ޑިސެމްބަރު މަހުގެ އިންކަމް ސަޕޯޓު އެލެވަންސަށް އެދުމުގެ ފުރުސަތު ހުޅުވާލައިފި
11 ޖެނުއަރީ 2021 | ހޯމަ 02:11އިންކަމް ސަޕޯޓް ދޫކޮށްފައިވަނީ މިދިޔަ އަހަރުގެ ނިޔަލަށް
ކުޅުދުއްފުށީ މީހަކު އަތްތެރި މަސައްކަތް ކުރަނީ، އިންކަމް ސަޕޯޓަށް އެދުމަށް ފުރުސަތު ވަނީ ހުޅުވާލައިފައި
ކޮވިޑް-19އާ ގުޅިގެން ވަޒީފާ ގެއްލިފައިވާ ފަރާތްތައް ޑިސެމްބަރު މަހުގެ އިންކަމް ސަޕޯޓް އެލަވަންސަށް އެދުމުގެ ފުރުސަތު ހުޅުވާލައިފިއެވެ.
ސަރުކާރުން އިންކަމް ސަޕޯޓުގެ ގޮތުގައި ދޭ މާލީ އެހީ ލިބެނީ ކޮވިޑް-19ގެ ސަބަބުން ވަޒީފާ ގެއްލި ނުވަތަ ނޯޕޭ ލީވް ދީފައިވާ މީހުންނާއި، އާމްދަނީއަށް އަސަރުކޮށްފައިވާ ފްރީލާންސް މަސައްކަތްކުރާ މީހުންނަށެވެ. އެގޮތުން ކޮވިޑް-19ގެ ސަބަބުން ލިބޭ އާމްދަނީ 5،000ރ އަށް ވުރެދަށް ވެފައިވާ އުމުރުން 18 އަހަރާއި 65 އަހަރާ ދެމެދުގެ ކޮންމެ މިހަކަށް ވެސް އިންކަމް ސަޕޯޓަށް އެދި ފިނޭންސް މިނިސްޓްރީގެ ވެބްސައިޓް މެދުވެރިކޮށް ހުށަހެޅޭނެއެވެ. މި ފައިސާ ދޭން ހަމަޖެހިފައި ވަނީ މިދިޔަ އަހަރުގެ އޭޕްރީލް މަހުން ފެށިގެން ޑިސެމްބަރާ ހަމައަށެވެ.
ޖޮބް ސެންޓަރުން ބުނީ، މިދިޔަ އަހަރުގެ ޑިސެންބަރު މަހުގެ އެލަވެންސްއަށް އެދުމުގެ ފުރުސަތު ހުޅުވާލާފައިވާ ކަމަށާއި، އަދި އެކަމަށް އެދުމުގެ އެންމެ ފަހު ތާރީހަކީ ޖެނުއަރީ މަހުގެ 31 ކަމަށެވެ.
ފާއިތުވި އަހަރުގެ ޑިސެމްބަރު، 31 ގެ ނިޔަލަށް އިންކަމް ސަޕޯޓު ދޫކޮށްފައިވާއިރު، ފިނޭންސުން ނެރުނު ތަފާސް ހިސާބުތައް ދައްކާގޮތުން މިހާތަނަށް 17،147 މީހަކަށް 221.1 މިލިއަން ރުފިޔާ ވަނީ ދޫކޮށްފައެވެ.
އިންކަމް ސަޕޯޓު އެލަވަންސް ގިނަ ބަޔަކަށް ދެވޭ ގޮތަށް އެ އެލަވަންސް ދިނުމާއި ގުޅޭ އުސޫލަށް ގެނެސްފައިވާ ބަދަލާއެކު ރާއްޖޭގައި ވަޒީފާ އަދާކުރާ ފަރާތްތަކުގެ ތެރެއިން، 2019 ވަނަ އަހަރުގެ ޑިސެމްބަރު އެކެއްގެ ފަހުން އާމްދަނީއަށް ނުރަނގަޅު އަސަރުކޮށްފައިވާ ފަރާތްތަކަށް އިންކަމް ސަޕޯޓު އެލަވަންސް އަށް އެދި ހުށައެޅޭނެއެވެ.
އިންކަމް ސަޕޯޓު ތިން ބުރަކަށް ބަހާލައިގެން ދީފައިވާއިރު އެންމެ ފުރަތަމަ ދީފައި ވަނީ އޭޕްރިލް މޭ އަދި ޖޫން މަހާ ހަމައަށެވެ. އޭގެ ފަހުން ޖުލައި އޯގަސްޓު އަދި ސެޕްޓެމްބަރު މަހުގެ ފައިސާ ދީފައިވާއިރު މިހާރު ދޫކުރަމުން އަންނަނީ އޮކްޓޯބަރު ނޮވެމްބަރު އަދި ޑިސެމްބަރު އެ ތިން މަހުގެ ފައިސާ އެވެ.
