ތޫނު ހަތިޔާރާއެކު މަސްދޯންޏަކަށް އަރައި ބިރުދެއްކި މައްސަލައިގައި 26 މީހެއްގެ މައްޗަށް ދައުވާކުރަން ނިންމައި ކޯޓަށް ހުށަހަޅައިފިއެވެ.

ޕްރޮސެކިއުޓަރ ޖެނެރަލް (ޕީޖީ) އޮފީހުގެ ޕަބްލިކް ޕްރޮސިކިރުޓަރ އަދި މީޑިއާ އޮފިޝަލް އަޙްމަދު ޝަފީޢު ވިދާޅުވީ، އެ 26 މީހުންގެ މައްސަލަ ހުށަހަޅާފައިވަނީ ލ. ގަމު މެޖިސްޓްރޭޓް ކޯޓަށް ކަމަށެވެ.

ޝަފީއު ވިދާޅުވީ، އެ 26 މީހުންގެ ދައުވާކުރަން ލ. ގަމު މެޖިސްޓްރޭޓް ކޯޓަށް ހުށަހަޅާފައިވަނީ، މި ޑިސެމްބަރު މަހުގެ 17 ވަނަ ދުވަހު ކަމަށެވެ. އަދި އެ މީހުންގެ މައްޗަށް އުފުލާފައިވަނީ، ބިރުދެއްކުމާއި، ނުރައްކާތެރި ހަތިޔާރާއި، ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދެވަނަ މާއްދާގެ ދަށުން ބިރު ދެއްކުމުގެ ކުށުގެ ދައުވާ ކަމަށްވެސް ވިދާޅުވިއެވެ.

އެންދަމަން އޮއްވާ "ފަސްކުރި" ދޯންޏަށް ތޫނު ހަތިޔާރާއެކު ބަޔަކު އެރި މައްސަލައިގައި މީގެ ކުރިން ބަޔަކު ހައްޔަރުކުރި ނަމަވެސް، ފުލުހުން ހައްޔަރުކުރި 16 މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، އެ އެންމެން ވަނީ ދޫކޮށްލާފައެވެ. ފުލުހުން ބުނެފައިވާގޮތުގައި، އެ ދޯންޏަށް ބަޔަކު އެރި ނަމަވެސް މާރާމާރީއެއް ހިންގާފައެއްނުވެއެވެ. އެހެން ނަމަވެސް ދޯންޏަށް ގެންދިޔަ ކަމަށް ބެލެވޭ ތޫނު އެއްޗެހި ދޯނި ތެރޭ ހުރުމުން އެ ތަކެތި ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

ފުލުހުން ހާމަކޮށްފައިވާ ގޮތުގައި، އެ މައްސަލައަކީ އެއްބަސްވުމެއްގެ ދަށުން ގަނެފައިވާ ދޯންޏަކަށް ވެފައި، އެއްބަސްވުމަށް އަމަލުނުކުރާ ކަމަށް ބުނެ، އުފެދިގެން އުޅޭ މައްސަލައެކެވެ.