ބުރާސްފަތި 21 ޖެނުއަރީ 2021
3 ހުވަން
1442 ޖުމާދުލް އާހިރަތު 07
ފަތިސް 05:03
އިރުއަރާ 06:18
މެންދުރު 12:21
އަސްރު 15:41
އިރުއޮއްސޭ 18:17
އިޝާ 19:32
ސްޕެނިޝް ސުޕަ ކަޕް

ޕެނަލްޓީގައި ސޮސިއެޑާޑް ބަލިކޮށް ބާސާ ފައިނަލަށް

  • ސޮސިއެޑާޑް އަތުން ބާސާ މޮޅުވީ ޕެނަލްޓީ ޖަހައިގެން 3-2 ގެ ނަތީޖާއަކުން
  • ފައިނަލުގައި ބާސާ ބައްދަލުކުރަން ޖެހޭނީ ރެއާލް ނުވަތަ ބިލްބާއޯއާ

ކ. މާލެ | 14 ޖެނުއަރީ 2021 | ބުރާސްފަތި 10:18 | 1,965

ބާސާ އާއި ސޮސިއެޑާޑް ބައްދަލުކުރި މެޗުގެ ތެރެއިން: މި މެޗުން ބާސާ މޮޅުވީ ޕެނަލްޓީ ޖަހައިގެން 3-2 ން - ގެޓީ އިމޭޖާސް

ޕެނަލްޓީ ޖަހައިގެން 3-2 ން ރެއާލް ސޮސިއެޑާޑް ބަލިކޮށް، ސްޕެނިޝް ސުޕަ ކަޕުގެ ފައިނަލަށް ބާސެލޯނާ ދަތުރުކޮށްފިއެވެ.

މީގެ ކުރިން ދެ ޓީމުގެ މެދުގައި ދެ ލެގު ކުޅޭ ގޮތަށް ކުރިއަށްގެންދިޔަ މި މުބާރާތް، ހަތަރު ޓީމުގެ މެދުގައި ކުޅޭ ގޮތަށް ފޯމެޓް ބަދަލުކޮށްފައިވަނީ މިދިޔަ ސީޒަނުގައެވެ. މި މުބާރާތުގައި ވާދަކުރަނީ މިދިޔަ ސީޒަނުގެ ސްޕެނިޝް ލީގުގެ ޗެމްޕިއަން ޓީމާއި ރަނަރަޕް ޓީމުގެ އިތުރުން ސްޕެނިޝް ކަޕުގެ ފައިނަލުން ޖާގަ ހޯދާފައިވާ ދެ ޓީމެވެ.

އެހެންކަމުން ސެމީފައިނަލް ފުރަތަމަ މެޗުގައި މުބާރާތުގެ އެންމެ ކާމިޔާބު ޓީމު ކަމަށްވާ ބާސާ އާއި ސޮސިއެޑާޑް ބައްދަލުކުރިއިރު، ބުދަ ދުވަހުގެރޭ ކުޅުނު މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ން އެއްވަރުވެފައެވެ.

މި މެޗުގައި އަނިޔާގެ ސަބަބުން ބާސާގެ ކެޕްޓަން ލިއޮނެލް މެސީ ކުޅެފައެއް ނުވެއެވެ. މެސީ ނުލައި ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް ބާސާއިންނެވެ. މެޗުގެ 39 ވަނަ މިނެޓުގައި އެންޓޮއިން ގްރީޒްމަން ތަނަވަސްކޮށްދިން ފުރުސަތަކުން މި ލަނޑު ބާސާއަށް ކާމިޔާބުކޮށްދިނީ މިޑްފީލްޑަރު ފްރެންކީ ޑި ޔޮންއެވެ.

އެކަމަކު ދެވަނަ ހާފު ފަށައގެން ހަވަނަ މިނެޓުގައި ސޮސިއެޑާޑުން ވަނީ ނަތީޖާ އެއްވަރުކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ މިކޭލް އޮޔަރްޒަބަލެވެ. މިއީ އޭރިއާ ތެރެއިން ބާސާގެ ޑި ޔޮންގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރިވެފައި އޮތުމުން، އިތުރު ވަގުތުގެ ދެ ހާފު ކުޅުނުއިރު، މި ދެ ހާފުގައިވެސް ލަނޑެއް ފެނިފައެއް ނުވެއެވެ. އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީ ޝޫޓްއައުޓުގައި ބާސާއިން ތިން ޕެނަލްޓީ ކާމިޔާބުކުރިއިރު، ސޮސިއެޑާޑަށް ކާމިޔާބުކުރެވުނީ ދެ ޕެނަލްޓީއެވެ. އެގޮތުން ސޮސިއެޑާޑުގެ ޖޮން ބައުޓިސްޓާ އާއި އޮޔަރްޒަބަލް ފޮނުވާލި ޕެނަލްޓީތައް މެޗުގައި މޮޅު ކުޅުމެއް ދެއްކި ބާސާގެ ގޯލްކީޕަރު މާކް-އަންދްރޭ ޓާ ސްޓެގެން ވަނީ ހުއްޓުވާފައެވެ.

ޕެނަލްޓީގައި ސޮސިއެޑާޑް ބަލިކޮށް ބާސާ ފައިނަލަށް ދަތުރުކުރިއިރު، ފައިނަލުގައި ބާސާ ބައްދަލުކުރަން ޖެހޭނީ އެންމެ ފަހުގެ ޗެމްޕިއަން ރެއާލް މެޑްރިޑާއި އެތުލެޓިކް ބިލްބާއޯ ކުޅޭ ސެމީގެ މެޗުން މޮޅުވާ ޓީމަކާއެވެ.

އެންމެ ފަހުން އަޕްޑޭޓް ކުރީ: 7 ދުވަަސް ކުރިން | ރިވިއު ކުރީ: ހުސައިން ފަރިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.