އިބްރަހިމޮވިޗުގެ އެއްބަސްވުން މިލާނުން ދިގު މުއްދަތަކަށް އާކުރަނީ

ސްވިޑެންގެ ކުރީގެ ކެޕްޓަން ޒްލަޓާން އިބްރަހިމޮވިޗުގެ އެއްބަސްވުން ދިގު މުއްދަތަކަށް އާކުރަން އޭސީ މިލާނުން މަސައްކަތް ކުރަމުން އަންނަ ކަމަށް އެ ޓީމުގެ ސްޕޯޓިންގ ޑިރެކްޓަރު ފްރެޑެރިކް މަސާރާ ބުނެފިއެވެ.

އުމުރުން 38 އަހަރުގެ ފޯވާޑް އަނބުރާ މިލާނާ ގުޅެފައިވަނީ މިދިޔަ އަހަރުގެ ޑިސެމްބަރު މަހުގެ ފަހުކޮޅެވެ. އެފަހަރު އިބްރަހިމޮވިޗް މިލާނުގެ އެއްބަސްވުން ހެދީ މިދިޔަ ސީޒަނުގެ ނިޔަލަށެވެ. އެކަމަކު މި އަހަރުގެ ސެޕްޓެމްބަރު މަހުގެ ތެރޭގައި އިބްރަހިމޮވިޗް ވަނީ މިލާނާއެކު ހަދާފައިވާ އެއްބަސްވުން އިތުރު އެއް އަހަރަށް އާކޮށްފައެވެ.

އެކަމަކު މިދިޔަ ސީޒަނާ މި ސީޒަނުގައިވެސް އިބްރަހިމޮވިޗް މިހާތަނަށް ދެއްކި މޮޅު ކުޅުމާއެކު، އޭނާގެ އެއްބަސްވުން ދިގު މުއްދަތަކަށް އާކުރަން މިލާނުގެ މެނޭޖުމަންޓުން ބޭނުންވާ ކަމަށް އެ ޓީމުގެ ސްޕޯޓިންގ ޑިރެކްޓަރު ފްރެޑެރިކް މަސާރާ ބުންޏެވެ. އޭނާ ބުނީ އެއްބަސްވުމާ މެދު ގޮތެއް ނިންމާނީ އިބްރަހިމޮވިޗް އަމިއްލައަށް ކަމަށާއި، އެކަމަކު ދިގު މުއްދަތަކަށް މިލާނުގައި އިބްރަހިމޮވިޗް މަޑުކުރުމަކީ އޭނާވެސް ބޭނުންވާ ގޮތް ކަމަށެވެ.

އިބްރަހިމޮވިޗުގެ އެއްބަސްވުން ދިގު މުއްދަތަކަށް އާކުރަން މިލާނުން މަސައްކަތް ކުރަމުން އަންނައިރު، އޭނާ މިހާރު ހުރީ ފައިގެ ފަލަމަސްގަނޑަށް ލިބުނު އަނިޔާއެއްގައި ކުޅުމާ ދުރުގައެވެ.

އިބްރަހިމޮވިޗަށް އަނިޔާވިއިރު، އޭނާ އަންނަނީ މި ސީޒަނުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މިހާތަނަށް މި ސީޒަނުގައި އޭނާ ވަނީ ކުޅުނު 10 މެޗުގައި 11 ލަނޑު ޖަހާފައެވެ. މީގެ ތެރެއިން 10 ލަނޑު އިބްރަހިމޮވިޗް ޖަހާފައިވަނީ އިޓާލިއަން ލީގުގައި ކުޅުނު ހަ މެޗުގައެވެ.

މީގެ ކުރިން 2010-2012 އަށް އިބްރަހިމޮވިޗް މިލާނަށް ކުޅެދިންއިރު، އެފަހަރު އޭނާ ވަނީ މިލާނަށް ކުޅެދިން 85 މެޗުގައި 56 ލަނޑު ކާމިޔާބުކޮށްފައެވެ. އަދި ވަނީ މިލާނާއެކު އިޓާލިއަން ލީގާއި އިޓާލިއަން ސުޕަ ކަޕް ކާމިޔާބުކޮށްފައެވެ.

މި ސީޒަނުގައި މިލާނުން މޮޅު ކުޅުމެއް ދައްކަމުން އަންނައިރު، އެ ޓީމު އޮތީ އިޓާލިއަން ލީގުގެ އެއްވަނައިގައި ކުޅުނު 10 މެޗުން ލިބުނު 26 ޕޮއިންޓާއެކުއެވެ. އަދި ލީގުގައި މިހާތަނަށް ކުޅުނު އެއްވެސް މެޗަކުން މިލާން ބަލިވެފައެއް ނުވެއެވެ.