ވާނުވާ ބަންދަށް ޝަމީމްގެ ވެކްސިން: ދެމިގެންދާ ޝަރީއަތާއި، ތާވަލެއް އެކުލަވާލެވިގެން ހިނގާ ޝަރީއަތް
ހާރު ބަންދުގައި ތިބޭނީ ކޮންމެހެން ބަންދުގައި ތިބެންޖެހޭކަމަށް ފެންނަ މީހުން
ޕްރޮސެކިއުޓަރ ޖެނެރަލް ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ- ޝަމީމް ވަނީ ވާނުވާގެ މައްސަލަތައް ދިގުލައިގެން ދިއުމަކީ ކަންބޮޑުވެވަޑައިގަންނަވާ ކަމެއް ކަމަށް
ޝަރީއަތް ނިމެންދެން ބަންދުކޮށް، "ވާނުވާ" ޖަހާފައި ތިބި މީހުންގެ މައްސަލަތަކަށް އަވަސް ޙައްލެއް ގެނައުމަށްޓަކައި އެންމެ އުފެއްދުންތެރި ޙައްލަކީ ދެމިގެންދާ ޝަރީއަތް (ކޮންޓިނިއަސް ހިއަރިން) ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
"ވާނުވާ ބަންދުގެ ޙަޤީޤީ ވެކްސިން" މި މައުޟޫގެ މައްޗަށް ޝަމީމްގެ ބްލޮގުގައި ޝާއިއުކޮށްފައިވާ ލިޔުމެއްގައި ވަނީ ވާނުވާގެ މައްސަލަތަކަށް ޙައްލު ހޯދުމާ ގުޅޭގޮތުން ވާހަކަ ދައްކަވާފައެވެ. އެގޮތުން ޝަމީމް ވިދާޅުވީ، ޝަރީއަތް ނިމެންދެން ބަންދުކުރާ މީހުންގެ މައްސަލަތައް ނުނިމި ދިގުލައިގެން ދިއުމަކީ ނުހަނު ކަންބޮޑުވެވަޑައިގަންނަވާ ކަމެއް ކަމަށެވެ. އަދި އެކަމަށް ޙައްލެއް ގެނައުމަށްޓަކައި އެކި މަސައްކަތްތައް ކުރެވިފައިވާކަން ފާހަގަކުރައްވާ ޝަމީމް ވިދާޅުވީ، މިހާރު ބަންދުގައި ތިބޭނީ ކޮންމެހެން ބަންދުގައި ތިބެންޖެހޭކަމަށް ފެންނަ މީހުން ކަމަށެވެ.
އޭގެ މިސާލެއްގެ ގޮތުން މީހުން މެރިކަމަށް ތުހުމަތުވާ މީހުންނާއި ކުޑަކުދިންނަށް ޖިންސީ ގޯނާކުރި ކަމަށް ތުހުމަތުވާ މީހުންނާއި ބޮޑެތި ޢަދަދުތަކުން ޑްރަގް ޓްރެފިކްކުރާކަމަށް ތުހުމަތުވާ މީހުން ޝަމީމް ފާހަގަ ކުރެއްވިއެވެ.
މީހަކު ހައްޔަރުކުރާ ދުވަހުން ފެށިގެން އެމީހެއްގެ މައްސަލަ ތަޙްޤީޤު ނިންމާ ޕީޖީ އޮފީހަށް ފޮނުވާނެ މުއްދަތެއް ޖިނާއީ އިޖުރާއަތުގެ ޤާނޫނުގައި ބަޔާން ކޮށްފައިވާކަން ފާހަގަ ކުރައްވައި ޝަމީމް ވިދާޅުވީ، ޤާނޫނުގެ ދަށުން ޝަރީޢަތް ކުރާނެ ގޮތުގެ ތާވަލު ދައުވާލިބޭ މީހާއަށް ލިބުމުން ބަންދުގެ "ވާނުވާ ވަންތަކަން" ގެއްލިގެންދާނެ ކަމަށެވެ.
މި މުޅި މައްސަލައަށް ޙައްލެއް ހޯދުމަށްޓަކައި ދެމިގެންދާ ޝަރީއަތުގެ ބޭނުންތެރިކަމަށް އަލިއަޅުވާލައްވާ ޝަމީމް ވިދާޅުވީ، އެގޮތަށް ޝަރީއަތް ކުރިއަށް ގެންދާނަމަ ޝަރީއަތުގެ މުހިއްމު 3 މަރުޙަލާ ކަމަށްޥާ އިފްތިތާޙީ ބަޔާން (އޯޕަނިންގ ސްޓޭޓްމަންޓް) ހުށަހެޅުމާއި، ދެފަރާތުގެ ހެކިން ހާޒިރުކުރުމާއި، ޚުލާޞާ ބަޔާން އިއްވުން ދެތިން ދުވަސް ތެރޭގައި ނިންމައިލެވޭނެ ކަމަށެވެ. އަދި އެ ހިސާބުން ދެ ދުވަހެއްގެ ބްރޭކަކަށްފަހު މައްސަލައިގެ ޙުކުމް ކުރެވޭނެކަން ޝަމީމް ފާހަގަކުރެއްވިއެވެ. ޝަމީމް ވިދާޅުވީ، ދުނިޔޭގެ އެހެން ޤައުމުތަކުންވެސް ދެމިގެންދާ ޝަރީއަތް ކުރިއަށް ގެންދާ ކަމަށެވެ.
މެދުނުކެނޑި ހިނގާ ޝަރީއަތްތައް ކުރިއަށް ގެންދިއުމަކީ ޕީޖީ އޮފީހުން މީގެ ކުރިންވެސް ވަރަށް ބޮޑަށް ބާރު އަޅާފައިވާ ކަމެކެވެ. އެގޮތުން ކުޑަ ކުދިންނާމެދު ޖިންސީ އަމަލުތައް ހިންގާ މީހުން މައްސަލަތައް އަވަސް ކުރުމަށް މެދުނުކެނޑި ޝަރީއަތްތައް ކުރިއަށް ގެންދިއުމަށް ކްރިމިނަލް ކޯޓަށްވެސް ޝަމީމް ހުށައެޅުއްވިއެވެ.
ކްރިމިނަލް ކޯޓުން މިހާރު މިގޮތަށް ޝަރީއަތްތައް ކުރިއަށް ގެންދަން ފަށާފައިވާއިރު، އޮޅުވާލައިގެން "ގްރޫމް" ކޮށްގެން ކުޑަކުއްޖަކަށް ޖިންސީ ގޯނާ ކުރި މައްސަލައެއްގައިވެސް 8 ގަޑިއިރުވަންދެން ޝަރީއަތް ކުރިއަށް ގެންގޮސް، 14 ހެކިންގެ ހެކިބަސް ނަގާފައިވެއެވެ. އަދި އެއީ ޖިނާއީ އިޖުރާއަތުގެ ޤާނޫނުގެ ދަށުން މިގޮތަށް ކުރިއަށް ގެންދިޔަ ފުރަތަމަ ޝަރީއަތެވެ.
އޭގެ އިތުރުން، މިހިނގާ ޑިސެމްބަރު މަހުގެ 16 ވަނަ ދުވަހުވެސް ވަނީ 3 ހަފްތާ ތެރޭގައި ކުރިއަށް ގެންދިޔަ ޝަރީއަތަކަށްފަހު އެފަދަ މައްސަލައެއްގެ ޙުކުމް އިއްވާފައެވެ.
