މޯލްޑިވިއަންގެ ސީޕްލޭން މަލިކަށް ކުރި ދަތުރު ތާރީހުގެ ތެރެއަށް
މޯލްޑިވިއަންގެ ފްލައިޓް މަލިކަށް ޖައްސާފައި ވަނީ އަހުމަދުއަބާދަށް ދިއުމުގެ މަގުމަތީގައި
މޯލްޑިވިއަންގެ ސީޕްލޭން މަލިކަށް ކުރި ދަތުރުގެ ތެރެއިން
ރާއްޖޭގެ ގައުމީ އެއަރލައިންގެ ސީޕްލޭން އިންޑިއާގެ މަލިކަށް ކުރި ދަތުރު ވެގެން ގޮސްފައި މިވަނީ ތާރީހުގައި ލިޔެވޭނެ ދަތުރަކަށެވެ.
ރާއްޖޭގެ އެއަރލައިނަކުން ފުރަތަމަ ފަހަރަށް މަލިކަށް ދަތުރުކޮށްފައިވާއިރު، މަލިކަށް އެއްވެސް އެއަރލައިނަކުން ދަތުރުކޮށްފައިވާކަމަށް ތާރީހުން ފެންނާކަށް ނެތެވެ. މަލިކާއި އެންމެ ކައިރިން އެއަރލައިންތަކަށް ދަތުރުކުރެވެން އޮންނަނީ ކޮޗިންއަށެވެ. އެހެންކަމުން މަލިކަށް މީހުން ދަތުރުކޮށް ހަދަނީ ފެރީގައެވެ.
އިންޑިއާގެ ސްޕައިސްޖެޓުން މަސްދުވަހުގެ މުއްދަތަށް ޗާޓާކޮށްފައިވާ މޯލްޑިވިއަންގެ ސީޕްލޭނުން އަހުމަދުއަބާދަށް ދިއުމުގެ މަގުމަތީގައި ދިވެހި ބަހުން ވާހަކަދައްކާ ރައްޔިތުން ދިރިއުޅޭ މަލިކަށް ޖައްސާފައިވާއިރު، މި ދަތުރުގައި މޯލްޑިވިއަންގެ ދިވެހި ހަ ފަޅުވެރިން ވަނީ ބައިވެރިވެފައެވެ.
އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ ދަތުރުފުޅަކަށް ގައުމީ އެއަރލައިން މޯލްޑިވިއަންގެ ސީޕްލޭނެއް ޗާރޓަރ ކުރުމަކީ އިންޑިއާ އާއި ރާއްޖެއާ އެއްގައުމު އަނެއްގައުމަށް ކުރާ އިޙްތިރާމް ރަމްޒުކޮށްދޭ ކަމެއްކަމަށް ޤައުމީ އެއަރލައިން މޯލްޑިވިއަން ހިންގަމުން އަންނަ ކުންފުނި، އައިލެންޑް އޭވިއޭޝަން ޕްރައިވެޓް ލިމިޓެޑުގެ މެނޭޖިން ޑިރެކްޓަރ މުޙައްމަދު ރިޒްވީ މީގެ ކުރިން ވަނީ ވިދާޅުވެފައެވެ.
ސްޕައިސްޖެޓްގެ މިދަތުރުތަކުގެ އިތުރުން، އިންޑިއާގައި ސީޕްލޭން ފެށުމަށް ޓެކްނިކަލް ސަޕޯޓް އެގައުމުން ބޭނުންވާނަމަ އެކަން ފޯރުކޮށްދޭނެ ކަމަށާއި އެފަދަ މަޝްވަރާތަކެއް މިހާރު ވެސް ކުރިއަށްދާ ކަމަށް ރިޒްވީ ވަނީ ވިދާޅުވެފައެވެ.
އިންޑިއާގައި ސީޕްލޭންގެ ހިދުމަތް ފައްޓަވައިދެއްވީ އެ ގައުމުގެ ގައުމީ އެއްބައިވަންތަކަމުގެ ދުވަހާ ދިމާކޮށް، ބޮޑުވަޒީރު ނަރެންދްރަ މޯދީއެވެ. މި ހިދުމަތް ފަށާފައި ވަނީ އިންޑިއާގެ ގުޖުރާތުގެ އަހުމަދު އާބާދުންނެވެ. ސީޕްލޭންގެ ހިދުމަތް ފެށުމަށް އެގައުމަށް މޯލްޑިވިއަންގެ ސީޕްލޭނެއް ވަނީ ގޮސްފައެވެ. އަދި މި ހިދުމަތް ފެށީ މޯލްޑިވިއަންގެ ސީޕްލޭންގެ ކްރޫންގެ އެހީތެރިކަމާ އެކުގައެވެ.
