އެމްއެމްއޭގެ ޤާނޫނަށް އިސްލާހު ގެނައި ބިލު ތަސްދީގުކޮށްފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޤާނޫނަށް ހަތަރުވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ތަސްދީގުކުރައްވައިފިއެވެ.

މޯލްޑިވްސް މަނިޓަރީ އޮތޯރިޓީގެ ޤާނޫނަކީ 1981 ވަނަ އަހަރު ވުޖުދޫވި ޤާނޫނެކެވެ. އެ ޤާނޫނަށް އިސްލާހު ގެނައި މި ބިލަކީ، މި ޑިސެމްބަރު މަހުގެ ހަތްވަނަ ދުވަހު ބޭއްވި ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ 28 ވަނަ ޖަލްސާގައި ފާސްކުރި ބިލެކެވެ.

Advertisement

މި އިސްލާހުގެ ދަށުން އެމްއެމްއޭގެ މައިގަނޑު މަގުސަދުތަކަށް އިސްލާހު ގެނެސްފައިވެއެވެ. އެ ގޮތުން އެ އޮތޯރިޓީގެ މައިގަނޑު މަގުސަދުތަކުގެ ތެރޭގައި ދެމެހެއްޓެނިވި އިގުތިސޯދީ ކުރިއެރުމަށް މަގުފަހިވާ ގޮތެއްގައި ޕްރައިސް ސްޓެބިލިޓީ ދެމެހެއްޓުމާއި، މި މަގުސަދު ހާސިލުކުރުމާއެކު ފައިނޭންޝަލް ސްޓެބިލިޓީ ދެމެހެއްޓުމުގެ ޒިންމާތައް ހިމަނާފައިވެއެވެ. ހަމަ އެއާއެކު ރާއްޖޭގެ އިގުތިސޯދީ ހަމަޖެހުމާއި ކުރިއެރުން ގެނައުމަށް ސަރުކާރަށް އެހީތެރިވުން ވެސް އެމްއެމްއޭގެ މައިގަނޑު މަގުސަދުތަކުގެ ތެރޭގައި މި ބިލުގައި ހިމަނާފައިވެއެވެ.

އެމްއެމްއޭގެ ޤާނޫނަށް ގެނައި މި އިސްލާހުގައި ޤާނޫނުގައިވާ ބައެއް މާނަކުރުންތަކަށްވެސް ބަދަލު ގެނެސްފައިވެއެވެ. އެ ގޮތުން، މާލީ އިދާރާ، ބޭންކު-ނޫން މާލީ ވިޔަފާރި، އަދި ޤާނޫނުގައި "ސަރުކާރުގެ ސެކިއުރިޓީޒްގެ ޕްރައިމަރީ ޑީލަރުކަން" މާނަކޮށް މި ބިލުގައި ހިމަނާފައި ވެއެވެ. މީގެ އިތުރުން، އެމްއެމްއޭގެ ގަވަރުނަރާއި ޑެޕިއުޓީ ގަވަރުނަރާއި ޑިރެކްޓަރުންގެ ބޯޑު އެކުލެވިގެންވާ ގޮތާއި، އެ މަގާމުތަކާ ގުޅިގެން ހުރި ބައެއް މާއްދާތަކަށްވެސް އިސްލާހު ގެނެސްފައިވެއެވެ. ހަމައެހެންމެ، އެމްއެމްއޭގެ މަސައްކަތްތަކާ ގުޅޭ މާއްދާތަކަށް އިސްލާހު ގެނައުމުގެ އިތުރުން، މި ބިލުގައި އަލަށް ހިމަނާފައިވާ މާއްދާތަކާ ބައިތަކުގެ ތެރޭގައި ފޮރިން އެކްސްޗޭންޖާ ބެހޭ ކަންކަންކަމާއި، "ކްރެޑިޓް އިންފޮމޭޝަން ސިސްޓަމް" އަދި "ސެކިއުރިޓީޒް މާކެޓް" އާ ގުޅޭ ކަންކަން މި ބިލުގައި ހިމަނާފައިވެއެވެ.

މޯލްޑިވްސް މަނިޓަރީ އޮތޯރިޓީގެ ޤާނޫނަށް ހަތަރުވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގުކުރެއްވުމާއެކު، މި ޤާނޫނު ބުރާސްފަތި ދުވަހު ވަނީ ދިވެހި ސަރުކާރުގެ ގެޒެޓުގައި ޝާއިއުކޮށް، އަމަލުކުރަން ފަށާފައެވެ.