މޫސުން ގޯސްވެ، ޅ. އަތޮޅުން މ. އަތޮޅަށް ޔެލޯ އެލަރޓް ނެރެފިއެވެ.

މޫސުމާ ބެހޭ ގައުމީ އިދާރާއިން ބުނީ އަންގާރަ ދުވަހުގެ މެންދުރު 12:00ން ހަވީރު 4:00ށް ޅ. އަތޮޅުން މ.އަތޮޅަށް ޔެލޯ އެލަރޓް ނެރެފައިވާ ކަމަށާއި ހުރިހާ ފަރާތްތަކުން ވެސް މޫސުމަށް ސަމާލު ވުމަށް އެދޭ ކަމަށެވެ.

މީގެ ކުރިން އަންގާރަ ދުވަހުގެ ހެނދުނު 07:00ން މެންދުރު 12:00ށް ހއ. އަތޮޅުން މ. އަތޮޅަށް ވައިޓް އެލަރޓް ނެރެފައި ވާއިރު މި އެލަރޓްގެ މުއްދަތު އަންގާރު ދުވަހުގެ 12:00ން އިރުއޮއްސި 6:00ށް އިތުރު ކޮށްފައިވާކަމަށް ބުނެ އެ އިދާރާއިން ބުނީ ބޯކޮށް ވާރޭ ވެހުމާއިއެކު ގުގުރުން އެކަށީގެންވާ ކަމަށެވެ.

އެގޮތުން އުތުރާއި މެދުރާއްޖެތެރޭގެ އެކި ހިސާބަށް ވިއްސާރަ ކުރާނެ ކަމަށް ލަފާކުރެވޭކަމަށް އެ އިދާރާއިން ބުނެއެވެ. އަދި ދެކުނުގެ ބައެއް ރަށްތަކަށް ކެރީގެ އަސަރު ކުރާނެކަމަށާއި ގުގުރުން އެކަށީގެން ވާކަމަށް މޫސުމާ ބެހޭ ގައުމީ އިދާރާއިން ބުނެއެވެ.

މޫސުމާ ބެހޭ ގައުމީ އިދާރާއިން އިތުރަށް ބުނީ ހުޅަނގާއި ހުޅަނގު އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައި ގަދަވުން އެކަށީގެން ވާކަމަށްވެސް އެ އިދާރާއިން ހާމަ ކުރެއެވެ.

އެ އިދާރާއިން ބުނެފައިވަނީ މިއަހަރު ޖަނަވަރީ މަހު ހއ. އަތޮޅުން ފެށިގެން އދ. އަތޮޅާއި ހަމައަށް އާންމުކޮށް މިދުވަސްވަރު ވާރޭވެހޭ މިންވަރު 10 އިންސައްތައަށް ވުރެ އިތުރުވާނެކަމަށް ލަފާކުރެވޭ ކަމަށެވެ.

އަދި ވ. އަތޮޅުން ފެށިގެން ލ. އަތޮޅާއި ހަމައަށް އާންމުކޮށް މިދުވަސްވަރު ވާރޭވެހޭ މިންވަރަށް އަދި އެހެން ހިސާބުތަކަށް އާންމުކޮށް މިދުވަސްވަރު ވެހޭ ވަރުގެ 10 އިންސައްތައަށް އަށްވުރެ މަދުވާނެ ކަމަށްވެސް އެ އިދާރާއިން ވަނީ ލަފާކޮށްފައެވެ.

މީގެ އިތުރުން ރާއްޖޭގެ ހުރިހާ ހިސާބެއްގައި ވެސް ފިނިހޫނުމިން އާންމުކޮށް ހުންނަވަރަށް ވުރެ ތަންކޮޅެއް މަތި ވާނެ ކަމަށް އެކަށީގެންވާކަމަސް މޫސުމާ ބެހޭ އިދާރާއިން ބުނެއެވެ.

ކަނޑުދަތުރު ކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް އެދި އެ އިދާރާއިން ބުނީ ރާއްޖޭގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަ ވާނެ ކަމަށް ލަފާކުރުމާއިއެކު އެ އިދާރާއިން ބުނީ ރާޅުގެ އުސްމިނުގައި 3 ފޫޓާއި 6 ފޫޓު ހުންނާނެ ކަމަށެވެ.