ސެމީގެ ފަހު ދެ ޖާގަ ޔުނައިޓެޑާއި ޓޮޓެންހަމަށް

އިނގިރޭސި ލީގު ކަޕުގެ ސެމީފައިނަލުގެ ފަހު ދެ ޖާގަ މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާ ހޯދައިފިއެވެ.

ސެމީއަށް ޔުނައިޓެޑް ދަތުރުކުރީ ބުދަ ދުވަހުގެރޭ ކުޅުނު ކުއާޓާފައިނަލް މެޗުގައި އެވަޓަން އަތުން ފަހު ވަގުތު 2-0 ގެ ނަތީޖާއަކުން މޮޅުވެގެންނެވެ.

އެވަޓަނުގެ ދަނޑުގައި ކުޅުނު މި މެޗުގައި ޔުނައިޓެޑުގެ ފަރާތުން ގިނަ ހަމަލާތަކެއް ފެނިގެންދިޔަ ނަމަވެސް، މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ. މި މެޗުގައި ޔުނައިޓެޑުން ޖެހި ދެ ލަނޑުވެސް އެ ޓީމުން ކާމިޔާބުކޮށްފައިވަނީ މެޗުގެ ފަހު ވަގުތެވެ. އެގޮތުން މި މެޗުގައި ޔުނައިޓެޑުން ލީޑު ނަގާފައިވަނީ މެޗު ނިމެން ދެ މިނެޓަށް ވެފައި ވަނިކޮށެވެ. އެންތަނީ މާޝިއަލް ތަނަވަސްކޮށްދިން ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ އެޑިންސަން ކަވާނީއެވެ. އަދި މި މެޗުގައި ޔުނައިޓެޑުން ލީޑު ފުޅާކޮށްފައިވަނީ މެޗުގެ ފަހު މިނެޓުގައެވެ. މާކަސް ރަޝްފޯޑުގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ މާޝިއަލެވެ.

އެވަޓަން ބަލިކޮށް ޔުނައިޓެޑުން ލީގު ކަޕުގެ ސެމީން ޖާގަ ހޯދިއިރު، ސެމީގައި ޔުނައިޓެޑް ބައްދަލުކުރަން ޖެހޭނީ ވާދަވެރި މެންޗެސްޓާ ސިޓީއާއެވެ. މި މުބާރާތުގެ އެންމެ ފަހުގެ ޗެމްޕިއަން ޓީމު ކަމަށްވާ ސިޓީ ސެމީއަށް ދަތުރުކޮށްފައިވަނީ ކުއާޓާގައި އާސެނަލް އަތުން 4-2 ން މޮޅުވެގެންނެވެ.

މީގެ އިތުރުން ސެމީގެ ޖާގައެއް ޓޮޓެންހަމް ހޯދީ ބުދަ ދުވަހުގެރޭ ކުޅުނު ކުއާޓާ މެޗުގައި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވާދަކުރަމުން އަންނަ ސްޓޯކް ސިޓީ އަތުން 3-1 ގެ ނަތީޖާއަކުން މޮޅުވެގެންނެވެ.

ސްޓޯކުގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޓޮޓެންހަމުންނެވެ. މެޗުގެ 22 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ގެރެތު ބޭލެވެ. އެކަމަކު ދެވަނަ ހާފު ފަށައިގެން އަށްވަނަ މިނެޓުގައި ޖޯޑަން ތޮމްޕްސަން ވަނީ ސްޓޯކަށް ނަތީޖާ އެއްވަރުކޮށްދީފައެވެ. މި މެޗުގައި ޓޮޓެންހަމުން ދެވަނަ ފަހަރަށް ލީޑު ނަގާފައިވަނީ މެޗުގެ 70 ވަނަ މިނެޓުގައެވެ. މި ލަނޑު އެ ޓީމަށް ޖަހައިދިނީ ބެން ޑޭވީސްއެވެ. އަދި އޭގެ 11 މިނެޓު ފަހުން ހެރީ ކޭން ވަނީ ޓޮޓެންހަމަށް ލީޑު ފުޅާކޮށްދީފައެވެ.

ސްޓޯކް ބަލިކޮށް ޓޮޓެންހަމުން ލީގު ކަޕުގެ ސެމީން ޖާގަ ހޯދިއިރު، ސެމީގައި ޓޮޓެންހަމް ބައްދަލުކުރަން ޖެހޭނީ ދެވަނަ ޑިވިޝަނުގެ ޓީމެއް ކަމަށްވާ ބްރެންޓްފޯޑާއެވެ. ބްރެންޓްފޯޑް ސެމީއަށް ދަތުރުކޮށްފައިވަނީ ކުއާޓާގައި ނިއުކާސަލް ޔުނައިޓެޑް އަތުން 1-0 ން މޮޅުވެގެންނެވެ. މިއީ ބްރެންޓްފޯޑުގެ ތާރީޚުގައި ބޮޑު މުބާރާތެއްގެ ސެމީން އެ ޓީމު ޖާގައެއް ހޯދި ފުރަތަމަ ފަހަރެވެ.