ޑިސެމްބަރ މަހު ކޮވިޑް19 އަށް ޕޮޒިޓިވްވި މީހުންގެ އަދަދު ފުރަތަމަ ފަހަރަށް 40ށް ވުރެ މަތިވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ފާއިތުވި 24 ގަޑީއިރު ރާއްޖެއިން 47 މީހަކު ޕޮޒިޓިވްފައިވާ ކަމަށެވެ. އޭގެތެރެއިން މާލެ ސަރަހައްދުން 30 މީހުން ކޮވިޑް-19 އަށް ޕޮޒިޓިވްވެފައިވެއެވެ. އަދި ރަށްރަށުން 2 މީހުން ޕޮޒިޓިވްވެފައިވާއިރު ހިނގަމުންދާ ރިސޯޓްތަކުން 15 މީހަކު ވަނީ ކޮވިޑަށް ޕޮޒިޓިވްވެފައެވެ.

އެޗްޕީއޭއިން ބުނީ އަންގާރަ ދުވަހުގެ އިރުއޮއްސި 6:00 އިން ބުދަ ދުވަހުގެ ރޭ އިރުއޮއްސި 6:00 އަށް ކޮވިޑް-19 އަށް 2974 ސާމްޕަލެއް ޓެސްޓްކޮށްފައިވާކަމަށެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 13738ށް އަރާފައެވެ. އަދި 13،125 މީހުން ވަނީ ބަލިން ރަނގަޅުވެފައެވެ. އެހެންކަމުން އެކްޓިވް ކޭސްގެ ގޮތުގައި ގުނަމުންދަނީ 558 މީހުންނެވެ. މީގެތެރެއިން 29 މީހަކަށް އަންނަނީ ހޮސްޕިޓަލުގައި ފަރުވާދެމުންނެވެ.

މިހާތަނަށް ރާއްޖެއިން މިބަލީގައި 48 މީހަކު ވަނީ ނިޔާވެފައެވެ.