ޖޯންސަންގެ ނުވަ މިލިއަން ޑޯޒް ވެކްސިން ހޯދުމަށް ކޮލަންބިއާ އިން އެއްބަސްވުމަކަށް!

ޖޯންސަން އެންޑް ޖޯންސަންގެ ނުވަ މިލިއަން ޑޯޒްގެ ކޮވިޑް ވެކްސިން ހޯދުމަށް ކޮލަންބިއާ އިން އެ ކުންފުންޏަކާއެކު އެއްބަސްވުމެއްގައި ސޮއިކޮށްފިއެވެ.

ޖޯންސަން އެންޑް ޖޯންސަން އާއެކު ވެކްސިންގެ ނުވަ މިލިއަން ޑޯޒް ހޯދުމަށް އެ ޤައުމަށް އެއްބަސްވުމެއްގައި ސޮއިކޮށްފައިވާއިރު އެމެރިކާގެ ފައިޒާ ކުންފުންޏާއި ޖަރުމަނުގެ ބައޯއެންޓެކް ކުންފުނި ގުޅިގެން އުފެއްދި ވެކްސިނާއި ޔޫކޭގެ ކޮވިޑް ވެކްސިންއެސްޓްރާޒެނެކާގެ ޖުމްލަ 20 ޑޯޒް ވެކްސިން ވަނީ ހޯދާފައެވެ.

އެ ޤައުމުގެ ރައީސް އިވާން ޑުކިއު ވިދާޅުވީ އެ ޤައުމުގެ އާބާދީގެ 35 މިލިއަން ރައްޔިތުންނަށް ވެކްސިން ހޯދައި ދިނުމަށްޓަކައި ކުރިއަތް އޮތް ދުވަސްތަކުގައި އިތުރު ވެކްސިން ޑޯޒްތައް ހޯދުމަށްޓަކައި މަސައްކަތް ކުރައްވާ، އެއްބަސްވުންތައް ހަދާނެ ކަމަށެވެ.

ކޮލަންބިއާއިން ވަނީ އެ ޤައުމުގެ ނޭޝަނަލް ވެކްސިނޭޝަން ޕްލޭންގެ ދަށުން ރައްޔިތުންނަށް ވެކްސިން ހިލޭ ދިނުމަށް ނިންމާފައެވެ. އަދި ވަކިން ވެކްސިން ގަންނަން ބޭނުންވާ ފަރާތްތަކަށް އަމަލު ކުރަން ޖެހޭ އުސޫލު އެކުލަވާލުމުގެ މަސައްކަތް ކުރަމުންދާ ކަމަށް އެ ޤައުމުގެ ހެލްތް މިނިސްޓްރީން ބުނެއެވެ.

ކޮލަންބިއާގައި އެންމެ ފުރަތަމަ ވެކްސިން ދިނުމަށް ހަމަޖެހިފައިވަނީ ސިއްހީ މަސައްކަތްތެރިންނަށެވެ. އެއަށްފަހު އުމުރުން 80 އަހަރަށް ވުރެން މަތީގެ މީހުންނަށް ވެކްސިން ދިނުމަށް ނިންމާފައިވާއިރު އުމުރުން 60 އަހަރާއި 79 އަހަރުގެ މީހުންނަށް ވެސް ވެކްސިން ދިނުމަށް ނިންމާފައިވެއެވެ. މީގެއިތުރުން ދާއިމީ ބަލިތަކަށް ބޭސް ކުރާ މީހުންނަށް ވެކްސިން ދޭން ނިންމާފައިވެއެވެ.

ކޮލަންބިއާގެ ކޮވިޑްގެ ހާލަތަށް ބަލާއިރު 1.6 މިލިއަނަށްވުރެ ގިނަ މީހުންނަށް ކޮވިޑް ޖެހިފައިވާއިރު ވައިރަސް ޖެހިގެން މަރުވި މީހުންގެ އަދަދު އުޅެނީ 43000ށްވުރެ ދަށުގައެވެ.