ރިސޯޓުތަކުގައި ކޭސްތައް އިތުރުވަނީ، ޓޫރިޒަމް މިނިސްޓްރީއާއެކު ޚާއްސަ މަޝްވަރާތަކަކަށް!
18 ޖެނުއަރީ 2021 | ހޯމަ 04:17ގިނައިން ޕޮޒިޓިވްވަމުންދަނީ އެރިސޯޓެއްގައި މަސައްކަތްކުރާ މުވައްޒަފުން
އޮބްލޫ ސިލެކްޓް ސަންގެލި ރިސޯޓު، މިރިސޯޓުން ވެސް ގިނަ އަދަދެއްގެ ކޭސްތައް ފެނިފައިވޭ
ރިސޯޓުތަކުގައި ކޮވިޑް-19ގެ ކޭސްތައް އިތުރުވަމުންދާތީ، ކޮންޓްރޯލް ކުރުމަށް ޓޫރިޒަމް މިނިސްޓްރީއާއެކު ޚާއްސަ މަސައްކަތްތަކެއް ފަށާފައިވާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބުނެފިއެވެ.
އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ މިދުވަސްވަރު ރިސޯޓުތަކުން ޕޮޒިޓިވް ކޭސް ފެންނަމުންދާ މިންވަރު އިތުރު ކަމަށާއި، ފާއިތުވި 24 ގަޑިއިރު 28 ކޭސް ރިޕޯޓުކޮށްފައިވާ ކަމަށެވެ. އަދި އެއަދަދު ގިނަކަން ޑރ.ނަޒްލާ ފާހަގަކުރެއްވިއެވެ.
ރިސޯޓުތަކުން ގިނައިން ޕޮޒިޓިވްވަމުންދަނީ އެރިސޯޓެއްގައި މަސައްކަތްކުރާ މުވައްޒަފުންކަން ފާހަގަކުރައްވައި ޑރ.ނަޒްލާ ވިދާޅުވީ މުވައްޒަފުން މިހާރަށް ވުރެ މާ ބޮޑަށް ސަމާލުވެ، ރައްކާތެރިކަމަށް އަޅާފައިވާ ފިޔަވަޅުތަކާ އެއްގޮތަށް އަމަލުކުރަންޖެހޭ ކަމަށެވެ.
އެގޮތުން އައުޓްބްރޭކް އައިސްފައިވާ ރިސޯޓުތަކާއި، އެހެން ރިސޯޓުތަކުގައި ވެސް ބަލި ކޮންޓްރޯލް ކުރުމަށް މަސައްކަތް ފަށާފައިވާ ކަމަށް ޑރ.ނަޒްލާ ވިދާޅުވިއެވެ. ޑރ.ނަޒްލާ ވިދާޅުވީ މިހާރު ބަލި ފެތުރޭ ގޮތް ދެނެގަތުމާއި، އިތުރަށް އަޅާނެ ފިޔަވަޅުތަކަކީ ކޮބައިތޯ ވަރަށް ގާތުން ބަލަމުންދާ ކަމަށެވެ. އަދި ވިދާޅުވީ ގިނަ މަޝްވަރާތައް ޓޫރިޒަމް މިނިސްޓްރީއާއެކު ކުރިއަށްދާ ކަމަށެވެ.
ރިސޯޓުތަކުން ފެންނަމުންދާ ކޭސްތައް އިތުރުވަމުންދާތީ މީގެ ކުރިން ވެސް އެޗްއީއޯސީން ކަންބޮޑުވުންފާޅު ކޮށްފައިވެއެވެ. އެޗްއީއޯސީން ބުނެފައިވަނީ ބަލީގެ އަލާމަތްތައް ހުންނަ މީހުން ތިބި ނަމަވެސް ބައެއް ރިސޯޓުތަކުގައި ޓެސްޓުނުކުރާ ކަމަށެވެ. މާލެއިން ބައެއް ރިސޯޓުތަކަށް މަސައްކަތް ކުރުމަށްދާ މުވައްޒަފުން ކަރަންޓީން ވާން ޖެހޭއިރު، ކަރަންޓީންގެ މުއްދަތު ހަމަނުކޮށް ވަޒީފާއަށް ނުކުންނަމުންދާކަން ފާހަގަކުރެވިފައިވާ ކަމަށެވެ. އަދި ބައެއް ރިސޯޓުތަކުގައި މުވައްޒަފުން އުޅޭ ސަރަހައްދުގައި މާސްކް އެޅުމާއި، ސޯޝަލް ޑިސްޓެންސް ނުބަލާ ވަރަށް ބޮޑަށް ފަރުވާކުޑަކުރަމުންދާ ކަމަށް އެޗްއީއޯސީން ބުނެއެވެ.
ކުޑަކުޑަ ކަމަކަށް ފަރުވާ ކުޑަކުރެވުނު ކަމުގައިވީ ނަމަވެސް ބަލި ވަރަށް ބޮޑަށް ފެތުރިގެން ހިނގައިދާނެ ކަމަށާއި، ގައިޑްލައިންތަކާ އެއްގޮތަށް އަމަލުކުރުމަށް އެޗްއީއޯސީން އިލްތިމާސްކޮށްފައިވެއެވެ.
ކޮވިޑް-19 އިން ރައްކާތެރިވުމަށް އެޅި ފިޔަވަޅުތަކުގެ ތެރެއިން، ރާއްޖޭގެ ބޯޑަރު، ގާތްގަނޑަކަށް ހަތަރު މަސް ދުވަހަށް ބަންދު ކުރުމަށް ފަހު އަލުން ހުޅުވާލީ 15 ޖުލައި 2020 ގައެވެ. އޭގެ ފަހުން މިއަދާ ހަމައަށް ރާއްޖޭގެ ޓޫރިސްޓް ޚިދުމަތް ދޭ ޖުމްލަ 582 ޕްރޮޕަރޓީއެއް ހުޅުވާފައިވެއެވެ. އެއީ 141 ރިސޯޓު، 11 ހޮޓަލްއެއް، 133 ސަފާރީ އަދި 297 ގެސްޓްހައުސްއެވެ.
