ކޭސްތައް މަދުވުމާއި އެކު މާސްކު އަޅާ މީހުން މަދުވޭ، މިއީ ކަންބޮޑުވާ ކަމެއް: ޑރ.ނަޒްލާ
11 ޖެނުއަރީ 2021 | ހޯމަ 07:55ގައިޑްލައިންތަކަށް އަމަލުކުރުމުން ބަލި ކޮންޓްރޯލް ކުރެވޭ
ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވާހަކަދައްކަވަނީ
ކޮވިޑް-19ން ރައްކާތެރިވުމަށް އަޅާފައިވާ ފިޔަވަޅުތަކާއި އާއްމުކޮށްފައިވާ ގައިޑްލައިންތައް މަތިން ހަނދާން ނެތޭ މީހުން މިހާރު ވަރަށް ގިނަ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
އާދިއްތަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޑރ.ނަޒްލާ ވިދާޅުވީ ކޭސްތައް މަދުވުމާއި ގުޅިގެން ބޮޑެތި ލުއިތަކެއް ދެވިފައިވާ ކަމަށެވެ. ނަމަވެސް މިހާރު ފެންނަމުންދާ މަންޒަރުތަކުން ކަންބޮޑުވާ ކަމަށް ޑރ.ނަޒްލާ ވިދާޅުވިއެވެ. ޑރ.ނަޒްލާ ވިދާޅުވީ ކޭސްތައް މަދުވާއިރަށް މާސްކް އަޅާ މީހުން މަދުވުމާއި ގައިދުރުކަން ބަހައްޓަން ޖެހޭކަން ހަނދާންނެތޭ މީހުން ގިނަ ވުމާއި، އެކިއެކި ޚިދުމަތްތައްދޭ ފިހާރަތަކާއި، ކެފޭ އަދި ރެސްޓައުރެންޓް ފަދަ ތަންތަނަށް އެކަށީގެންވާ އަދަދަށްވުރެ އިތުރަށް މީހުން ވަދެ ފުނިގެންޖެހިގެން ޚިދުމަތް ހޯދާ މަންޒަރު ވަރަށް ގިނައިން ފެންނަމުންދާ ކަމަށެވެ.
ކޮންމެ ކަމެއް ރަނގަޅުކުރަން ކޮންމެ ވަގުތަކު އިސްޕެކްޝަން ޓީމެއް ނުފޮނުވޭނެކަން ފާހަގަކުރައްވައި ޑރ.ނަޒްލާ ވިދާޅުވީ ހަތަރު ފަހަރެއްގެ މަތިން އިސްޕެކްޝަން ކުރިއަށް ގެންދެވިފައިވާ ކަމަށެވެ. ކޮވިޑް-19އަކީ ކޮބައިކަމާއި، މިބަލީގައި އަމަލުކުރަން ޖެހޭ ގޮތުގެ އިތުރުން ބަލިން ރައްކާތެރިވުމަށް އަޅަން ޖެހޭ ފިޔަވަޅުތައް ކޮންމެ މީހަކަށް ވެސް އެނގޭނެ ކަމަށާއި އަދި ގައިޑްލައިންތަކަށް އަމަލުކުރުމުން ބަލި ކޮންޓްރޯލް ކުރެވޭކަން މާޒިވެ ދިޔަތަނަށް ބަލާލުމުން ހާމަވެގެންދާ ކަމަށް ޑރ.ނަޒްލާ ވިދާޅުވިއެވެ.
މީގެ އިތުރުން ޑރ.ނަޒްލާ ވިދާޅުވީ ކޮވިޑް-19 މިގައުމުން ނުފިލާ ކަމަށާއި، އަދިވެސް ފަރުވާ ކުޑަ ކުރާކަމުގައިވާނަމަ ކޭސްތައް އިތުރުވާނެ ކަަމަށެވެ. އަދި ކޭސްތައް އިތުރުވާނަމަ ކޮންޓްރޯލް ކުރުމަށް އިތުރު ފިޔަވަޅުތައް އަޅަން މަޖުބޫރުވާނެ ކަމަށް ޑރ.ނަޒްލާ ވިދާޅުވިއެވެ.
ޑރ.ނަޒްލާ ވިދާޅުވީ އާންމު ހާލަތަށް ދިރިއުޅުން ގެންދެވޭނީ ވެކްސިން އާބާދީގެ ބޮޑު ބަޔަކަށް ދެވި އޭގެ ސަބަބުން ރައްކާތެރިކަމެއް ލިބޭ ހިސާބުން ކަމަށެވެ. ވެކްސިން ލިބެންދެން ބަލި އިތުރަށް ފެތުރަނަށް ނުދިނުމަށްޓަކައި ކުރަން ޖެހޭ ހުރިހާ މަސައްކަތްތަކެއް ކުރަން ޖެހޭ ކަމަށް ޑރ. ނަޒްލާ ވިދާޅުވިއެވެ.
ބައެއް ގައުމުތަކުގެ ހާލަތަށް އަލިއަޅުއްވާލައްވާ ޑރ.ނަޒްލާ ވިދާޅުވީ ބަލި ކޮންޓްރޯލް ނުވުމުން ތިން ފަހަރަށް ބައެއް ގައުމުތަކުން ލޮކްޑައުންއަށް ގޮސްފައިވާ ކަމަށެވެ. ނަމަވެސް ރާއްޖޭއަށް އައި ދެވަނަ ޕީކް ވެސް ކޮންޓްރޯލް ކުރީ ފުލް ލޮކްޑައުންއަކަށް ނުގޮސް ކަމަށް ޑރ.ނަޒްލާ ވިދާޅުވިއެވެ. އަދި މިހާރު ދެވިފައިވާ ލުއިތަކާއެކު ކުރިއަށް ދިއުމަށް އާއްމު ރައްޔިތުންގެ ފުރިހަމަ އެއްބާރުލުން ވަރަށް ބޮޑަށް ބޭނުންވާ ކަމަށް ޑރ.ނަޒްލާ ވިދާޅުވިއެވެ
