ރާއްޖެއިން އިތުރު 50 މީހުން ކޮވިޑް-19 އަށް ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމުކޮށްފައިވާ ފަހުގެ ތަފާސްހިސާބުތައް ދައްކާގޮތުން ފާއިތުވި 24 ގަޑިއިރުގެ ތެރޭގައި 3314 ސާމްޕަލްއެއް ނަގާފައިވާއިރު، އޭގެ ތެރެއިން ޕޮޒިޓިވްވެފައިވަނީ 50 މީހެކެވެ. އެއާއެކު ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ ޖުމުލަ އަދަދު ވަނީ 14،375ށް އަރާފައެވެ.

އޭގެ އިތުރުން، އިތުރު 11 މީހަކު ބަލިން ރަނގަޅުވެފައިވާއިރު، މިހާތަނަށް ރާއްޖެއިން ކޮވިޑް ޖެހިގެން ރަނގަޅުވި މީހުންގެ ޖުމުލަ އަދަދު ވަނީ 13،474ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 845 އެވެ. އޭގެ ތެރެއިން 61 މީހަކަށް ހޮސްޕިޓަލުތަކުގައި ފަރުވާ ދެމުންދާކަމަށް އެޗްޕީއޭއިން މައުލޫމާތު ދެއެވެ.

ރާއްޖެއިން ފުރަތަމަ ކޮވިޑްގެ ކޭސްއެއް ފެނުނުތާ 313 ދުވަސް ވެފައިވާއިރު، ނިމިދިޔަ ހަފްތާގެ ތެރޭގައި ފެންނަމުންދާ ކޭސްތަކުގެ އަދަދު ވަނީ ނިސްބަތުން އިތުރުވެފައެވެ. އޭގެ ތެރޭގައި ރިސޯޓުތަކުންނާއި، އަތޮޅު ތެރެއިން ފެންނަމުންދާ ޕޮޒިޓިވް ކޭސްތައްވެސް ހިމެނެއެވެ.

އޭގެ އިތުރުން، މިވަގުތުވެސް އަތޮޅުތެރޭގެ ބައެއް ރަށްރަށް މޮނިޓަރިންގ ގައި ވާއިރު، އަތޮޅު ތެރޭގެ ބައެއް ރަށްރަށުން މިފަހުން ފެންނަމުންދާ ކްލަސްޓަރ ތަކުގައި ގިނަ އަދަދެއްގެ ހައި ރިސްކް މީހުންވެސް ހިމެނެއެވެ.