ހޭލުންތެރި، އުފެއްދުންތެރި، އުއްމަތެއް ވުޖޫދުވަނީ އިލްމުން ކަމަށާއި، އަބަދުވެސް އުނގެނުމަށް ޚާއްސަ ސަމާލުކަމެއް ދޭން ޖެހޭ ކަމަށް ހުކުރު ޚުތުބާގައި ބުނެފިއެވެ.

''އުނގެނުމަށް ސަމާލުކަން ދޭށެވެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ މާތް ނަބިއްޔާ އިސްލާމީ މުޖްތަމައުގައި ތައުލީމު ފެތުރުމަށާއި، މުސްލިމުންގެ ދަރިންނަށް ކިޔަވައިދިނުމަށް ޚާއްސަ ކަމެއް ދެއްވި ކަމަށެވެ. އަދި ނަތީޖާއަކަށް ވީ، ހޭލުންތެރި، އިލްމުވެރި އުފެއްދުންތެރި، އުއްމަތެއް ވުޖޫދަށް އައުން ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ މުޅި ދުނިޔެއަށް ފެތުރިފައިވާ ވަބާގެ ހާލަތު މުޅިން ހަމަޔަކަށް އެޅިފައި ނުވި ނަމަވެސް، ދަރިވަރުން ސްކޫލް މަދްރަސާ އަދި ކޮލެޖު ޔުނިވަސިޓީތަކަށް ފޮނުވައިގެން އުނގަންނައި ދިނުމަކީ، ވަރަށް މުހިއްމު ކަމެއް ކަމަށެވެ. އެހެނީ ނިޒާމީ ތައުލީމުގެ އަމާޒުތަކުގެ ތެރޭގައި، ދަރިވަރުންގެ ނަފްސާނީ ދުޅަހެޔޮކަމާއި، އިޖްތިމާއީ ގުޅުންތައް ހަރުދަނާ ކުރުމާއި، ކުރިމަތިވާ މައްސަލަތައް ޙައްލުކުރަން ދަސްވުން ހިމެނޭތީ ކަމަށް ޚުތުބާގައި ބުނެފައެވެ.

ޚުތުބާގައި ބުނީ ވޭތިވެ ދިޔަ އަހަރު، ތައުލީމުން ބީވެގެން ދިޔަ ބައި ހާސިލުކޮށްދެވޭތޯ، ބެލެނިވެރިން ގިނަގުނަ މަސައްކަތްތައް ކުރަން ޖެހޭ ކަމަށެވެ. އަދި ދަރިން ސްކޫލްތަކަށް ފޮނުވުމަށް ޚާއްސަ ސަމާލުކަމެއް ދިނުމަށް ވެސް ވަނީ ގޮވާލާފައެވެ.

މިފެށޭ ދެވަނަ ޓާމުގެ ކިޔުމާއި ބެހޭ ގޮތުން ޚުތުބާގައި ބުނީ ހުރިހާ ދަރިވަރުން ވެސް އިލްމީ ރޮނގުން އިތުރު ކުރިއެރުމާއި ތަރައްގީ ލިބޭތޯ މަސައްކަތް ކުރުމަށް އަޒުމު ކަޑައަޅަން ޖެހޭ ކަމަށެވެ. އަދި އިތުރު ޙަރަކާތްތަކުން ކުދީންގެ މުޅި މާޙައުލަށް ދިރުން ގެނެސްދިނުމަށް ޚުތުބާގައި ގޮވާލާފައިވެއެވެ.

މީގެ އިތުރުން ޚުތުބާގައި ބުނީ ދަރިން ތަރުބިއްޔަތުކޮށް، އިސްލާމް ދީނަށާއި، ގައުމަށް ވަފާތެރި ބަޔަކަށް ހެދުމަށްޓަކައި، އެދުރުންގެ ދައުރު ވަރަށް ބޮޑު ކަމަށާއި، އެކުދިންނަށް ފުރިހަމަ ތަރުބިޔަތެއް ދެވޭނީ ކެތްތެރިކަމާއި، ޙިކްމަތްތެރިކަމާ އެކު އެދުރުން އެ މަސްއޫލިއްޔަތު އަދާ ކޮށްގެން ކަަމަށެވެ. އަދި ކިޔަވައިދޭ ކުދިންގެ ލޯތައް ހުއްޓިފައި ހުންނާނީ އެދުރުންގެ މައްޗަށް ކަމަށެވެ.

