ކައިވެނި ޕާޓީ ކްލަސްޓާއިން އަހަރު ނުފުރޭ ދެ ކުދިން ޕޮޒިޓިވްވެއްޖެ
29 ޑިސެމްބަރު 2020 | އަންގާރަ 19:13ކައިވެނި ޕާޓީ އޮތީ މި މަހުގެ 20 ވަނަ ދުވަހު
ގއ ވިލިނގިލި ކޮވިޑް ފެސިލިޓީއަށް ބަލި މީހަކު ގެންދަނީ
މި މަހުގެ 20 ވަނަ ދުވަހު މާލޭގައި އޮތް ކައިވެނި ޕާޓީއަކުން ޕޮޒިޓިވްވި މީހުންގެ ތެރޭގައި އަހަރު ނުފުރޭ 2 ކުދިން ހިމެނޭ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ހާމަކޮށްފިއެވެ.
އެޗްއީއޯސީން ހާމަކޮށްފައިވާ ތަފާސް ހިސާބުތަކުން ދައްކާ ގޮތުން، މިދިޔަ އާދިއްތަ ދުވަހާ ހަމައަށް އެ ކްލަސްޓާ އިން ޕޮޒިޓިވްވި މީހުންގެ އަދަދު ވަނީ 41 އަށް އަރައިފަ އެވެ. އަދި އެ އަދަދު މިއަދު ވަނީ 62 އަރައިފަ އެވެ.
އެޗްއީއޯސީން ކުރިން ބުނެފައިވާ ގޮތުން ޕޮޒިޓިވްވި މީހުންގެ ތެރޭގައި ހައި ރިސްކު ހަތަރު މީހަކު ވެސް ހިމެނެ އެވެ. ނަމަވެސް ކޮންމެ ދުވަހަކު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކުރާ ތަފާސް ހިސާބުގައި މި ކުލަސްޓާގެ މައުލޫމާތު ވަކިން ފެންނާކަށް ނުހުރެ އެވެ.
އެޗްޕީއޭ އިން ހާމަކޮށްފައިވާ މައުލޫމާތަށް ބަލާއިރު، އެ ކުލަސްޓާ އިން ޕޮޒިޓިވްވި މީހުންގެ ތެރޭގައި އަށް މަހުގެ އަންހެން ކުއްޖަކާއި ނުވަ މަހުގެ އަންހެން ކުއްޖަކު ވެސް ހިމެނެ އެވެ. އެ ދެކުދިން ވެސް ކޮވިޑަށް ޕޮޒިޓިވް ވެފައިވަނީ މިމަހުގެ 25 ވަނަ ދުވަހު އެވެ.
ޝީ ބިލްޑިންގައި ބޭއްވި ކައިވެނީގެ ހަފްލާއެއްގައި ކޮވިޑުގެ އަލާމާތްތައް ހުރި ބަޔަކު ބައިވެރިވުމުގެ ސަބަބުން އެންމެ ފުރަތަމަ މީހެއް ޕޮޒިޓިވްވީ މިމަހުގެ 24 ވަނަ ދުވަހުއެވެ. ނަމަވެސް އެ އަދަދު އިތުރުވެ، 25 ވަނަ ދުވަހު 12 މީހަކު، 26 ވަނަ ދުވަހު 21 މީހަކު އަދި 27 ވަނަ ދުވަހު އަށް މީހަކު ޕޮޒިޓިވްވެފައިވެއެވެ.
އެޗްޕީއޭ އިން މީގެ ކުރިން ވަނީ، އެ ހަފްލާއަށް ދިޔަ މީހުންގެ ތެރެއިން އެ އެޖެންސީން ނުގުޅާ މީހުން 1676 އަށް ގުޅައި، ވިހާވެސް ގިނަ މައުލޫމާތު ހިއްސާކުރުމަކީ މުހިންމު ކަމެއް ކަމަށް ބުނެފަ އެވެ. އަދި އެޗްޕީއޭ އިން އަދި ގުޅާފައި ނުވާ މީހުން ގެއިން ބޭރަށް ނުނިކުމެ، ގޭގައި އެކަހެރިވެ ތިބުމަށް ވަނީ އެދިފަ އެވެ.
