ޝަފާ ފުރުވާލި މައްސަލައިގައި ހާނިމާއި އާޒިމްގެ މައްޗަށް އުފުލި ދައުވާގެ އަޑުއަހެމުއް މިއަދު
12 ޖެނުއަރީ 2021 | އަންގާރަ 03:23އުސޫލުތަކާއި ޚިލާފަށް ޝަފާ ރާއްޖެއިން ބޭރަށް ފޮނުވި މައްސަލަ
ކުރީގެ ކޮމިޝަނަރ އޮފް ޕްރިޒަންސް މޫސާ އާޒިމް (ވ) އާއި އެންވަޔަރަމެންޓް މިނިސްޓްރީގެ ސީނިއަރ ޕޮލިސީ އެގްޒެކެޓިވް މުހައްމަދު ހާނިމް (ކ)
ރާއްޖެއަށް މަސްތުވާތަކެތި އެތެރެކުރި މައްސަލައާ ގުޅިގެން، މ. ލޮނުމިދިލިގޭ އިބްރާހިމް ޝަފާޒު އަބްދުއްރައްޒާގު (ސަފާ) 18 އަހަރަށް ޖަލަށް ލާފައިވަނިކޮށް، މޯލްޑިވްސް ކަރެކްޝަނަލް ސަރވިސްގެ އުސޫލުތަކާއި ގަވާއިދުތަކާ ޚިލާފަށް އޭނާ ރާއްޖެއިން ބޭރަށް ފޮނުވި މައްސަލައިގައި އޭރުގެ ކޮމިޝަނަރު އޮފް ޕްރިޒަން މޫސާ އާޒިމް އާއި ހޯމް މިނިސްޓްރީގެ ޑެޕިއުޓީ މިނިސްޓަރު މުހައްމަދު ހާނިމްގެ މައްޗަށް އުފުލާފައިވާ ދައުވާގެ އަޑުއެހުމެއް އަންގާރަ ދުވަހަށް ތާވަލުކޮށްފިއެވެ.
މި މައްސަލައިގައި އެ ދެމީހުންގެ މައްޗަށް ދައުލަތުން އުފުލާފައި ވަނީ މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށުގެ ދައުވާއެވެ. މި އަޑުއެހުން ކުރިމިނަލް ކޯޓުގައި ތާވަލުކޮށްފައި އޮތީ އަންގާރަ ދުވަހު ހެނދުނު 11:30 އަށެވެ.
ބޭސްފަރުވާ ކުރުމަށް ކަމަށް ބުނެ ސަފާ ރާއްޖެއިން ބޭރަށް ފޮނުވީ 2014 ވަނަ އަހަރުގެ ފެބްރުއަރީ 5 ވަނަ ދުވަހުއެވެ. އޭނާ އަނބުރާ ރާއްޖެ ގެނެސްފައި ވަނީ 2014 ވަނަ އަހަރުގެ މެއި މަހުގެ ތެރޭގައެވެ. ސްރީ ލަންކާގައި އޭނާ ހުއްޓާ ހައްޔަރު ކޮށްގެން ރާއްޖެ ގެނައީ އެއިރުގެ ހޯމް މިނިސްޓަރު އުމަރު ނަސީރުގެ އަމުރަށް ދިވެހި ފުލުހުންގެ ޓީމެއް ލަންކާއަށް ގޮސް ލަންކާގެ ފުލުހުންނާ ގުޅިގެން ހިންގި ހާއްސަ އޮޕަރޭޝަނަކަށް ފަހުގައެވެ.
ސަފާ ރާއްޖެއިން ބޭރަށް ފޮނުވި މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރުމަށް ފަހު އާޒިމާއި ހާނިމުގެ އިތުރުން ހަތަރު މީހެއްގެ މައްޗަށް ދައުވާކުރަން ޕްރޮސެކިއުޓަރ ޖެނަރަލްގެ އޮފީހަށް ފޮނުވީ 2014 ވަނަ އަހަރުގެ ޑިސެމްބަރުގައެވެ. އެ މައްސަލައާ ގުޅިގެން އޭރު އޭސީސީން ނެރުނު ބަޔާނެއްގައި ބުނެފައިވަނީ އައިޖީއެމްއެޗްގެ ޕްރޮސްތެޓިސްޓް އެންޑް އޯތޯޓިސްޓް، އަބްދުﷲ ރާފިއު ފޯމުގައި ސޮއިކޮށް ސަފާ ރާއްޖެއިން ބޭރަށް ފޮނުވުމުގެ ހުއްދަދީފައިވާ އިރު، ސިއްހީ ފަރުވާގެ އާންމު އުސޫލުގައިވާ ގޮތުން އެފަދަ ހުއްދައެއް ދެވޭނީ ހަމައެކަނި ޑޮކްޓަރަކަށް ކަމަށެވެ.
ސަފާގެ ފޯމްގައި ޑޮކްޓަރު ސޮއިކޮށްފައިވާ ތާރީހަކީ 2014 ވަނަ އަހަރުގެ ފެބްރުއަރީ މަހުގެ ދެވަނަ ދުވަސްކަމުގައި ވިޔަސް އެ ދުވަހު ސަފާ އެއްވެސް ބޭނުމެއްގައި މާފުށީ ޖަލުން ނެރެފައިނުވާކަން ތަހުގީގަށް ކަށަވަރުކުރެވިފައިވާ ކަމަށްވެސް ބަޔާނުގައިވެއެވެ.
ސަފާ ބޭސްފަރުވާއަށް ރާއްޖެއިން ބޭރަށް ފޮނުވާލާފައިވަނީ އެކަމާ ގުޅޭ ލިޔެކިޔުން ފުރިހަމަނުވެކަން އެނގުނު ނަމަވެސް މެޑިކަލް ބޯޑުގެ ހުއްދަ ފޯމުގައި އެކަމަށް ހުއްދަ ދިން ފަރާތުގެ ގޮތުގައި ސޮއިކޮށްފައިވާނެ ކަމަށް އޭރުގެ ކޮމިޝަނަރު އޮފް ޕްރިޒަންސް އާޒިމް އިއުތިރާފުވެފައިވާ ކަމަށް ވެސް އޭސީސީގެ ބަޔާނުގައި ބުނެފައިވެއެވެ.
