ސަސް އަކީ ބަލި ޓީމެއް ނޫން: އިންމަ

މި ސީޒަނުގައި އަލަށް ލީގަށް ޕްރޮމޯޓުވި ނަމަވެސް ސުޕަ ޔުނައިޓެޑް ސްޕޯޓްސް (ސަސް) އަކީ ބަލި ޓީމެއް ނޫން ކަމަށް ދަ ގްރާންޑޭ ސްޕޯޓްސް ކުލަބުގެ ކޯޗު އިސްމާޢީލް މަހަފޫޒް (އިންމަ) ބުނެފިއެވެ.

ދިރާގު ދިވެހި ޕްރިމިއާ ލީގުގައި ދަ ގްރާންޑޭއިން ކުޅުނު ފުރަތަމަ މެޗުން ވަނީ ޓީސީ އަތުން 3-0 ގެ ނަތީޖާއަކުން މޮޅުވެފައެވެ. އަނެއްކޮޅުން ސަސްއިން ވަނީ ވަރުގަދަ ކުލަބު އީގަލްސް 1-0 ގެ ނަތީޖާއަކުން ބަލިކޮށްފައެވެ.

ލީގުގައި އާދީއްތަ ދުވަހުގެ ހަވީރު ސަސްއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އިންމަ ބުނީ މި ސީޒަނުގައި ސަސްއިން ލީގުގައި އަލަށް ކުޅުނު ނަމަވެސް އެޓީމަކީ ބަލި ޓީމެއް ނޫން ކަމަށާއި، އެގޮތުން ތަޖުރިބާކާރު ކުޅުންތެރިންނާއެކު އެ ޓީމުގެ ސްކޮޑް އޮތީ ވަރުގަދަ ކޮށް ކަމަށެވެ.

އެކަމަކު ލީގުގައި ދަ ގްރާންޑޭއިން ކުޅުނު ފުރަތަމަ މެޗުން ޓީސީ އަތުން ފަސޭހަކަމާއެކު މޮޅުވުމުން ކުޅުންތެރިންގެ އިތުބާރު ރަނގަޅު ކަމަށާއި، އެކަމަކު ސަސްއާ ދެކޮޅަށް ކުޅޭ މެޗު ފަސޭހަ ނުވާނެ ކަމަށްވެސް އިންމަ ބުންޏެވެ. އެހެންކަމުން މި މެޗަށް ޓީމު ނުކުންނާނީ ފުރިހަމައަށް ތައްޔާރުވެގެން ކަމަށްވެސް އިންމަ ވަނީ ބުނެފައެވެ.

ދަ ގްރާންޑޭ މެޗުގެ ކުރިން ސަސްގެ ކޯޗު އަޙްމަދު ނާޝިދު (ނާދު) ބުނީ ލީގުގައި އެ ޓީމުން ކުޅުނު ފުރަތަމަ މެޗަށްފަހު އަނިޔާގެ މައްސަލަ ކޮންމެވެސް ވަރަކަށް ޓީމުގައި އެބަހުރި ކަމަށާއި، އަދި ބައެއް ކުޅުންތެރިންގެ ވަރުބަލިކަން އަދިވެސް އެއްކޮށް ނުފިލާ ކަމަށެވެ. އަދި މި މެޗަށް ނުކުންނައިރު ސަސްއިން މާ ބޮޑު ފަރިތަކުރުންތަކެއް ކުރެވިފައިނުވާ ކަމަށާއި، އެހެންނަމަވެސް މި މެޗުން ރަނގަޅު ނަތީޖާއެއް ނެރެން ބޭނުންވާ ކަމަށްވެސް އޭނާ ބުންޏެވެ. އަދި މި މެޗަށް ނުކުންނައިރު އީގަލްސް އަތުން މޮޅެއް ލިބިފައިވުން އެއީ ލިބުނު ވަރަށް ބޮޑު ހިތްވަރެއް ކަމަށްވެސް ނާދު ބުންޏެވެ.

ދިރާގު ދިވެހި ޕްރިމިއާ ލީގުގައި ދަ ގްރާންޑޭ އާއި ސަސް ބައްދަލުކުރާ މެޗު ފަށާނީ އާދީއްތަ ދުވަހުގެ ހަވީރު 16:00 ގައެވެ.