މާލެ ސަރަހައްދުގައި 2500 ޓުއަރިސްޓް އެނދު، މިއަހަރު ނިމުމުގެ ކުރިން 90% އޮޕަރޭޝަނަށް އަންނާނެ
ވަކި ވަކި ގެސްޓުގައުސްތަކުގެ އެސްއޯޕީތައް ދަނީ ލިބެމުން
ޓޫރިޒަމް މިނިސްޓްރީގެ ސީނިއާ އެގްޒެކެޓިވް އޮފިސަރ އަލީ ރައްޒާން
މި އަހަރު ނިމުމުގެ ކުރިން މާލެ ސަރަހައްދުގައި ހުރި ޓޫރިސްޓު އެނދުތަކުގެެ 90 އިންސައްތަ އޮޕަރޭޝަނަށް އަންނާނެ ކަމަށް ޓޫރިޒަމް މިނިސްޓްރީގެ ސީނިއާ އެގްޒެކެޓިވް އޮފިސަރ އަލީ ރައްޒާން ވިދާޅުވެއްޖެއެވެ.
މާލެ ސަރަހައްދުގެ ގެސްޓު ހައުސްތައް ހުޅުވާލަން ނިންމި ނިންމުމާއި އަދި މިކަމާ ގުޅޭ ގޮތުން ނެރުނު ގައިޑްލައިންއާއި ގުޅޭގޮތުން އޭނާ ވަނީ ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވާފައެވެ. އޭނާ ވިދާޅުވީ މާލެ ސަރަހައްދުގެ ގެސްޓު ހައުސްތައް ހުޅުވާލުމުގެ މަސައްކަތް ފެށުނީ އޮކްޓޯބަރު މަހު، މާލެ ސަރަހައްދުގައި ފެންނަ ކޮވިޑުގެ ކޭސްތައް މަދުވުމުން ކަމަށެވެ. މާލެ ސަރަހައްދުގެ ގެސްޓް ހައުސްތައް ހުޅުވުމުގެ ހުއްދަ ހޯމަ ދުވަހުން ފެށިގެންދޭ ގޮތައް ވަނީ ހަމަޖެހިފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ރައްޒާން ވިދާޅުވީ މާލެ ސަރަހައްދުގައި މި ވަގުތު 2،500 އެއްހާ އެނދު އެބަހުރި ކަމަށާއި މި ޑިސެމްބަރު މަސް ނިމުމުގެ ކުރިން އޭގެ 90% އޮޕަރޭޝަނަށް އަންނާނެ ކަމަށެވެ.
ރައްޒާން ވިދާޅުވީ މި މަހުގެ 14 ވަނަ ދުވަހު ގެސްޓު ހައުސްތައް ހުޅުވުމާލުމުގެ ހުއްދަ ދެވުމާއި އެކު، ވަކި ވަކި ގެސްޓުގައުސްތަކުގެ އެސްއޯޕީތައް ލިބެމުންދާ ކަމަށާއި، އެ އެސްއޯޕީތައް މިނިސްޓްރީން ރިވިއު ކުރަމުން ދާ ކަމަށެވެ.
އެގޮތުން އެ އެސްއޯޕީ އަކީ ފާސްކުރެވޭވަރުގެ އެސްއޯޕީއެއް ނަމަ ގެސްޓްހައުސްތަކަށް ގޮސް އިންސްޕެކްޓް ކުރާ ގޮތައް ވަނީ ހަމަޖެހިފައެވެ. މިނިސްޓްރީން ވަނީ ރަށްރަރުގެ ގެސްޓް ހައުސްތައް އިންސްޕެކްޓް ކުރުމުގެ ތަމްރީންތައް ހުރިހާ ކައުންސިލްތަކަކަށް ދީފައެވެ.
