ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ކުލަބު ވެލެންސިއާ އެއްވަރުވެއްޖެއެވެ.
ގައުމީ ފުޓްބޯޅަ ދަނޑުގައި ކުޅުނު މި މެޗު އެއްވަރުވީ ދެ ޓީމުންކުރެ ޓީމަކަށް ލަނޑެއް ނުޖެހި 0-0 ންނެވެ.
މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ފުރަތަމަ ހާފުގައި ދެ ޓީމަށްވެސް ވަނީ ލީޑު ނަގަން ރަނގަޅު ފުރުސަތުތަކެއް ލިބިފައެވެ. އެގޮތުން މެޗުގެ ވަރަށް ކުރީކޮޅު މާޒިޔާގެ ކެޕްޓަން އަސަދުﷲ އަބްދުﷲ އަށް ވަނީ އޭރިއާ ތެރެއިން ހުސް ފުރުސަތެއް ލިބިފައެވެ. އެކަމަކު ހުހަށްހުރެ އޭނާ ފޮނުވާލި ހަމަލާ ވެލެންސިއާގެ ގޯލްކީޕަރު މުޙައްމަދު ޝަފީއު ވަނީ މަތަކޮށްފައެވެ.
އޭގެ ފަހުން ފުރަތަމަ ހާފުގައި އެންމެ ހުސް ފުރުސަތެއް ލިބުނީ ވެލެންސިއާގެ ކެޕްޓަން އަލީ އަޝްފާގު (ދަގަނޑޭ) އަށެވެ. އަލީ ފާސިރު (ސެންޓޭ) ދިން ޕާހަކުން އޭރިއާ ތެރެއިން ދަގަނޑޭ ނުރައްކާތެރި ހަމަލާއެއް އުފެއްދި ނަމަވެސް، މާޒިޔާގެ ގޯލްކީޕަރު ނިކޯލާ ވުޔަނަޗް ވަނީ އެ ހަމަލާ ހުށިޔާރުކަމާއެކު ދިފާއުކޮށްފައެވެ.
މި މެޗުގެ ދެވަނަ ހާފު ފަށައިގެން ހަވަނަ މިނެޓުގައި މާޒިޔާގެ މިޑްފީލްޑަރު އިބްރާހީމް އައިސަމް އޭރިއާ ބޭރުން ބާރު ހަމަލާއެއް ފޮނުވާލިއިރު، އެ ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އަދި އޭގެ ދެ މިނެޓު ފަހުން ވެލެންސިއާގެ މިޑްފީލްޑަރު ހަސަން ސުފިއާނުވެސް އޭރިއާ ބޭރުން ބާރު ހަމަލާއެއް ފޮނުވާލިއިރު، އެ ހަމަލާ މާޒިޔާގެ ގޯލްކީޕަރު ވަނީ ހުށިޔާރުކަމާއެކު ދިފާއުކޮށްފައެވެ.
މެޗަށްފަހު މާޒިޔާގެ ކޯޗު މުޙައްމަދު ނިޒާމް (ނިޒާމްބެ) ބުނީ އޭނާގެ ޓީމުން ކުޅުނީ ގޭމްޕްލޭނާ އެއްގޮތަކަށް ނޫން ކަމަށާއި، އެއަށް ވުރެން ބޮޑަށް މި މެޗުގައި މާޒިޔާއިން ކުޅުނީ އިދިކޮޅު ޓީމުން ކުޅޭ ގޮތަށް ސަމާލުވެގެން ކަމަށެވެ.
ވެލެންސިއާގެ ކޯޗު މުޙައްމަދު އާތިފް (އާތީ) ބުނީ ކުރިންވެސް ބެލެވުނު ގޮތަށް މިއީ ވަރަށް ޗެލެންޖިންގ މެޗެއް ކަމަށާއި، ހާލަތުގެ ގޮތުން މި ޕޮއިންޓަކީ މި ވަގުތަށް މާޒިޔާ ކައިރިން މޮޅެއްގެ ގޮތުގައި ދެކެވިދާނެ ކަމަށެވެ. އަދި ލީގުގެ ފުރަތަމަ ބުރު ނިމި، ދެވަނަ ބުރާ ހިސާބަށް ދާއިރު ވެލެންސިއާ އެންމެ ބޭނުންވާ ފެންވަރަށް ކުޅޭނެ ކަމުގެ އުއްމީދު މި މެޗުން އައު ވެގެން ގޮސްފި ކަމަށްވެސް އާތީ ބުންޏެވެ.
މި ނަތީޖާއާއެކު ލީގުގައި މިހާތަނަށް ކުޅުނު ތިން މެޗުން މާޒިޔާ އާއި ވެލެންސިއާއަށް ލިބިފައިވަނީ ހަތް ޕޮއިންޓެވެ. މީގެ ތެރެއިން މާޒިޔާއަށް ކުރި ލިބެނީ ފައިދާ ލަނޑުންނެވެ. އަދި ހޮނިހިރު ދުވަހުގެރޭ ކުޅުނު މެޗު އެއްވަރުވުމާއެކު، ލީގުގެ ތިންވަނަ ހަފުތާގައި ކުޅުނު ހަތަރު މެޗުވެސް ނިމިފައިމިވަނީ އެއްވަރުވެގެންނެވެ.