މަދްރަސާ އަކީ ދަރިންގެ ދެވަނަ ހިޔާވަހިކަން ފާހަގަކޮށް ޚުތުބާގައި ބުނީ އެކުދިންގެ ހިތްތަކުގައި އިސްލާމީ އަގީދާ ހަރުދަނާކޮށް، ދުނިޔޭގެ ވެއްޓަށް ހޭލުންތެރިކޮށް، އެ ކުދިން ބިނާކުރާ ތަނަކީ މަދްރަސާ ކަމަށާއި، މަދްރަސާއިން މި މުހިއްމު ދައުރު ފުރިހަމައަށް އަދާކޮށްފި ނަމަ، އުއްމަތުގެ މުސްތަގުބަލު އުޖާލާވާނެ ކަމަށެވެ. އަދި ބާއްޖަވެރިކަމުގެ މަގުތައް އަލިވެ، ފާގަތިކަން އިތުރުވާނެ ކަމަށާއި، މި ބުރަ މަސައްކަތް ކުރެވޭނީ މަދްރަސާތަކުގެ ވެރިންނާއި، ބެލެނިވެރިން ގުޅިގެން ކަމަށް ޚުތުބާގައި ބުނެފައިވެއެވެ.

މީގެ އިތުރުން ޚުތުބާގައި ބުނީ އިލްމުތަކުގެ ތެރެއިން އެންމެ ޝަރަފުވެރި އިލްމަކީ ޝަރުއީ އިލްމު ކަމަށާއި، ދިރިއުޅުމަށް މަންފާކުރަނިވި، އަދި އަހަރެމެންގެ ކޮނޑުގައި އެޅިފައިވާ މަސްއޫލިއްޔަތު އަދާކުރުމަށް، ދުނިޔަވީ ތަފާތު އިލްމުތަކުގައި ކުރިއަރައި ދިޔުމަކީ އިސްލާމް ދީނުގައި ވެސް އަމުރުކުރާ ކަމެއް ކަމަށެވެ.

ޚުތުބާގައި ބުނީ ހުޅަނގުގެ ގައުމުތައް އަނދިރީގައި އޮތް އިރު، ބޭސްވެރިކަމާއި، ކެމިސްޓްރީއާއި، ފިޒިކްސްއާއި، ޙިސާބާއި، ފަލަކީ އިލްމު ފަދަ ދާއިރާތަކުގައި މުސްލިމް އިލްމުވެރިންގެ ޚިދުމަތްތަކާއި، އީޖާދުތައް މެދުއުޑުގައި ފިޔަޖަހަމުން ދިޔައީ މި މަފްހޫމުގައި ކުރެވުނު ބިނާ ކުރަނިވި މަސައްކަތުގެ ސަބަބުން ކަމަށެވެ. ޚުތުބާގައި ބުނީ އިލްމީ ފޮތްތަކާއި ދިރާސާތައް ތަފާތު ބަސްތަކަށް ތަރުޖަމާކޮށް، ޝާއިއު ކުރެވުނު ކަމަށާއި، މުޅި އިންސާނިއްޔަތަށް ފައިދާ އާއި ލާބަ ހުރި އާ އީޖާދުތައްކުރި، ބޮޑު ޙަޟާރަތެއް ބިނާވެގެން ދިޔަ ކަމަށެވެ. އަދި އިލްމީ މި އުފެއްދުންތަކުގެ ސަބަބުން ދުނިޔޭގެ ލައިބްރަރީތައް މުއްސަނދި ވެގެންދިޔަކަން ޚުތުބާގައި ފާހަގަކުރިއެވެ.