ކުޅިވަރާ ބެހޭ ވުޒާރާ އާއި ސްޕެޝަލް އޮލިމްޕިކްސް މޯލްޑިވްސް އަދި މޯލްޑިވްސް ޕެރަލިމްޕިކް ކޮމިޓީ ގުޅިގެން ހާއްސަ އެހީއަށް ބޭނުންވާ ކުދިންނަށް ކުޅިވަރުގެ ހަރަކާތްތަކުގައި ބައިވެރިވުމަށް ހާއްސަ ފުރުސަތެއް ހުޅުވާލައިފިއެވެ.

ހަތަރު ކުޅިވަރެއް ހިމެނޭގޮތަށް ކުރިއަށްގެންދާ މި ކުޅިވަރު ހަރަކާތުގައި ބައިވެރިވުމަށް މި މަހުގެ 31 ވަނަ ދުވަހުގެ ނިޔަލަށް ހާއްސަ އެހީއަށް ބޭނުންވާ ކުދިނަށްނަށް ފުރުސަތު ހުޅުވާލާފައިވާއިރު، އޮންލައިން މެދުވެރިކޮށް އަދި ފޯމް ފުރައިގެންވެސް މި ހަރަކާތުގައި ކުދިން ބައިވެރިކުރެވޭނެ ކަމަށާއި، އެކަމަށްވެސް އުނދަގޫވާނަމަ ގުޅައިގެންވެސް އެ ކުދިން މި ހަރަކާތުގައި ބައިވެރިކުރެވޭނެ ކަމަށް މި ހަރަކާތް ކުރިއަށްގެންދާ ސްޕެޝަލް އޮލިމްޕިކްސް މޯލްޑިވްސް އަދި މޯލްޑިވްސް ޕެރަލިމްޕިކް ކޮމިޓީން މައުލޫމާތުދެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ހޯމަ ދުވަހުގެރޭ ވާހަކަ ދައްކަވަމުން ސްޕެޝަލް އޮލިމްޕިކްސް މޯލްޑިވްސްގެ ޑައިރެކްޓަރު އޮފް ސްޕޯޓްސް އިބްރާހީމް ރަމީޒް ވިދާޅުވީ ކިތަންމެ ކުޑަކޮށް ހަރަކާތްތެރިވާ ކުއްޖެއް ނަމަވެސް މި ހަރަކާތުގައި ބައިވެރިކުރުމަށް ބެލެނިވެރިންގެ ކިބައިން އެދޭ ކަމަށެވެ. އަދި މި ޕްރޮގްރާމުތަކުގެ ބޭނުމަކީ އާދައިގެ ކުދިން ފަދައިން ހާއްސަ އެހީއަށް ބޭނުންވާ ކުދިންނަށް ގިނަ ފުރުސަތުތަކެއް ހޯދައިދިނުން ކަމަށާއި، ހާއްސަކޮށް ކުޅިވަރުގެ ތެރެއިން އެ ކުދިންގެ ހުނަރުވެރިކަން ދެއްކުން ކަމަށްވެސް އިބްރާހީމް ރަމީޒް ވިދާޅުވިއެވެ.

މި ހަރަކާތުގެ ބެލެނިވެރިއެއް ކަމަށްވާ އާއިމިނަތު މުސްތަރީ ވިދާޅުވީ މިއީ ހާއްސަ އެހީއަށް ބޭނުންވާ ކުދިންގެ ބެނެލިވެރިން ކޮންމެހެންވެސް ބޭނުންކުރަން ޖެހޭ ފުރުސަތެއް ކަމަށާއި، ކުޅިވަރުގެ ތެރެއިން އެ ކުދިންނަށް ލިބިގެންދާ ފުރުސަތުތަކަކީ ވަރަށްވެސް ބޭނުންތެރި، އެކަމުގެ ސަބަބުން ގިނަ ފައިދާތަކެއް ކުދިންނަށް ލިބޭނެ ކަމެއް ކަމަށެވެ. އަދި މީގެ ކުރިން ކުރިއަށްގެންދިޔަ ޕްރޮގްރާމުތަކުގައި ބައިވެރިވި ކުދިންގެ ފަރާތުން އެ ކުދިން އަމިއްލައަށް އުޅެން ދަސްވުމާއެކު މުޖުތަމައުގެ ތެރޭގައި އުޅެން ދަސްވެގެންދިޔަކަން ފާހަގަ ކުރެވޭ ކަމަށްވެސް މުސްތަރީ ވިދާޅުވިއެވެ.

