ބްރެންޓްފޯޑް ބަލިކޮށް ޓޮޓެންހަމް ފައިނަލަށް

އިނގިރޭސި ލީގު ކަޕުގެ ސެމީފައިނަލުގައި ބްރެންޓްފޯޑް ބަލިކޮށް ޓޮޓެންހަމް ހޮޓްސްޕާއިން ފައިނަލުގެ ފުރަތަމަ ޖާގަ ހޯދައިފިއެވެ.

އަންގާރަ ދުވަހުގެރޭ ކުޅުނު މެޗުން ޓޮޓެންހަމް މޮޅުވީ އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވާދަކުރަމުން އަންނަ ބްރެންޓްފޯޑް އަތުން 2-0 ގެ ނަތީޖާއަކުންނެވެ. މިއީ ލީގު ކަޕުގެ ފައިނަލަށް ޓޮޓެންހަމް ދަތުރުކުރި ނުވަވަނަ ފަހަރެވެ.

ޓޮޓެންހަމް ދަނޑުގައި އަންގާރަ ދުވަހުގެރޭ ކުޅުނު މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން 12 ވަނަ މިނެޓުގައި ސާޖް ރެގީލޯން ތަނަވަސްކޮށްދިން ފުރުސަތަކުން އެ ޓީމަށް ލީޑުނަގައިދިނީ މިޑްފީލްޑަރު މޫސާ ސިސޯކޯއެވެ.

މި މެޗުގައި ޓޮޓެންހަމުން ލީޑު ފުޅާކޮށްފައިވަނީ 70 ވަނަ މިނެޓުގައެވެ. ޓަންގުއީ އެންޑޮމްބެލޭ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ސޮން ހުއެން-މިންއެވެ. އަދި މި މެޗު ބްރެންޓްފޯޑުން ނިންމާލަން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗު ނިމެން ހަ މިނެޓަށް ވެފައި ވަނިކޮށް އެ ޓީމުގެ ޖޯޝުއާ ޑަސިލްވާއަށް ރެފުރީ ސީދާ ރަތް ކާޑެއް ދެއްކުމާ ގުޅިގެންނެވެ.

ބްރެންޓްފޯޑް ބަލިކޮށް ޓޮޓެންހަމް ފައިނަލަށް ދަތުރުކުރިއިރު، މިއީ 2019 ވަނަ އަހަރުގެ ނޮވެމްބަރު މަހު ޓޮޓެންހަމާ ހަވާލުވި ހޯސޭ މޮރީނިއޯގެ އިރުޝާދުގެ ދަށުން އެ ޓީމުން ކުޅޭނެ ފުރަތަމަ ފައިނަލެވެ. އަދި ޓޮޓެންހަމުން އެންމެ ފަހުން މުބާރާތެއް ކާމިޔާބުކޮށްފައިވަނީ މީގެ 13 އަހަރު ކުރިންނެވެ. އެ ފަހަރު ޓޮޓެންހަމުން ކާމިޔާބުކޮށްފައިވަނީ 2008 ވަނަ އަހަރުގެ ލީގު ކަޕެވެ.

ލީގު ކަޕުގެ ފައިނަލުގައި ޓޮޓެންހަމް ބައްދަލުކުރަން ޖެހޭނީ ދެވަނަ ސެމީގައި ބުދަ ދުވަހުގެރޭ މެންޗެސްޓާ ޔުނައިޓެޑާއި މެންޗެސްޓާ ސިޓީ ބައްދަލުކުރާ މެޗުން މޮޅުވާ ޓީމަކާއެވެ. މި މުބާރާތުގެ އެންމެ ފަހުގެ ޗެމްޕިއަންކަން ޓީމަކީ ސިޓީއެވެ.