''މޯލްޑިވްސް މެރިން ސައިންސް ސިމްޕޯޒިއަމް" ފަށައިފި
12 ޑިސެމްބަރު 2020 | ހޮނިހިރު 07:51ސިމްޕޯޒިއަމް ކުރިއަށް ދަނީ ދެދުވަހަށް
2016 ވަނަ އަހަރުން ފެށިގެން މޯލްޑިވްސް މެރިން ރިސާރޗް އިންސްޓިޓިއުޓުން އިންތިޒާމުކުރަމުންދާ މޯލްޑިވްސް މެރިން ސައިންސް ސިމްޕޯޒިއަމް ދެއަހަރުން އެއް އަހަރު ބާއްވަމުންދޭ
"މޯލްޑިވްސް މެރިން ސައިންސް ސިމްޕޯޒިއަމް" ސިލްސިލާގެ ތިންވަނަ ސިމްޕޯޒިއަމް ފަށައިފިއެވެ.
2016 ވަނަ އަހަރުން ފެށިގެން މޯލްޑިވްސް މެރިން ރިސާރޗް އިންސްޓިޓިއުޓުން އިންތިޒާމުކުރަމުންދާ މޯލްޑިވްސް މެރިން ސައިންސް ސިމްޕޯޒިއަމް ދެއަހަރުން އެއް އަހަރު ބާއްވަމުންދާނެއެވެ.
މި ސިމްޕޯޒިއަމްގެ މަގުސަދަކީ ދިވެހި ރާއްޖޭގެ ކަނޑުގެ މާހައުލާއި ވަސީލަތްތަކާއި ދިރުންތަކާއި ގުޅޭގޮތުން ކުރެވެމުންދާ ދިރާސަތަކުގެ މައުލޫމާތު ބަދަލުކޮށް، އެ ދިރާސާތަކުގެ ނަތީޖާ އާއްމުންނާއި ހިއްސާކުރުމުގެ ޒަރީއާއިން ރާއްޖޭގައި މެރިން ސައިންސްގެ ދާއިރާ ކުރިއެރުވުމެވެ.
މޯލްޑިވްސް މެރިން ސައިންސް ސިމްޕޯޒިއަމް އަކީ މި ދާއިރާއިން ރާއްޖޭގައި ބާއްވާ މިފަދަ ހަމައެކަނި ބައްދަލުވުންކަމުން، މިއީ ރާއްޖޭގައި މެރިން ސައިންސުގެ ދާއިރާއިން ކުރެވޭ މަސައްކަތްތަކާއި ގުޅޭ މުހިންމު މައުލޫމާތުތައް ލިބިގެން ދާނޭ ފޯރަމެކެވެ.
ތިންވަނަ މޯލްޑިވްސް މެރިން ސައެންސް ސިމްޕޯޒިއަމް އިފްތިތާހު ކޮށްދެއްވީ މިނިސްޓަރ އޮފް ފިޝަރީޒް، މެރިން ރިސޯސަސް ޒަހާ ވަހީދެވެ.
ދިވެހިރާއްޖޭގައި ދެމެހެއްޓެނިވި ނޫ އިގުތިސާދެއް ބައްޓަންކުރުމުގައި، ސައިންސުން ފޯރުކޮށްދޭ މައުލޫމާތަށް ސަރުކާރުން ދޭ އަހަންމިއްޔަތުގެ މައްޗަށް ސިމްޕޯޒިއަމް އިފްތިތާހުކުރައްވަމުން ބައިވެރިންނާއި މުޚާތަބުކުރައްވައި މިނިސްޓަރ ދެއްކެވި ވާހަކަފުޅުގައި އަލިއަޅުއްވާފައިވެއެވެ. އަދި މެރިން ސައިންޓިފިކް ދިރާސާތައް އާންމުކުރެވޭނޭ ޕްލެޓްފޯމެއް އޮތުމުގެ މުހިންމުކަން ފާހަގަ ކުރައްވާފައިވެއެވެ.
ދެދުވަހަށް ކުރިއަށް ގެންދާ މި ސިމްޕޯޒިއަމްގައި 5 ދާއިރާއަކުން ޖުމްލަ 34 ކަރުދާހެއް ހުށަހެޅިގެން ދާނެއެވެ. މި ދާއިރާތަކުގެ ތެރޭގައި، ފަރުތައް މޮނިޓަރ ކުރުމާއި އިއާދަކުރުން، ފަރުތަކުގެ ދިރުން، ކަނޑޫފަލާއި މޫދުވިނި، މެގަފޯނާ (ކަނޑުގައި އުޅޭ ބިޔަ ދިރުންތައް)، އަދި މަސްވެރިކަން މެނޭޖްކުރުމުގެ ދާއިރާއިން ކޮށްފައިވާ ދިރާސާތައް ހިމެނެއެވެ.
މި އަހަރުގެ ސިމްޕޯސިއަމަށް ހުށަހަޅާފައިވާ އެބްސްޓްރެކްޓްތައް ރިވިއު ކުރެއްވި، ސިމްޕޯޒިއަމްގެ ސައިންޓިފިކް ކޮމިޓީން، މި ސިމްޕޯޒިއަމްގައި ހިމެނުމަށް ފެންވަރު ރަނގަޅު، ކޮލިޓީ ދިރާސާތައް ހުށަހަޅާފައިވާކަމަށް ވިދާޅުވެއެވެ.
