ހުވަދުއަތޮޅު އުތުރުބުރީ ކޮލަމާފުށީ ކައުންސިލްގެ އިދާރާގެ 2019 ވަނަ އަހަރުގެ މާލީ އޮޑިޓް ރިޕޯޓުގައި މައިގަނޑު ހަތަރު މައްސަލައެއް ފާހަގަކޮށް އެ މައްސަލަ އިޞްލާޙްކުރާނެ ގޮތުގެ ލަފާ އޮޑިޓަރ ޖެނެރަލްގެ އޮފީހުން ދީފިއެވެ.

އެ އޮފީހުން ބުނީ އެންމެ ފުރަތަމަ ފާހަގަ ކުރެވުނު މައްސަލައަކީ 1440 ވަނަ އަހަރުގެ އަޟްހާ ޢީދު ފާހަގަކުރުމަށްޓަކައި ބޮޑުބެރު ޝޯއެއް ބޭއްވުމަށް ވެވުނު އެއްބަސްވުންތަކާއި ގުޅިގެން ފާހަގަކުރެވުނު ކަންތައްތައް ކަމަށެވެ.

އެގޮތުން ކޮލަމާފުށީ ކައުންސިލްގެ އިދާރާއިން އެ އިދާރާގެ ޕްރޮކިއުމަންޓުގެ ކަންކަން ހިންގުމުގައި ދައުލަތުގެ މާލިއްޔަތުގެ ގަވާއިދުގެ 6.01 ވަނަ މާއްދާގެ (ހ) އަދި އެ ގަވާއިދުގެ 10.01 ވަނަ މާއްދާގެ (ހ) އާއި ޚިލާފު ވެފައިވާކަމަށް އެ ރިޕޯޓުގައި ވަނީ ބަޔާން ކޮށްފައެވެ. އަދި ކައުންސިލްގެ އިދާރާއަށް އެއްވެސް ޚިދުމަތެއް ނުލިބި، އިޤުތިޞާދީގޮތުން ފައިދާއެއް ނެތް ކަމަކަށް ޚަރަދު ކުރެވިފައިވާކަމަށް ބަޔާންކޮށްފައިވެއެވެ.

(ހ) ދައުލަތުގެ މާލިއްޔަތުގެ ގަވާއިދުގެ 6.01 ވަނަ މާއްދާގެ (ހ)ގައި ދައުލަތުގެ ފައިސާ ޚަރަދު ކުރަންވާނީ، ޤާނޫނީ ހަމަތަކުގެމަތިންހޯދޭ ތަކެއްޗަށް، ނުވަތަ ލިބިގަނެވޭ ޚިދުމަތަށް، ނުވަތަ ކުރުވާ މަސައްކަތަށް، ނުވަތަ އަދާކުރާ ވަޒީފާގެ މުސާރައާއި އިނާޔަތަށް، ނުވަތަޤާނޫނާ އެއްގޮތަށް ދޫކުރެވޭ ލޯނާއި ޚާއްޞަ އެހީއަށް ޤާނޫނީ ހަމަތަކުގެމަތިން ޚަރަދުކުރުމަށް ހުއްދަކުރާ ފައިސާ ދޫކުރުމަށް ކަމަށްބަޔާންކޮށްފައިވާތީ އެގޮތުގެ މަތީން އަމަލު ކުރުމަށް ކައުންސިލްގެ ފަރާތުން ވަނީ އެދިފައެވެ.

(ށ) ދައުލަތުގެ މާލިއްޔަތުގެ ގަވާއިދުގެ 10.01 ވަނަ މާއްދާގެ (ހ) ގައި ދައުލަތުގެ ޕްރޮކުމަންޓް ނިޒާމު ހިންގުމުގައި ދައުލަތުގެފައިސާ ހޭދަކުރެވެނީ، އިޤުތިޞާދީގޮތުން އެންމެ ފައިދާހުރި ގޮތެއްގެމަތިންކަން ޔަޤީންކުރަންވާނެ ކަމަށް ބަޔާންކޮށްފައިވާތީ އެގޮތުގެމަތީން އަމަލު ކުރުމަށް އެ އޮފީހުން ވަނީ އެދިފައެވެ.

