ރާއްޖެއިން ޕާކިސްތާނަށް ދާއިރު ޕީސީއާރް ޓެސްޓުގެ ނަތީޖާ ހުށަހަޅާކަށް ނުޖެހޭނެ
7 ޖެނުއަރީ 2021 | ބުރާސްފަތި 01:57ޕާކިސްތާނުން ވަނީ އެގައުމަށް އެތެރެވާއިރު ޕީސީއާރު ޓެސްޓު ހަދަން ނުޖެހޭ ވަކި ގައުމުތަކެއް ކަނޑައަޅާފައި
ވެލާނާ އިންޓަނޭޝަނަލް އެއަރޕޯޓްގެ އެތެރެއިން
ރާއްޖެއިން ޕާކިސްތާނަށް ދަތުރުކުރާ މީހުން އެގައުމަށް އެތެރެވުމަށް ކޮވިޑް-19 ގެ ޕީސީއާރް ޓެސްޓުގެ ނަތީޖާ ހުށަހަޅަން ނުޖެހޭގޮތަށް ހަމަޖައްސައިފިއެވެ.
ޕާކިސްތާނުގެ ސިވިލް އޭވިއޭޝަން އޮތޯރިޓީން އަންގާރަ ދުވަހު ވަނީ އެގައުމަށް އެތެރެވާއިރު ޕީސީއާރް ޓެސްޓު ހުށަހަޅަން ނުޖެހޭ ގައުމުތަކުގެ ލިސްޓެއް ކަނޑައަޅާފައެވެ. އަދި މި ލިސްޓުގައި ގައުމުތައް ވަނީ ތިން ކެޓަގަރީއަކަށް ބަހާލައިފައެވެ.
އެގޮތުން ކެޓަގަރީ "އޭ"ގައި ހިމެނޭ ގައުމުތަކުން ޕީސީއާރު ޓެސްޓުގެ ނަތީޖާ ހުށަހަޅަން ނުޖެހޭއިރު، މި ކެޓަގަރީގައި 23 ގައުމު ހިމެނެއެވެ. ރާއްޖޭގެ އިތުރުން މި ކެޓަގަރީގައި ހިމެނޭ ގައުމުތަކަކީ، ނިއުޒިލޭންޑް، އޮސްޓްރޭލިއާ، ފިންލޭންޑް، ސިންގަޕޫރު، ސައުތު ކޮރެއާފަދަ ގައުމުތަކެވެ.
ކެޓަގަރީ "ބީ" ގައި ހިމެނޭ ގައުމުތަކުން 96 ގަޑިއިރު ނުވާ ޕީސީއާރު ޓެސްޓުގެ ނަތީޖާ ހުށަހަޅަން ޖެހޭނެ ކަމަށް ޕާކިސްތާނުގެ ސިވިލް އޭވިއޭޝަން އޮތޯރިޓީން ބުނެއެވެ. އަދި ކެޓަގަރީ "ސީ"ގައި މިވަގުތު އެއްވެސް ގައުމެއް ހިމަނާފައި ނުވާއިރު، މި ކެޓަގަރީން އަންނަ ގައުމުތަކުގެ މީހުނަށް ޕާކިސްތާނަށް އެތެރެވެވޭނީ ޕީސީއާރު ޓެސްޓު ހެދުމަށްފަހުއެވެ. އަދި ޕާކިސްތާނަށް އެތެރެވުމަށްފަހު ކަރަންޓީނު ވާން ޖެހޭނެ ކަމަށް ސިވިލް އޭވިއޭޝަން އޮތޯރިޓީން ބުނެއެވެ.
