ކޮރަޕްޝަނުގެ އަމަލުތައް ހުއްޓުވުމަށް، ކަސްޓްމަސްގެ އޯގަނައިޒޭޝަން ސްޓަރަކްޗަރ އަށް ވަނީ ބަދަލު ގެނެވިފައި – ޝަރީފް
31 ޑިސެމްބަރު 2020 | ބުރާސްފަތި 02:02އިންޓެގްރެޓީ އެންޑް ޕްރޮފެޝަނަލް ސްޓޭންޑާޑް ސެކްޝަނެއް ވަނީ ހަދައިފައި
ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ރާއްޖެޓީވީގެ ފަލަ ސުރުހީ ޕްރޮގްރާމްގެ ތެރެއިން
ކަސްޓަމްސް ތެރޭގައި ހިނގާ ކޮރަޕްޝަނުގެ އަމަލުތައް ހުއްޓުވުމަށް، އެކުންފުނީގެ އޯގަނައިޒޭޝަން ސްޓްރަކްޗަރ އަށް ބަދަލު ގެނަސްފައިވާ ކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަދައްކަވަމުން ޝަރީފް ވިދާޅުވީ ސަރުކާރުގެ ޒީރޯ ޓޮލަރެންސް ފޯރ ކޮރަޕްޝަން ސިޔާސަތުގެ ދަށުން ކަސްޓަމްސްގައި ހިނގަމުން އަންނަ ކޮރަޕްޝަންގެ އަމަލުތައް ހުއްޓުވުމުގެ ގޮތުން އެ ކުންފުނީގެ އޯގަނައިޒޭޝަން ސްޓަކްޗަރއަށް ބަދަލުތަކެއް ގެނަސްފައިވާ ކަމަށާއި، އެގޮތުން އިންޓެގްރެޓީ އެންޑް ޕްރޮފެޝަނަލް ސްޓޭންޑާޑް ސެކްޝަނެއް ހަދާފައިވާ ކަމަށާއި، މި ސެކްޝަނަކީ މުވައްޒަފުންނާއި ގުޅިފައި ހުންނަ މައްސަލަތައް ބެލުމަށް ހަދާފައިވާ ސެކްޝަނެއް ކަމަށެވެ.
މީގެ އިތުރުން ޝަރީފް ވިދާޅުވީ މި ސެކްޝަނަކީ ބައިނަލްއަގްވާމީ އިންޓެގްރިޓީ ގައިޑްލައިނާއި، ނެޝަނަލް އިންޓެގްރިޓީ ކޮމިޝަން އަދި އޭސީސީ އާއި މަޝްވަރާކުރެއްވުމަށްފަހު ހަދާފައިވާ ސެކްޝަނެއް ކަމަށެވެ. އަދި މި ސެކްޝަނުގެ ސަބަބުން މުވައްޒަފުންގެ ނަޒާހަތްތެރިކަން ހިފެހެއްޓިގެންދާނެ ކަމަށް އޭނާ ވިދާޅުވިއެވެ.
ޝަރީފް ވިދާޅުވީ މި ސެކްޝަންގެ ސަބަބުން އަންނަ އަހަރު ކަސްޓަމްސްއަކީ ކޮރަޕްޝަނުގެ އަމަލުތައް ނުހިނގާ މުއަށްސަސާއަކަށް ވެގެންދާނެ ކަމުގެ ޔަގީންކަން އެބައޮތް ކަމަށެވެ.
