ބަލީގެ ހާލަތު ދެނެގަނެވެންދެން ދެއްވަދޫ މޮނިޓަރިންގއަށް

6 މީހަކު ޕޮޒިޓިވްވުމާއި ގުޅިގެން ބަލީގެ ހާލަތު ދެނެގަތުމަށް ގއ. ދެއްވަދޫ މޮނިޓަރިންގެ ހާލަތަށް ލައިފިއެވެ.

ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ގއ. ދެއްވަދޫ މޮނިޓަރިންގެ ހާލަތަށް ލާންޖެހުނީ އެރަށުގައި ކޭސްތަކެއް ފެނުމާއެކު ހާލަތު ދެނެގަތުމަށް ކަމަށެވެ. އެގޮތުން ފުރަބަންދު ކޭސްއެއް މިދިޔަ މަހުގެ 24 ވަނަ ދުވަހު ޕޮޒިޓިވްވެ ކަރަންޓީންގައި ތިބި މީހުންނަށް ނުބައި މައުލޫމާތެއް ދެވިގެން ރިލީސްކުރެވުނު ކަމަށެވެ. ނަމަވެސް ފަހުން ނަތީޖާ ލިބުނު އިރު އެމީހުން ޕޮޒިޓިވް ކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ ޕޮޒިޓިވްވީ މީހާގެ އަލާމާތްތަކާއި ބެހޭ ގޮތުން ކުރިން މައުލޫމާތު ލިބިފައެއް ނެތް ކަމަށާއި، އެހެންނަމަވެސް ބުދަ ދުވަހު މައުލޫމާތު ލިބުމާއެކު އިތުރަށް ޓްރޭސިންގ ހަދާ ކޮންޓެކްޓުން ހޯދާ އެމީހުން ހޯދާ ސާމްޕަލްތައް ޓެސްޓް ކޮށްފައިވާ ކަމަށެވެ. އަދި ބުރާސްފަތި ދުވަހު ނަތީޖާ ލިބުނު އިރު އޭގެ ތެރެއިން 6 މީހަކު ޕޮޒިޓިވްވެފައިވާ ކަމަށާއި، އަދި އެކަކުގެ ނަތީޖާ ދެނެނުގަނެވޭ ކަމަށެވެ.

ޑރ. ނަޒްލާ ވިދާޅުވީ ފުޅާކޮށް ޓްރޭސިން ކުރިއަށް ގެންގޮސް ޓްރޭސިން ނިމި އަދި ރަށުތެރޭގެ ބަލީގެ ހާލަތު ދެނެގަނެވެންދެން ރަށް އޮންނާނީ މޮނިޓަރިންގެ ހާލަތުގައި ކަމަށެވެ.

މީގެ އިތުރުން ނިޔާމަ ރިސޯޓުން މިހާތަނަށް 14 މީހަކު ޕޮޒޓިވްވެފައިވާ ކަމަށާއި، އެކޭސްތަކާއި ގުޅިގެން ޓްރޭސިންގ ކުރިއަށް ގެންދެވި 26 މީހަކު ވަނީ އައިޑެންޓިފައި ކުރެވިފައިވާ ކަމަށެވެ. އަދި ފުރަތަމަ ކޭސްއާއި ގުޅިގެން 86 ރޭންޑަމް ސާމްޕަލް ނަގާ ޓެސްޓްކޮށްފައިވާ އިރު، އޭގެ ތެރެއިން އެކަކުވެސް ޕޮޒިޓިވްވެފައި ނުވާ ކަމަށް ޑރ. ނަޒްލާ ވިދާޅުވިއެވެ. އަދި މިވަގުތު ޕޮޒިޓިވްވެފައިވާ 14 މީހުންގެ ތެރެއިން 5 މީހުންނަކީ ސްޓާފުން ކަމަށާއި، އަދިވެސް ޝެޑިއުލްއެއްގެ ދަށުން ސަރވައިލެންސް ކުރިއަށްދާނެ ކަމަށް ޑރ. ނަޒްލާ ވިދާޅުވިއެވެ.