(ނ) ޚިދުމަތުގެ އެއްބަސްވުންތައް ތައްޔާރު ކުރުމުގައި ކައުންސިލްގެ އިދާރާއަށް ލިބޭ މާލީ ގެއްލުން ވީހާވެސް ކުޑަވާނެހެންއެއްބަސްވުންތައް ތައްޔާރުކުރުމާއިއެކު ކައުންސިލުން ހިންގާ އެކިއެކި ހަރަކާތް ހިންގުމުގައި ދައުލަތުގެ ފައިސާ އިސްރާފު ނުވާނެހެން އެކަންތައްތައް ދުރާލާ ރާވައިގެން ކުރިއަށް ގެންދިޔުމަށްވެސް ވަނީ އެދިފައެވެ.

އޮޑިޓަރ ޖެނެރަލް އޮފީހުން ބުނީ ފާހަގަ ކުރެވުނު ދެވަނަ މައްސަލައަކީ ހިނަވާގެ ހެދުމުގެ މަސައްކަތުގެ އަގު އަދާ ކުރުމުގައި ދައުލަތުގެ މާލިއްޔަތުގެ ގަވާއިދާއި އެއްގޮތަށް ރިޓެންޝަން ފައިސާ އުނިކޮށްފައި ނުވާ މައްސަލަ ކަމަށެވެ.

2019 ވަނަ އަހަރު ކޮލަމާފުށީގައި ހިނަވާގެއެއް އިމާރާތްކުރުމަށްކުންފުންޔަކާއި ހަވާލުކޮށް މި ޚިދުމަތަށް ފައިސާ ދެއްކުމުގައި ކައުންސިލްގެ އިދާރާއިން ދައުލަތުގެ މާލިއްޔަތުގެ ގަވާއިދުގެ 10.68 ވަނަ މާއްދާގެ (ހ)ގައި ވާގޮތުގެ މަތީން ރިޓެންޝަން ފައިސާ އުނިކޮށްފައިނުވާކަމަށް އޮޑިޓް ރިޕޯޓުގައި ވަނީ ފާހަގަކޮށްފައެވެ.

ދައުލަތުގެ މާލިއްޔަތުގެ ގަވާއިދުގެ 10.68 ވަނަ މާއްދާގެ (ހ) ގައި ވާގޮތުގެ މަތީން ރިޓެންޝަން ފައިސާ އުނިކުރުމަށް އޮޑިޓަރ ޖެނެރަލްގެ އޮފީހުން ވަނީ ލަފާދީފައެވެ.

އޮޑިޓަރ ޖެނެރަލްގެ އޮފީހުން ފާހަގަކޮށް ބަޔާން ކޮށްފައިވާ ތިންވަނަ މައްސަލައަކީ ފައިސާ ލިބެންޖެހޭ ފަރާތުގެ ލިޔުމެއް ނެތި ފައިސާ ލިބެންވާ އަސްލު ފަރާތް ނޫން އެހެން ފަރާތަކާއި ފައިސާ ހަވާލު ކޮށްފައިވާ މައްސަލައެވެ.

އެ އޮފީހުން ބުނީ ދައުލަތުގެ މާލިއްޔަތުގެ ގަވާއިދުގެ 6.15 ވަނަ މާއްދާގެ (ހ)އި ޚިލާފަށް ކައުންސިލްގެ އިދާރާއިން -/80,074 (އަށްޑިހަ ހާސް ހަތްދިހަ ހަތަރެއް) ރުފިޔާ، އެ ފައިސާ ލިބެންވާ އަސްލު ފަރާތުގެލިޔުމެއް ނެތި އެހެން ފަރާތްތަކާއި ހަވާލު ކޮށްފައިވާކަން ފާހަގަކުރެވިފައިވާ ކަމަށެވެ.