މި ޕްރޮގްރާމްގައި ވާހަކަ ދައްކަވަމުން ޖިސްމާނީ ނުކުޅެދުންތެރިކަން ހުންނަ މީހުންނަށް ހާއްސަކޮށްގެން އުފައްދާފައިވާ ޕެރަލިމްޕިކްސް ކޮމިޓީގެ ސެކްރެޓަރީ ޖެނެރަލް އަޙްމަދު މުޙައްމަދު ވިދާޅުވީ ކުޅިވަރުގެ ތެރެއިން ނުކުޅެދުންތެރިކަން ހުންނަ ކުދިންނަށް ގިނަ ފުރުސަތުތަކެއް ބައިނަލްއަގުވާމީ މައިދާނުގައިވެސް ހުޅުވެމުންދާ ކަމަށެވެ.

ފެތުމާއި، ބެޑްމިންޓަނާއި، އެތުލެޓިކްސް އަދި ފުޓްބޯޅަ ހިމެނޭގޮތަށް ކުރިއަށްގެންދާ މި ޕްރޮގްރާމްތަކުގައި ކުދިން ބައިވެރިކުރުމަށް ސްޕެޝަލް އޮލިމްޕިކްސް މޯލްޑިވްސް އަދި މޯލްޑިވްސް ޕެރަލިމްޕިކް ކޮމިޓީން އެދިފައިވާއިރު، ކުޅިވަރުގެ ދާއިރާގެ ވީހާވެސް ގިނަ ފަރާތްތަކެއް އަދި އާއްމުންވެސް މި ޕްރޮގްރާމުތައް ކުރިއަށްގެންދާއިރު ކުދިންނަށް އެހީތެރިކަން ފޯރުކޮށްދިނުމަށް ވޮލަންޓިއަރުންގެ ގޮތުގައި ބައިވެރިވުމަށްވެސް ވަނީ އެދެފައެވެ.

ހާއްސަ އެހީއަށް ބޭނުންވާ ކުދިންނަށް ހިންގާ ކުޅިވަރުގެ ހަރަކާތްތަކުގައި ބައިވެރިވާ ކުދިން މީހުންނާ ހަވާލުކުރާނީ އެ ކުދިން ގެންގުޅުމާ ގުޅޭ ހާއްސަ ތަމްރީނުތަކެއް ދިނުމަށްފަހު ކަމަށާއި، އެއީ ބެލެނިވެރިއެއް ކަމަށްވިޔަސް އެކަން ހިނގާނީ އެ އުސޫލުން ކަމަށްވެސް އިބްރާހީމް ރަމީޒް ވިދާޅުވިއެވެ. އަދި މި ކުޅިވަރުގެ ޕްރޮގްރާމް ކުރިއަށްގެންދަން ކުޅިވަރު އެސޯސިއޭޝަންތަކުގެ ވަރަށް ބޮޑު އެއްބާރުލުމެއް ލިބެމުންދާ ކަމަށާއި، އެސޯސިއޭޝަންތަކުން ތިބީ ކޮންމެ އެހީތެރިކަމެއްވެސް ދިނުމަށް އަތުކުރި އޮޅާލައިގެން ކަމަށްވެސް އިބްރާހީމް ރަމީޒް ވިދާޅުވިއެވެ.