ފުލުހުންގެ ފްރަންޓްލައިން ޕޮލިސިންގ ސިމްޕޯޒިއަމް ނިންމާލައިފި

މޯލްޑިވްސް ޕޮލިސް ސަރވިސްގެ ފަރާތުން ސީދާ ގޮތުން ރައްޔިތުންނަށް ދެވޭ ފުލުހުންގެ ޚިދުމަތްތައް ހަރުދަނާކުރުމަށްޓަކައި ގެންނަންޖެހޭ ބަދަލުތަކާ މެދު މަޝްވަރާކުރުމަށް ބޭއްވި "ފްރަންޓްލައިން ޕޮލިސިންގ ސިމްޕޯޒިއަމް" ނިންމާލައިފިއެވެ.

މި މަހުގެ 22ން 24ށް އިސްކަންދަރު ކޮށީގައި ކުރިއަށްގެންދިޔަ މި ސިމްޕޯޒިއަމް ނިންމުމުގެ ގޮތުން ބޭއްވި ރަސްމިއްޔާތު ޝަރަފުވެރި ކޮށްދެއްވީ އެސިސްޓެންޓް ކަމިޝަނަރ އޮފް ޕޮލިސް އަޙްމަދު އަބްދުއްރަހުމާނެވެ.

މި ރަސްމިއްޔާތުގައި އެސިސްޓަންޓް ކޮމިޝަނަރ އޮފް ޕޮލިސް އަަޙްމަދު ޢަބްދުއްރަހުމާން ދެއްކެވި ވާހަކައިގައި މިދަފަ ސިމްޕޯޒިއަމެއް ކުރިއަށް ގެންދިޔުމުގެ ބޭނުމަކީ ފުލުހުންގެ ޚިދުމަތް ދިނުމުގައި ހުރި ދަތިތަކާއި، އެ ޚިދުމަތް މިހާރަށްވުރެ ހަރުދަނާކުރުމުގެ ގޮތުން ކުރެވެންހުރި ކަންކަމާ ގުޅޭގޮތުން މަޝްވަރާކުރުން ކަމަށާއި، އެގޮތުން ކުރެވުނު މަޝްވަރާތަކުން އެދެވޭ ހެޔޮ ނަތީޖާއެއް ފެންނާނެ ކަމަށް ދެކިލައްވާ ކަމަށް ވިދާޅުވިއެވެ. އަދި މި ސިމްޕޯޒިއަމަކީ ހެޔޮ ބަދަލު ތަކެއްގެ ފެށުން ކަމުގައިވެސް ވިދާޅުވިއެވެ.

ތިން ދުވަހުގެ މުއްދަތަށް ކުރިއަށްގެންދިޔަ މި ސިމްޕޯޒިިއަމަކީ ފްރަންޓްލައިން ޕޮލިސިންގެ ދާއިރާގައި ހުރި މައްސަލަތަކާއި، އެކަންކަމަށް ހޯދޭނެ ހައްލުތަކާ މެދު މަޝްވަރާކޮށް، ތަންފީޒީ މަރުހަލާއަކަށް އެކަންތައްތައް ގެންދިއުމަށް ކުރަންހުރި މަސައްކަތްތައް ދެނެގަތުމުގެ ގޮތުން ބޭއްވި ސިމްޕޯޒިއަމެކެވެ. އަދި މި ސިމްޕޯޒިއަމުގައި ފްރަންޓްލައިން ޕޮލިސިންގ ހަރުދަނާކުރުމަށް ގެންނަނަންޖެހޭ ބަދަލުތައް ދެނެގަތުމާއި، ފްރޮންޓްލައިން ޚިދުމަތްތައް ދިނުމުގައި ދިމާވާ މައްސަލަތައް ހައްލުކުރުމަށް އަމަލުކުރާނެ ރާސްތާގެ އަމަލީ އެޖެންޑާއެއް އެކުލަވާލާފައިވެއެވެެ. ހަމައެއާއެކު ފްރަންޓްލައިން ފުލުހުންގެ މަސައްކަތް އިތުރަށް ހަރުދަނާކުރެވި، އާންމު ރައްޔިތުންނަށް ދޭ ޚިދުމަތުގެ ފެންވަރު ރަނގަޅުކުރުމާއި، ފްރަންޓްލައިން ފުލުހެއްގެ ޒިންމާ އާއި ވާޖިބު އަދާ ކުރުމުގައި ލިބެންހުރި ވަސީލަތްތައް ބޭނުންކުރުމުގައި އަދި މެނޭޖުކުރުމުގައި ހުރި ގޮންޖެހުންތަކާއި ހުރަސްތައް އަދި ރަނގަޅު ކުރަން ކުރެވެންހުރި ކަންކަން ދެނެގަނެވިފައިވެއެވެ.

