ސަސް ބަލިކޮށް މާޒިޔާ އެއްވަނައަށް

ދިރާގު ދިވެހި ޕްރިމިއާ ލީގުގައި އާދީއްތަ ދުވަހުގެ ހަވީރު ސުޕަ ޔުނައިޓެޑް ސްޕޯޓްސް (ސަސް) ފަސޭހަކަމާއެކު ބަލިކޮށް ތާވަލުގެ އެއްވަނައަށް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ޖެހިލައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗުން މާޒިޔާ މޮޅުވީ 3-0 ގެ ނަތީޖާއަކުންނެވެ. މި މެޗަކީ މާޒިޔާއާ ދާދި ފަހުން ހަވާލުވި ސާބިއާގެ ކޯޗު ރިސްޓޯ ވިޑަކޮވިޗް އެ ޓީމަށް އިރުޝާދުދިން ފުރަތަމަ މެޗެވެ.

މި މެޗުގައި މާޒިޔާއިން މޮޅު ކުޅުމެއް ދެއްކިއިރު، އެ ޓީމުން ތިން ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ. އެގޮތުން މެޗުގެ 17 ވަނަ މިނެޓުގައި ހިލޭ ޖެހުމަކުން މިޑްފީލްޑަރު މުޙައްމަދު އުމެއިރު ވަނީ މާޒިޔާއަށް ލީޑު ނަގައިދީފައެވެ. އަދި އޭގެ ފަހުން މެޗުގެ 31 ވަނަ މިނެޓުގައި ބިދޭސީ ފޯވާޑް ކޮނޭލިއަސް ސްޓެވާޓް (ކޯނޭ) ކާމިޔާބުކުރި ރީތި ލަނޑުން މާޒިޔާއިން ވަނީ ލީޑު ފުޅާކޮށްފައެވެ. އަދި ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ކައުންޓަ އެޓޭކެއްގައި ކޯނޭ ވަނީ މާޒިޔާގެ ތިންވަނަ ލަނޑު ޖަހާފައެވެ.

ދެވަނަ ހާފުގައި ސަސްއިން ކުޅުން ރަނގަޅުކުރިއިރު، މި ހާފު ފަށައިގެން ހަތްވަނަ މިނެޓުގައި އެ ޓީމުގެ ޑިފެންޑަރު އަޙްމަދު އައިހަމަށް ވަނީ ލަނޑެއް ޖަހަން ހުސް ފުރުސަތެއް ލިބި ބޭކާރުވެފައެވެ. އެގޮތުން މާޒިޔާގެ ގޯލްކީޕަރު ކައިރިން ނައްޓާލުމަށްފަހު އައިހަމް ފޮނުވާލި ބޯޅަ ގޯލު ރޮނގުމަތިން ސަލާމަތްކޮށްފައިވަނީ ބިދޭސީ ޑިފެންޑަރު ޕީޓާ ޕްލަނިޗެވެ.

އޭގެ ފަހުން މި ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ 82 ވަނަ މިނެޓުގައި މާޒިޔާގެ މިޑްފީލްޑަރު ހަމްޒާ މުޙައްމަދު (ހަމްޕު) ފޮނުވާލި ހަމަލާއެއް ސަސްގެ ބިދޭސީ ގޯލްކީޕަރު މިރްޒޮހިދު މަމަކްތޯނޯފް ވަނީ ދިފާއުކޮށްފައެވެ. އަދި މެޗު ނިމެން މިނެޓަކަށް ވެފައި ވަނިކޮށް މާޒިޔާގެ ކެޕްޓަން އަސަދުﷲ އަބްދުﷲ ނުރައްކާތެރި ހަމަލާއެއް ފޮނުވާލިއިރު، އެ ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މެޗަށްފަހު މާޒިޔާގެ ކޯޗު ވިޑަކޮވިޗް ބުނީ އޭނާ ބޭނުންވި ކުޅުން ފެނުނީ ފުރަތަމަ ހާފު ކަމަށާއި، ދެވަނަ ހާފުގައި އެކި ކަހަލަ އުނދަގޫތަކެއް ހުރުމުން މައްސަލަތަކެއް ދިމާވި ކަމަށެވެ. އެކަމަކު ދެ ދުވަހެއް ވަރު ފަރިތަކޮށްގެން ބޭނުންވާ ފެންވަރަށް ގެންދަން އުނދަގޫވާނެ ކަމަށްވެސް ބުންޏެވެ.

ސަސްގެ ކޯޗު އަޙްމަދު ނާޝިދު (ނާދު) ބުނީ މެޗުން ބަލިވުމުގެ އެންމެ ބޮޑު އެއް ސަބަބަކީ ފުރަތަމަ ހާފު ދަށްކޮށް ދިއުން ކަމަށެވެ. އަދި މެޗަށް ނުކުތީ ބައެއް ކުޅުންތެރިން އަނިޔާނުވެ، ކާޑު ދައްކާފައި ތިބި ކުޅުންތެރިން ކާޑެއް ނުހޯދާ މެޗުން ސަލާމަތްވުމަށް ކަމަށާއި، އެކަން ޕްލޭނާ އެއްގޮތަށް ދިޔަ ކަމަށްވެސް ބުންޏެވެ.

މި މޮޅާއެކު ތާވަލުގެ އެއްވަނައަށް މާޒިޔާ ޖެހިލީ ކުޅުނު ފަސް މެޗުން ލިބުނު 11 ޕޮއިންޓާއެކުއެވެ. ދެވަނައަށް ވެއްޓުނު ވެލެންސިއާއަށްވެސް ފަސް މެޗުން 11 ޕޮއިންޓް ލިބިފައިވާއިރު، މާޒިޔާއަށް ކުރި ލިބެނީ ފައިދާ ލަނޑުންނެވެ. އަދި އާދީއްތަ ދުވަހުގެ ހަވީރު މާޒިޔާ އަތުން ބަލިވި ސަސް އޮތީ ތާވަލުގެ ފަސްވަނައިގައި ފަސް މެޗުން ހަ ޕޮއިންޓާއެކުއެވެ.