ޕެނަލްޓީގައި ޓޮރީނޯ ބަލިކޮށް މިލާން ކުއާޓާއަށް
13 ޖެނުއަރީ 2021 | ބުދަ 10:29ޓޮރީނޯ އަތުން މިލާން މޮޅުވީ ޕެނަލްޓީ ޖަހައިގެން 5-4 ގެ ނަތީޖާއަކުން
މިލާނާއި ޓޮރީނޯ ބައްދަލުކުރި މެޗުގެ ތެރެއިން: މި މެޗުން މިލާން މޮޅުވީ ޕެނަލްޓީ ޖަހައިގެން 5-4 ން
ޕެނަލްޓީ ޖަހައިގެން 5-4 ން ޓޮރީނޯ ބަލިކޮށް، އިޓާލިއަން ކަޕުގައި ކުއާޓާފައިނަލަށް އޭސީ މިލާން ދަތުރުކޮށްފިއެވެ.
މިލާނުގެ ދަނޑުގައި އަންގާރަ ދުވަހުގެރޭ ކުޅުނު މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ.
މި މެޗުގެ ފުރަތަމަ ހާފުގައި މިލާނުގެ އިތުބާރު ފޯވާޑް ޒްލަޓާން އިބްރަހިމޮވިޗަށް ލީޑު ނަގަން ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އަދި އޭގެ ފަހުން މި ހާފުގައި ޓޮރީނޯގެ އެމާ ގޮޔަކް ނުރައްކާތެރި ހަމަލާއެއް ފޮނުވާލިއިރު، އެ ހަމަލާ މިލާނުގެ ގޯލްކީޕަރު ވަނީ ހުށިޔާރުކަމާއެކު ދިފާއުކޮށްފައެވެ.
މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ލަނޑެއް ޖަހަން އެންމެ ހުސް ފުރުސަތުތަކެއް ލިބުނީ މިލާނުގެ ޑިއޯގޯ ޑަލޮޓާއި ޑޭވިޑޭ ކަލާބްރިއާއަށެވެ. އެކަމަކު އެ ދެ ކުޅުންތެރިންވެސް ފޮނުވާލި ހަމަލާތައް އަމާޒުވީ ގޯލުގެ ހުރަސް ދަނޑިއަށެވެ. މި ހާފުގައި ރެފުރީ ވަނީ މިލާނުގެ ބެންޗުގައިއިން ގޯލްކީޕަރު ޖިއަންލުއިޖީ ޑޮންނަރުއްމާއަށް ރަތް ކާޑެއް ދައްކާފައެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރިވެފައި އޮތުމުން، ނަތީޖާ ނެރުމަށް ޖެހި ޕެނަލްޓީގައި މިލާނުން ވަނީ އެ ޓީމުން ފޮނުވާލި ފަސް ޕެނަލްޓީވެސް ކާމިޔާބުކޮށްފައެވެ. އެކަމަކު ޓޮރީނޯގެ ޓޮނަސް ރިންކޯ ފޮނުވާލި ޕެނަލްޓީ މިލާނުގެ ގޯލްކީޕަރު ވަނީ މަތަކޮށްފައެވެ.
ޓޮރީނޯ ބަލިކޮށް ލީގު ކަޕުގެ ކުއާޓާއަށް މިލާން ދަތުރުކުރިއިރު، ކުއާޓާގައި މިލާން ބައްދަލުކުރަން ޖެހޭނީ ފިއޮރެންޓީނާ އާއި އިންޓަ މިލާން ކުޅޭ މެޗުން މޮޅުވާ ޓީމަކާއެވެ.
