ހާފުގައި ޔުނައިޓެޑުން ކުޅުން ރަނގަޅުކުރިއިރު، މި ހާފުގައި އެ ޓީމުން ވަނީ ނުރައްކާތެރި ދެ ހަމަލާއެއް ފޮނުވާލާފައެވެ. އެގޮތުން އެ ޓީމުގެ ބްރޫނޯ ފެނާންޑޭސް އާއި ޕައުލް ޕޮގްބާ އޭރިއާ ތެރެއިން ނުރައްކާތެރި ހަމަލާތަކެއް އުފެއްދި ނަމަވެސް، އެ ދެ ހަމަލާވެސް ލިވަޕޫލުގެ ގޯލްކީޕަރު އެލިސަން ބެކާ ވަނީ ހުށިޔާރުކަމާއެކު މަތަކޮށްފައެވެ. އަދި މި ހާފުގައި ލިވަޕޫލުގެ ތިއާގޯ އަލްކަންޓާރާ އޭރިއާ ބޭރުން ފޮނުވާލި ބާރު ހަމަލާ ޔުނައިޓެޑުގެ ގޯލްކީޕަރު ޑޭވިޑް ޑެ ހެއާ ވަނީ ދިފާއުކޮށްފައެވެ.

މި މެޗުގައި ލިވަޕޫލް ބަލިކޮށްގެން ޔުނައިޓެޑަށް އެއްވަނައިގައި ލީޑުފުޅާކުރުމުގެ ފުރުސަތު އޮތް ނަމަވެސް، މެޗު އެއްވަރުވުމުން މި ވަގުތު ޔުނައިޓެޑަށް ލިބިފައި އޮތީ ދެ ޕޮއިންޓުގެ ލީޑެކެވެ. އެގޮތުން ޔުނައިޓެޑަށް ކުޅުނު 18 މެޗުން 37 ޕޮއިންޓް ލިބިފައިވާއިރު، މެންޗެސްޓާ ސިޓީ ދެވަނައިގައި އޮތީ 17 މެޗުން 35 ޕޮއިންޓާއެކުއެވެ. އަދި 18 މެޗުން 34 ޕޮއިންޓާ ލިވަޕޫލް ހަތަރުވަނައިގައި އޮތްއިރު، ތިންވަނައިގައި އޮތް ލެސްޓާ ސިޓީއަށް 18 މެޗުން ވަނީ 35 ޕޮއިންޓް ލިބިފައެވެ.

މީގެ އިތުރުން ތާވަލުގެ ދެވަނައަށް ސިޓީ ޖެހިލީ އާދީއްތަ ދުވަހުގެރޭ ކްރިސްޓަލް ޕެލަސް އަތުން 4-0 ގެ ނަތީޖާއަކުން މޮޅުވެގެންނެވެ.

ސިޓީގެ ދަނޑުގައި ކުޅުނު މި މެޗުގައި އެ ޓީމުން ލީޑު ނަގާފައިވަނީ މެޗުގެ 26 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ޖޯން ސްޓޯންސްއެވެ. މިއީ ޕްރިމިއާ ލީގުގައި ސްޓޯންސް ކާމިޔާބުކުރި ފުރަތަމަ ލަނޑެވެ. އޭގެ ފަހުން މެޗުގެ 56 ވަނަ މިނެޓުގައި ސިޓީއަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ އިލްކާއި ގުންޑޮގާނެވެ.

މެޗުގައި ސިޓީން މޮޅު ކުޅުމެއް ދެއްކިއިރު، އެ ޓީމުގެ ތިންވަނަ ލަނޑު މެޗުގެ 68 ވަނަ މިނެޓުގައި ކާމިޔާބުކޮށްދިނީ ފުރަތަމަ ލަނޑުވެސް ޖަހައިދިން ސްޓޯންސްއެވެ. އަދި އޭގެ ފަހުން މެޗު ނިމެން ދެ މިނެޓަށް ވެފައި ވަނިކޮށް ރަހީމް ސްޓާލިން ވަނީ ސިޓީގެ ހަތަރުވަނަ ލަނޑު ކާމިޔާބުކޮށްދީފައެވެ.

މި މޮޅާއެކު ތާވަލުގެ ދެވަނައަށް ސިޓީ ޖެހިލިއިރު، މި މެޗުން ބަލިވި ޕެލަސް އޮތީ ތާވަލުގެ 13 ވަނައިގައި 19 މެޗުން 23 ޕޮއިންޓާއެކުއެވެ. އަދި ލީގުގެ ފުލުގައި އޮތް ޝެފީލްޑް ޔުނައިޓެޑާ ދެކޮޅަށް އާދީއްތަ ދުވަހުގެރޭ ޓޮޓެންހަމް ހޮޓްސްޕާ ކުޅުނު މެޗުން އެ ޓީމު 3-1 ން މޮޅުވިއިރު، ޓޮޓެންހަމް އޮތީ ފަސްވަނައިގައި 18 މެޗުން 33 ޕޮއިންޓާއެކުއެވެ.