ސައުދީގައި ކޮވިޑް-19ގެ ކޭސްތައް ރިކޯޑު އަދަދަކަށް ދަށްވެއްޖެ
10 ޑިސެމްބަރު 2020 | ބުރާސްފަތި 04:29ފާއިތުވެ ދިޔަ 24 ގަޑިއިރު ތެރޭގައި ޕޮޒިޓިވްވެގެން ރިޕޯޓުކޮށްފައިވަނީ 159 ކޭސް
ސައުދީ އަރަބިއްޔާގައި ބަލި ކޮންޓްރޯލް ކުރުމަށް ގިނަ ފިޔަވަޅުތަކެއް އަޅާފައިވޭ
ސައުދީ އަރަބިއްޔާގައި ކޮވިޑް-19ގެ ކޭސްތައް ރިކޯޑު އަދަދަކަށް ދަށްވެއްޖެއެވެ.
ސައުދީ ގެޒެޓްގައި ރިޕޯޓުކޮށްފައިވާ ގޮތުގައި ކޮވިޑް-19 ޕެންޑަމިކްގައި މިހާރު ބަޔަށް ޕޮޒިޓިވް ވެގެން ރިޕޯޓު ކުރެވޭ މިންވަރު ވަނީ ދަށަށް ގޮސްފައެވެ. އެގޮތުން ފާއިތުވެ ދިޔަ 24 ގަޑިއިރު ތެރޭގައި ޕޮޒިޓިވްވެގެން ރިޕޯޓުކޮށްފައިވަނީ 159 ކޭސްއެވެ.
އޮފިޝަލުން ވިދާޅުވާ ގޮތުގައި ފާއިތުވެދިޔަ ފަސް ދުވަހުގެ ތެރޭގައި ބައްޔަށް ޕޮޒިޓިވްވެގެން ރިޕޯޓުކޮށްފައިވަނީ 200ށް ވުރެ މަދުންނެވެ.
ހެލްތް މިނިސްޓްރީން ބުނީ ބަލި ފެތުރޭ މިންވަރު ދަށްވެފައިވާ ކަމަށެވެ. އަދި ފާއިތުވެދިޔަ 24 ގަޑިއިރު ތެރޭގައި ކޮންޕްލިކޭޝަންތައް ހުރި 13 މީހަކު ބަލީގައި މަރުވެފައިވާ ކަމަށެވެ.
ސައުދީގައި މިހާތަނަށް 359،274 މީހުން ބައްޔަށް ޕޮޒިޓިވްވެފައިވާއިރު، 6000ށް ވުރެ ގިނަ މީހުން ބަލީގައި މަރުވެފައިވެއެވެ. ފާއިތުވެދިޔަ 24 ގަޑިއިރު 210 މީހަކު ބަލިން ރަނގަޅުވެފައިވާއިރު، ބަލިން ރަނގަޅުވި ޖުމްލަ އަދަދަކީ 349،624 މީހުންނެވެ.