މީގެ އިތުރުން ފްރަންޓްލައިން ފުލުހުންގެ މަސައްކަތްތައް ޓެކްނޮލޮޖީ ދާއިރާއިން އިތުރަށް ރަނގަޅު ކުރެވޭނެ ގޮތްތަކާއި، މިހާރު ހުރި މައްސަލަތައް ދެނެގަނެ އެކަންކަން ހައްލުކުރުމަށް ކުރެވެންހުރި މަސައްކަތްތައް ދެނެގަތުމާއި، ފުލުހުންނަށް އެންމެ މުހިންމު ތަމްރީނުތައް ދެނެގަތުމާއި، މިހާރު ދެމުންގެންދާ ތަމްރީނުތަކުގައި ހުރި މައްސަލަތައް ދެނެގަނެ އެކަންކަން ރަނގަޅުކުރެވޭނެ ގޮތްތައް ހޯދުމާއި، ފުލުހުންގެ ދައުރު އަދާކުރުމުގައި ޤާނޫނުތަކުން ދިމާވާ ދަތިތައް މި ސިމްޕޯޒިއަމުގެ ތެރެއިން ވަނީ ދެނެގަނެވިފައެވެ. އަދި ފުލުހުންގެ ބެލުމުގެ ދަށަށް ގެނެވޭ މީހުންނާއި ތަކެއްޗާ މެދު އަމަލުކުރުމުގައި ތަހުގީގު މަރުހަލާގައި ހުރި ދަތިތަކާއި، ތަހުގީގު މަރުހަލާ ކުރިއަށްދާއިރު ފްރަންޓްލައިނުގައި މަސައްކަތްކުރާ މުވައްޒަފުންނާއި ތަހްގީގުކުރާ ފަރާތްތައް ގުޅިގެން މަސައްކަތް އިތުރަށް ރަނގަޅުކުރުމަށް ކުރެވިދާނެ ކަންތައްތައް ދެނެގަތުމުގެ އިތުރުން އިންޓެލިޖެންސްގެ އެހީތެރިކަން ފޯރުކޮށްދިނުމުގައި ހުރި ދަތިތައް ދެނެގަތުމާއި، އިތުރަށް ރަގަނޅުކުރެވިދާނެ ކަންތައްތައް މި ސިމްޕޯޒިއަމުގެ ތެރެއިން ދެނެގަނެވިފައިވެއެވެ.

މި ސިމްޕޯޒިއަމުގައި ސެންޓްރަލް ޕޮލިސިންގ ކޮމާންޑާއި، ޑިވިޜަނަލް ޕޮލިސިންގ ކޮމާންޑާއި، ކްރައިމް އިންވެސްޓިގޭޝަން ކޮމާންޑާއި، ފޮރެންސިކް ސަރވިސަސް އަދި ޑައިރެކްޓަރޭޓް އޮފް އިންޓެލިޖެންސްގެ މުވައްޒަފުން ބައިވެރިވެފައިވެއެވެ. މި ބައިވެރިންގެ ތެރޭގައި ވާޗުއަލްކޮށް ބައިވެރިވާ މުވައްޒަފުންވެސް ހިމެނެއެވެ. މި ސިމްޕޯޒިއަމުގައި އޮބްޒާވަރުންގެ ގޮތުގައި ޕޮރޮފެޝަނަލް ސްޓޭންޑާރޑް ކޮމާންޑާއި، ލީގަލް ޑިޕާޓްމަންޓާއި، ޓްރެއިން އެންޑް ޑިވެލޮޕްމެންޓާއި ހިއުމަން ރިސޯސް ޑިވެލޮޕްމެންޓާއި، އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ސަރވިސަސް އާއި، ލޮޖިސްޓިކް ސަރވިސް އަދި ކްރައިމް ޕްރިވެންޝަން އެންޑް ޕަބްލިކް އެފެއާރޒުންވެސް ވަނީ ބައިވެރިވެފައެވެ.