ސީލައިފް މޯލްޑިވްސް ޕްރައިވެޓް ލިމިޓެޑާއެކު 2018 ވަނަ އަހަރުގެ ފެބްރުއަރީ މަހު ދައުލަތުން ވެފައިވާ ސެޓްލްމަންޓް އެގްރީމަންޓު ބާތިލު ކުރުމުން އެ ކުންފުންޏަށް ލިބުނު ގެއްލުމުގެ ބަދަލު ހޯދުމަށް އެދި ސިވިލް ކޯޓަށް ހުށައެޅި މައްސަލަ އެ ކުންފުންޏާ ދެކޮޅަށް ނިމިއްޖެއެވެ.
މި މައްސަލައިގައި ބުދަ ދުވަހު ސިވިލް ކޯޓުން ކުރި ޙުކުމުގައި ބުނެފައިވަނީ، އެގްރީމަންޓު ބާތިލު ކުރިކަން ހައުސިންގ މިނިސްޓްރީން ކުންފުންޏަށް އަންގާފައިވަނީ 2018 ވަނަ އަހަރުގެ މާރޗު މަހުގެ ތެރޭގައި ކަމަށެވެ. އަދި އައު ސަރުކާރު އައިސް އެކުލަވާލި އެސެޓް ރިކަވަރީ ކޮމިޝަނުންވެސް މި މައްސަލައިގައި ކަން ހިނގާފައިވާ ގޮތް ބަލާފައިވާކަން ސިވިލް ކޯޓުގެ ޙުކުމުގައި ފާހަގަ ކޮށްފައިވެއެވެ.
މި މައްސަލައިގައި ސިވިލް ކޯޓުން ކުރި ޙުކުމުގައި ބުނެފައިވަނީ، އެސެޓް ރިކަވަރީ ކޮމިޝަނުން މި މައްސަލައިގެ ލިއެކިއުންތައް ހިސާބުކޮށް ބެލިއިރު، ސީލައިފުން ކޮށްފައިވާ ޚަރަދުތައް ކަމަށް ސެޓެލްމަންޓް އެގްރީމަންޓުގައި ބަޔާން ކޮށްފައިވާ ޚަރަދުތައް ދިމާނުވާ ކަމަށެވެ. އަދި އެގްރީމަންޓުގައި ބަޔާންކޮށްފައިވާ އަދަދުތަކާމެދު ކޮމިޝަނުންވެސް ސުވާލު އުފައްދާފައިވާކަން ފާހަގަކޮށް ސިވިލް ކޯޓުން ބުނީ، މިއީ ބާތިލު ކުރުމުގެ އިހުތިޔާރު ލިބިގެންވާ އެއްބަސްވުމެއް ކަމަށެވެ.
އޭގެ އިތުރުން، އެގްރީމަންޓުގައި ބަޔާން ކޮށްފައިވާ ޚަރަދުތައް ރަނގަޅު ކަމަށް ބަލައި އޭރު ހައުސިންގ މިނިސްޓްރީން ސޮއިކޮށްފައި އޮތުމަކީ މިހާރު ސުވާލު އުފެދިފައިވާ ދަނޑިވަޅެއްގައިވެސް އެކަންކަން ކަށަވަރު ކުރުމެއްނެތި, ބަދަލު ދެވޭނެ ސަބަބެއް ކަމަށް ޝަރީއަތަށް ބުރަވެވެން ނެތް ކަމަށްވެސް ސިވިލް ކޯޓުން ވަނީ ކަނޑައަޅާފައެވެ.
ސީލައިފްގެ ފަރާތުން 180 އަށް ވުރެ ގިނަ މީހުންގެ އަތުން ބޮޑެތި އަދަދުތަކުން ފައިސާ ނަގާފައިވާ އިރު ސީލައިފް އިން ފައިސާ ނެގި އެކި ފަރާތްތަކާ އެގްރީމެންޓް ވެސް ކުރެވިފައި ވަނީ އެކި ގޮތްގޮތަކަށެވެ. އެގޮތުން ތިން ރޫމް އެޕާޓްމެންޓް 3 މިލިއަން ރުފިޔާއަށް ވިއްކުމަށް ބައެއް ފަރާތްތަކާ އެގްރީމެންޓް ކުރެވިފައިވާ އިރު އަނެއްބައި ފަރާތްތަކާ ތިން ރޫމް އެޕާޓްމެންޓް އެއް މިލިއަން ރުފިޔާ އަށް ވެސް ވިއްކުމަށް އެގްރީމެންޓް ކުރެވިފައިވެއެވެ.
ސީލައިފް ގްލޯބަލްއިން ހުޅުމާލޭގައި ގިނަ އަދަދެއްގެ ފްލެޓްތަކެއް އެޅުމުގެ މަޝްރޫއުގެ ބިންގާ އަޅުއްވައި ދެއްވާފައި ވަނީ ކުރީގެ ރައީސް އަބްދުﷲ ޔާމީނެވެ. އެހެން ނަމަވެސް ކުންފުނީގެ ފަރާތުން ހުޅުމާލޭގައި އިމާރާތް ކުރަން ހަވާލުކުރެވުނު 3000 ހައުސިންގ ޔުނިޓްގެ މަޝްރޫއު އެއްވެސް ވަރަކަށް ކުރިޔަށް ގެންގޮސްފައެއް ނުވެއެވެ. އެ ގްލޯބަލް ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އައްމަޓީ) އަކީ ކުރީގެ ރައީސް ޔާމީންއާވެސް ގާތް ގުޅުމެއް އޮންނަ މީހެކެވެ.