މި މައްސަލަ އިޞްލާޙްކުރަން ލަފާ ދިންގޮތަށް ބަލާއިރު އެ އޮފީހުން ބުނީ ފައިސާ ލިބެންވާ އަސްލު ފަރާތްނޫން އެހެން ފަރާތަކާއި ފައިސާ ހަވާލުކުރާނަމަ، ދައުލަތުގެ މާލިއްޔަތުގެ ގަވާއިދުގެ 6.15 ވަނަމާއްދާގެ (ހ) ގައިވާ ގޮތުގެ މަތީން ފައިސާ އަސްލު ލިބެންވާ ފަރާތުގެ ސޮއިކޮށްފައިވާ ލިޔުމެއް ހޯދުމަށްފަހު އެހެން ފަރާތްތަކާއިފައިސާ ހަވާލުކުރަމުން ގެންދިއުމަށް ދަންނަވާ ކަމަށެވެ.

އެ އޮފީހުން ފާހަގަ ކޮށްފައިވާ ހަތަރުވަނަ މައްސަލައަކީ ހަރުމުދަލުގެ ރަޖިސްޓްރީ ގަވާއިދާ އެއްގޮތަށް ބަލަހައްޓާފައި ނުވާ މައްސަލައެވެ.

އެގޮތުން ހަރުމުދަލުގެ ރަޖިސްޓްރީ ގަވާއިދާ އެއްގޮތަށް ބަލަހައްޓާފައި ނުވުމުގެ ސަބަބުން ހަރުމުދަލުގެ އަގުގެ ގޮތުގައި މާލީ ބަޔާނުގައި ހިމަނާފައިވާ -/738,070 (ހަތް ލައްކަ ތިރީސް އަށް ހާސް ހަތްދިހަ) ރުފިޔާ އަކީ ސައްޙަ އަދަދެއްކަން ކަށަވަރު ކުރެވެން ނެތްކަމަށް އެ ރިޕޯޓުގައި ބަޔާން ކުރެއެވެ.

އަދި ކައުންސިލްގެ އިދާރާއިން ހަރުމުދާ އެކި ބައިތަކަށް ބައިކޮށްފައިވަނީ ދައުލަތުގެ މާލިއްޔަތުގެ ގަވާއިދުގެ 11.04 ވަނަ މާއްދާގެ (ރ)ގައި ހަރުމުދަލުގެ އިންވެންޓްރީ އެކި ބައިތަކަށް ބައިކުރުމަށް ބަޔާންކޮށްފައިވާ ގޮތަށް ނޫންކަން ފާހަގަ ކުރެވިފައިވާކަމަށްވެސް ވަނީ ހާމަކޮށްފައެވެ.

(ހ) ދައުލަތުގެ މާލިއްޔަތުގެ ގަވާއިދުގެ 11.03 ވަނަ މާއްދާގެ (ބ) ގައި ބަޔާންކޮށްފައިވާ މަޢުލޫމާތު ތަކުގެ ތެރޭގައި ހިމެނޭއިންވެންޓްރީ ކޯޑު ނަންބަރު (މި ނަންބަރު މުދަލުގައިވެސް ޖަހަންވާނެއެވެ)، މުދަލުގެ ފުރިހަމަ ނަމާއި ތަފުޞީލު (ބްރޭންޑް، މޮޑެލް،ސީރިއަލް ނަންބަރު، މިން ނުވަތަ ބަރުދަން، މުދަލުގެ ހާލަތު، މަރާމާތެއް ކުރެވިފައިވާނަމަ އެކަމެއްގެ ތަފުސީލު އަދި މިނޫންވެސްމުހިންމު މަޢުލޫމާތު ހިމަނަންވާނެއެވެ)، މުދާ ހުރި ތަން، މުދާ ލިބުނު ތާރީޚު، މުދަލުގެ އަގު އަދި އިތުރު މަޢުލޫމާތު ހިމަނައިގެންހަރުމުދަލުގެ ރަޖިސްޓްރީ ބެލެހެއްޓުމަށް ކައުންސިލްގެ ފަރާތުން އެ އޮފީހުން އެދެއެވެ.

(ށ) ދައުލަތުގެ މާލިއްޔަތުގެ ގަވާއިދުގެ 11.04 ވަނަ މާއްދާގެ (ރ) ގައި ބަޔާންކުރެވިފައިވާ ގޮތަށް ހަރުމުދަލުގެ އިންވެންޓްރީ އެކިބައިތަކަށް ބައިކުރުމަށް ވަނީ އެދިފައެވެ.