ރާއްޖެއަށް ދަތުރުތައް ފެށުމަށް ގިނަ އެއަރލައިންތަކުން ދަނީ އެދެމުން: ޓޫރިޒަމް މިނިސްޓްރީ

ބޯޑަރު ހުޅުވާލި ފަހުން މިއަދާ ހަމައަށް ރާއްޖެއަށް ދަތުރުތައް ފެށުމަށް ގިނަ އެއަރލައިން ތަކަކުން އެދެމުން އަންނަ ކަމަށް ޓޫރިޒަމް މިނިސްޓްރީގެ ޑެޕިއުޓީ މިނިސްޓަރު އައްސަދު ރިޒާ ވިދާޅުވެއްޖެ އެވެ.

ބޯޑަރު ހުޅުވާލި ފަހުން ހޮނިހިރު ދުވަހާ ހަމައަށް އެއްލައްކަ ފަތުރުވެރިން ރާއްޖެ އައިސްފައިވާއިރު، މި އަދަދު އިތުރު ކުރުމަށް ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުން ދަނީ މަސައްކަތް ކުރަމުންނެވެ. އެގޮތުން ޖުލައި މަހު ބޯޑަރު ހުޅުވާލި ފަހުން، މިއަހަރު ނިމެންވާއިރަށް 150،000 ފަތުރުވެރިން ރާއްޖެ އަންނާނެ ކަމަށް އެމްއޭސީއެލް އިން ވަނީ ބުނެފަ އެވެ.

Advertisement

ގިނަ އަދަދެއްގެ ފަތުރުވެރިން ރާއްޖެ އަންނަމުންދާކަން ފާހަގަކުރައްވާ، ރާއްޖެއެމްވީއަށް މައުލޫމާތު ދެއްވަމުން އައްސަދު ވިދާޅުވީ، މީގެ ދުވަސްތަކެއް ކުރިން ރާއްޖެއަށް ޒިޔާރަތްކުރި ފަތުރުވެރިންގެ އަދަދު ކިތަންމެ މަދު ނަމަވެސް، މިއަދު ފެނިގެން މިދަނީ އެއަށްވުރެ އުފާވެރި މަންޒަރުތަކެއް ކަމަށެވެ.

މިހާރުވެސް ރާއްޖެއަށް އަންނަން ބޭނުންވެގެން ގިނަ އެއަރލައިން ތަކަކުން އެދެމުން އަންނަކަން ފާހަގަކުރައްވާ އައްސަދު ވިދާޅުވީ، އެ އެއަރލައިންތަކުން ރާއްޖެ އަންނަން ބޭނުންވާ ގަޑިތަކަށް އެދެމުން އަންނަ އިރު، ކުރިއަށް އޮތް ދުވަސްތަކުގައި ގިނަ އަދަދެއްގެ ފަތުރުވެރިން ރާއްޖެ އައުމަކީ އެކަށީގެންވާ ކަމެއް ކަމަށެވެ.

އައްސަދު ވިދާޅުވީ، އެއްލައްކަ ވަނަ ފަތުރުވެރިޔާ ހޮނިހިރު ދުވަހު ރާއްޖެއަށް އައުމާއެކު މި އަދަދު އިތުރުކުރުމަށް ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތައް ގުޅިގެން މިހާރުވެސް މަސައްކަތްތަކެއް ކުރަމުން އަންނަ ކަމަށެވެ. އެގޮތުން ޓްރެވެލް އޭޖެންސީ ތަކާއި، ރިސޯޓުތައް އަދި ގެސްޓް ހައުސް އޮޕަރޭޓުކުރާ ފަރާތްތައް ގުޅިގެން މިހާރަށްވުރެ ބާރު ދުވެއްޔެއްގައި ފަތުރުވެރިކަން ކުރިއަރުވަން މަސައްކަތް ކުރަމުން އަންނަ ކަމަށެވެ.

އައްސަދު ވިދާޅުވީ، މިއަހަރަކީ 1.5 މިލިއަން ފަތުރުވެރިންނަށް އަމާޒު ހިފައިގެން މަސައްކަތް ފެށި އަހަރެއް ނަމަވެސް، ކޮވިޑާއި ގުޅިގެން އެކަން ހާސިލް ނުކުރެވުނު ކަމަށެވެ. އެހެން ނަމަވެސް މިއަހަރު ނިމެންވާއިރަށް ފަސް ލައްކަ ފަތުރުވެރިން ރާއްޖެ އަންނާނެ ކަމަށް އޭނާ ވިދާޅުވި އެވެ. އަދި ކުރިއަށް އޮތް އަހަރު އެއް މިލިއަން ފަތުރުވެރިން ގެނައުމަށް މުހިންމު މަސައްކަތްތަކެއް ކުރައްވާނެ ކަމަށް އޭނާ ވިދާޅުވި އެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ބޮޑުތަނުން އިތުރުވެފައިވާއިރު، ޓޫރިސްޓް ހުރިހާ ފެސިލިޓީތަކަކަށް މިހާރު ވަނީ ހުޅުވުމުގެ ހުއްދަ ދީފައެވެ. އަދި އެތަންތަން ހުޅުވާއިރު ހާއްސަ ގައިޑްލައިންތަކެއް ކަނޑައަޅައި އަމަލުކުރަންޖެހެ އެވެ.

ބޯޑަރު ހުޅުވާލިފަހުން މިހާތަނަށް 135 ރިސޯޓް، 127 ސަފާރީ އަދި 146 ގެސްޓްހައުސް އަންނަނީ ހުޅުވައި ފަތުރުވެރިންނަށް ހިދުމަތްދެމުންނެވެ.